‘பள்ளிப் பார்வை-2.0’ செயலி அறிமுகம்: அனைத்து அலுவலர்களும் பயன்படுத்த அறிவுறுத்தல்

சென்னை: ஒருங்கிணைந்த பள்ளிக்கல்வியின் மாநிலத் திட்ட இயக்குநரகம் சார்பில், அனைத்து மாவட்ட முதன்மைக் கல்வி அலுவலர்களுக்கும் அனுப்பப்பட்டுள்ள சுற்றறிக்கை விவரம்: தமிழகத்தில் பள்ளிகளின் செயல்பாடுகளை கண்காணிப்பதற்காக ‘பள்ளிப் பார்வை’ எனும் செயலி அறிமுகம் செய்யப்பட்டிருந்தது. தற்போது அதை மேம்படுத்தி புதிய ‘பள்ளிப் பார்வை-2.0’ செயலி அறிமுகப்படுத்தப்பட்டு உள்ளது. இவற்றை அலுவலர்கள் கூகுள் பிளே ஸ்டோரில் பதிவிறக்கம் செய்துகொள்ளலாம்.

இந்த புதிய செயலியில் 6 முதல் 9ம் வகுப்பு வரை பயிலும் மாணவர்களில் திறன் இயக்கத்தில் பயிற்சி பெறுபவர்களுக்கு மட்டுமே இனி மதிப்பீடுகள் மேற்கொள்ளப்படும். அதேபோல், அலுவலர்கள் பள்ளிகளில் ஆய்வு செய்யும்போது குறைந்தது 2 மாணவர்களின் நோட்டுப் புத்தகங்களையாவது கட்டாயம் சரிபார்க்க வேண்டும்.

மேலும், ஆய்வுப் பணிகளை திறம்பட செய்யவும், முழுமையான மதிப்பீட்டை உறுதி செய்யவும் அனைத்து அலுவலர்களும் இந்த புதிய செயலியை பயன்படுத்த வேண்டும். இவ்வாறு அதில் கூறப்பட்டுள்ளது.