திருமண தடை நீங்க பரிகாரம் செய்வதாக கூறி ஏமாற்றிய ஜோதிடர்.!! இளம்பெண் அளித்த பரபரப்பு பாலியல் புகார்

கோவை: திருப்பூரை சேர்ந்த 30 வயது இளம்பெண் ஒருவர் கோவையை சேர்ந்த ஒரு ஜோதிடர் மீது பரபரப்பு புகார் ஒன்றை அளித்துள்ளார். கோவை சரக போலீஸ் ஐ.ஜி.யிடம் அளித்துள்ள புகார் மனுவில் தனது திருமணத்திற்காக தன் பெற்றோர் நீண்டகாலமாக வரன் பார்த்து வந்ததாகவும், எதுவும் சரிவர அமையவில்லை என்றும் குறிப்பிட்டுள்ளார்.

இந்த சூழலில் தனக்கு திருமணம் விரைவில் நடைபெற வேண்டு என்ற நோக்கத்தில் பல பரிகாரங்கள் செய்து வந்ததாக குறிப்பிட்டுள்ளார். திருமணத்திற்கு சரியான வரன் எதுவும் அமையாததால் பெற்றோர் பட்ட துயரத்தினால் மிகுந்த மனஉளைச்சலுக்கு ஆளானதாக குறிப்பிட்டுள்ளார். இதனை தொடர்ந்து கடந்த 3 ஆண்டுகளுக்கு முன் நண்பர் ஒருவர் மூலம் கோவை நரசிம்மநாயக்கன் பாளையம் பகுதியில் உள்ள ஜோதிடர் ஒருவரை சந்தித்தேன். அவர் சில பரிகாரங்களை செய்தால் விரைவில் உனக்கு திருமணம் நடக்கும் என கூறினார். பரிகாரம் என்ற பெயரில் பல முறை என்னை நேரில் அழைத்து சந்தித்தார். பின்னர் ஒருகட்டத்தில் அவரே என்னை

திருமணம் செய்து கொள்வதாக ஆசைவார்த்தை கூறி என்னை கட்டாயப்படுத்தி பலமுறை உல்லாசமாக இருந்தார்.

அவர் என்னை நிச்சயம் திருமணம் செய்து கொள்வார் என நம்பினேன். கடன் பிரச்சினை இருப்பதாக கூறி நான் திருமணத்துக்கு சேமித்து வைத்த பணத்தை கேட்டார், கொடுத்து விட்டேன். ஒருமுறை தனது உறவினர் விபத்தில் சிக்கி விட்டதாக கூறி ரூ.1 லட்சத்து 50 ஆயிரம் பெற்றார். என்னிடம் இருந்த பணத்தை அபகரித்துக் கொண்ட பின் திடீரென என்னுடன் பேசுவதை நிறுத்தினார். இதனால் அதிர்ச்சியடைந்த நான் அவரை பற்றி தீர விசாரித்தபோது அவருக்கு ஏற்கனவே திருமணமாகி விட்ட தகவல் தெரிந்தது. அவரை நேரில் சந்தித்து இப்படி என்னை ஏமாற்றி விட்டீர்களே என அழுது முறையிட்டேன். அதற்கு அவர் எனக்கு கொலை மிரட்டல் விடுத்தார்.என்னுடைய திருமண ஆசையை பயன்படுத்தி என்னை நம்பவைத்து எனது வாழ்க்கையை சீரழித்ததோடு மட்டுமின்றி, கொலை மிரட்டல் விடுத்த ஜோதிடர் மீது போலீசார் உரிய நடவடிக்கை எடுக்க வேண்டும்.

உயர் போலீஸ் அதிகாரி என்னுடைய வாடிக்கையாளராக உள்ளார். அவரிடம் கூறி உன்னை தொலைத்து விடுவேன் எனவும் ஒருகட்டத்தில் மிரட்டினார். எனவே எனக்கு தகுந்த பாதுகாப்பு வழங்க வேண்டும், என்னை நம்ப வைத்து ஏமாற்றிய ஜோதிடர் மீது உரிய நடவடிக்கை எடுக்க வேண்டும் என பாதிக்கப்பட்ட இளம்பெண் தனது புகார் மனுவில் கூறி உள்ளார். மேலும் பாதிக்கப்பட்ட அந்த இளம்பெண் மேற்கண்ட தகவல்கள் அடங்கிய இந்த புகார் மனுவை திருப்பூர் மாவட்ட போலீஸ் சூப்பிரண்டு, திருப்பூர், கோவை மாவட்ட கலெக்டர்கள் மற்றும் முதலமைச்சரின் தனிப்பிரிவு அலுவலகத்துக்கும் அனுப்பி உள்ளார். ஜோதிடர் மீது இளம்பெண் ஒருவர் கூறியுள்ள பலாத்கார புகார் கோவை வட்டாரத்தில் பரபரப்பை ஏற்படுத்தி உள்ளது.