‘சீஹாக்’ ஹெலிகாப்டர்களை பராமரிக்க அமெரிக்காவுடன் ரூ.8000 கோடியில் கையெழுத்து: கடற்படையின் பலத்தை அதிகரிக்க நடவடிக்கை

புதுடெல்லி: இந்தியக் கடற்படை ஹெலிகாப்டர்களைப் பராமரிக்க அமெரிக்காவுடன் சுமார் 8 ஆயிரம் கோடி ரூபாய் மதிப்பிலான ஒப்பந்தம் கையெழுத்தாகியுள்ளது. இந்தியக் கடற்படையின் கண்காணிப்பு மற்றும் தாக்குதல் திறனை மேம்படுத்துவதற்காக, கடந்த 2020ம் ஆண்டு பிப்ரவரி மாதம் அமெரிக்காவிடமிருந்து 24 எம்.எச்-60ஆர் சீஹாக் வகை ஹெலிகாப்டர்களை வாங்குவதற்கு ஒப்பந்தம் செய்யப்பட்டது. நீர்மூழ்கிக் கப்பல்களைத் தாக்கி அழிக்கும் திறன் கொண்ட இந்த ஹெலிகாப்டர்கள் அனைத்தும் வாங்கப்பட்டு, கடந்த மார்ச் மாதம் கொச்சியில் உள்ள ஐஎன்எஸ் கருடா தளத்தில் முதல் படைப்பிரிவாக இணைக்கப்பட்டன.

அனைத்து வானிலை நிலைகளிலும் செயல்படக்கூடிய இந்த ஹெலிகாப்டர்கள், போர்க்கப்பல்களிலிருந்து இயங்கும் வல்லமை பெற்றவை. இந்நிலையில், இந்த ஹெலிகாப்டர்களின் நீண்டகால பயன்பாட்டையும், தயார் நிலையையும் உறுதி செய்யும் வகையில் தற்போது முக்கிய நடவடிக்கை எடுக்கப்பட்டுள்ளது. இதன் தொடர்ச்சியாக, இந்த 24 ஹெலிகாப்டர்களுக்குத் தேவையான உதிரிபாகங்கள், பழுதுநீக்கம், பயிற்சி மற்றும் தொழில்நுட்ப உதவிகளை வழங்குவதற்காக அமெரிக்காவுடன் சுமார் 7,995 கோடி ரூபாய் மதிப்பிலான புதிய ஒப்பந்தம் நேற்று டெல்லியில் கையெழுத்தானது.

அடுத்த 5 ஆண்டுகளுக்கு இந்த ஹெலிகாப்டர்களைப் பராமரிப்பதற்கான முழுப் பொறுப்பையும் இந்த ஒப்பந்தம் உறுதி செய்கிறது. குறிப்பாக, ‘சுயச்சார்பு இந்தியா’ திட்டத்தின் கீழ், இதற்கான பராமரிப்பு மற்றும் பழுதுபார்க்கும் மையங்கள் இந்தியாவிலேயே அமைக்கப்பட உள்ளன என்பது இந்த ஒப்பந்தத்தின் முக்கிய அம்சமாகும். இதன் மூலம் அவசரத் தேவைகளுக்கு வெளிநாட்டைச் சார்ந்திருக்காமல், உள்நாட்டிலேயே பராமரிப்பு பணிகளை மேற்கொள்ள முடியும் என்றும், இது கடற்படையின் செயல்பாட்டுத் திறனைப் பன்மடங்கு அதிகரிக்கும் என்றும் பாதுகாப்புத்துறை வட்டாரங்கள் தெரிவிக்கின்றன.