மழைக்காலமும்... கால்நடை பராமரிப்பும்!

மழைக்காலத்தில் கன்று பராமரிப்பு

மழைக்காலத்தில் பிறக்கும் கன்றுகள் ஈரப்பதம் மற்றும் குளிரினால் வெகுவாகப் பாதிக்கப்படுகின்றன. எனவே மழைக்காலத்தில் கன்றுகளை நனையாமல் பார்த்துக்கொள்ள வேண்டும். குறிப்பாக இரவு நேரத்தில் கன்றுகள் கதகதப்பான சூழலில் இருக்குமாறு பார்த்துக்கொள்வது அவசியம். தரையில் வைக்கோல் பரப்புதல், பக்கவாட்டில் குளிர் தாக்கம் ஏற்படாமல் இருக்கக் கோணிப்பைகளைக் கட்டுதல், இரவு நேரத்தில் கன்றுகளின் மேலே மின்பல்புகளைத் தொங்க விடுதல், கன்றுகளுக்குச் சாம்பிராணி புகைமூட்டம் போடுதல் போன்ற பராமரிப்புகளை அவசியம் செய்ய வேண்டும். கன்றுகளுக்கு சத்தான தீவனம் அளிக்க வேண்டும். ரத்தக் கழிசல் உள்ளிட்ட பிரச்னைகளுக்காக உரிய தடுப்பு மருந்துகளை கால்நடை மருத்துவரின் ஆலோசனைப்படி கொடுக்க வேண்டும்.

நோய் தடுப்பு முறைகள்

மழைக்காலத்தில் கால்நடைகளை நோய்கள் தாக்க அதிக வாய்ப்புகள் உண்டு. எனவே பருவமழை தொடங்கும் முன்னரே உரிய தடுப்பூசிகளைக் கறவை மாடுகளுக்குப் போட வேண்டும். கோமாரி, சப்பை நோய் மற்றும் தொண்டை அடைப்பான் நோய்க்கு மழைக்காலம் தொடங்கும் முன்னர் கால்நடை மருத்துவரை அணுகித் தடுப்பூசிகளைப் போட்டுக் கொள்ள வேண்டும். ஏரி, குளம், குட்டைகளில் தண்ணீர் குடிக்கும் மாடுகளுக்கும், அவற்றைச் சுற்றி மேயும் மாடுகளுக்கும் தட்டைப் புழுவிற்கான குடற்புழு நீக்க மருந்தினைப் பருவ மழை தொடங்கும் முன்பு கொடுக்க வேண்டும்.

பசுக்களைப் பாதுகாத்தல்

மழைக்காலத்தில் இடி மற்றும் மின்னல் ஏற்படுவது சகஜம்தான். இடி தாக்கும்போது மனிதர்களைப் போலவே கால்நடைகளும் பாதிக்கப்படுகின்றன. எனவே இடி மின்னலின்போது கால்நடைகளைத் திறந்த வெளியில் மேய்ச்சலுக்கு ஓட்டிச் செல்வதைத் தவிர்க்க வேண்டும். இடியுடன் கூடிய மழையின் பொழுது பசுக்களை மரத்திற்குக் கீழே ஓட்டிச் செல்லக்கூடாது. மேய்க்க வரும் மரத்தின் அடியில் அடைக்கலம் தேடக்கூடாது. பனைமரம் மற்றும் தென்னை மரங்களுக்கு அடியில் செல்வது ஆபத்தைக் கூட்டும். இடி மின்னலின்போது செல்போன் கோபுரங்கள், உயர் அழுத்த மின் கோபுரங்கள், உயர் அழுத்த மின்சார வழித்தடங்கள் ஆகியவற்றின் கீழ் மாடுகள் சென்று மேயாமல் பார்த்துக்கொள்ள வேண்டும். மின்னலின் போது பொதுவாக மரங்களுக்கு 10 அடிக்கு அப்பால் கால்நடைகள் இருக்குமாறு பார்த்துக்கொள்ள வேண்டும். இடி மின்னல் தாக்கம் அதிகமாக உள்ள பகுதிகளில் கொட்டகையைச் சுற்றி 10 அடி தூரத்தினுள் மரங்களை நடக்கூடாது. இவற்றை கால்நடை வளர்ப்பாளர்கள் அவசியம் கடைபிடிக்க வேண்டும்.