ஏற்கனவே வினாத்தாள் பிரச்னைக்கு மத்தியில் தேர்வு குளறுபடியால் ‘யுஜிசி நெட்’ தேர்வு ரத்து: மோடியை கடுமையாக சாடிய ராகுல் காந்தி

டெல்லி: யுஜிசி நெட் தேர்வில் குளறுபடி ஏற்பட்டு தேர்வு ரத்து செய்யப்பட்ட விவகாரத்தில், ஒன்றிய அரசையும் பிரதமரையும் காங்கிரஸ் தலைவர் ராகுல் காந்தி கடுமையாக விமர்சித்துள்ளார். நாட்டின் பல்வேறு உயர்கல்வி நிறுவனங்களில் உதவிப் பேராசிரியர் பணி மற்றும் இளநிலை ஆராய்ச்சி உதவித்தொகை பெறுவதற்காக தேசிய தேர்வு முகமை சார்பில் யுஜிசி நெட் தேர்வுகள் நடத்தப்பட்டு வருகின்றன. அந்தவகையில் கடந்த ஜூன் 22ம் தேதி முதல் 30ம் தேதி வரை ஆங்கிலம், வர்த்தகம் மற்றும் சமூகவியல் உள்ளிட்ட பாடங்களுக்கான தேர்வுகள் நடைபெற்றன. இந்த வினாத்தாள்களில் பல்வேறு பிழைகள், தவறான கேள்விகள் மற்றும் பழைய வினாக்கள் மீண்டும் இடம்பெற்றதாக புகார்கள் எழுந்தன.

இதுகுறித்து ஆய்வு செய்ய அமைக்கப்பட்ட குழுவின் பரிந்துரையின் பேரில், சுமார் 2 மாதங்களுக்குப் பிறகு, மேற்கண்ட 3 பாடங்களுக்கான தேர்வுகளையும் ரத்து செய்து மீண்டும் செப்டம்பர் 9ம் மற்றும் 10ம் தேதிகளில் நடத்த தேசிய தேர்வு முகமை முடிவு செய்துள்ளது. ஆங்கிலம் மற்றும் வர்த்தக பாடங்களுக்கு செப்டம்பர் 9ம் தேதியும், சமூகவியல் பாடத்திற்கு செப்டம்பர் 10ம் தேதியும் மறுதேர்வு நடக்கும் என்றும், இதற்காக மாணவர்களிடம் கூடுதல் கட்டணம் வசூலிக்கப்படாது என்றும், எஞ்சிய 84 பாடங்களுக்கான முடிவுகள் திட்டமிட்டபடி வெளியாகும் என்றும் அறிவிக்கப்பட்டுள்ளது. தேர்வாணையத்தின் இந்த குளறுபடிகளுக்கு எதிர்ப்பு தெரிவித்து காங்கிரஸ் எம்பி ராகுல் காந்தி வெளியிட்டுள்ள அறிக்கையில், ‘மோடி அவர்களே..., உங்களின் தேசிய தேர்வு முகமை அமைப்பு என்ன செய்துள்ளது என்று பாருங்கள்.

ஜூன் 22ம் தேதி முதல் 30ம் தேதி வரை நடந்த யுஜிசி நெட் தேர்வுகளை 2 மாதங்களுக்குப் பிறகு ரத்து செய்துள்ளனர். தேர்வு முகமை செய்யும் தவறுகளுக்கு மாணவர்கள் தண்டனை அனுபவிக்கிறார்கள். நாட்டின் கல்வி முறை இப்போது பணத்தைப் பிழியும் இயந்திரமாக மாறிவிட்டது. தேர்வு நடத்தும் தகுதியற்ற அமைப்பை பிரதமர் உருவாக்கியுள்ளார். தர்மேந்திர பிரதானின் ராஜினாமா முதல் படிதான், கடைசி படி அல்ல. இந்த குளறுபடிக்கு தேர்வு முகமையின் தலைமையே பொறுப்பேற்க வேண்டும்’ என்று கடுமையான எதிர்வினையை பதிவிட்டுள்ளார். மேலும், எஞ்சிய பாடங்களின் முடிவுகள் தாமதமாவது குறித்தும் தேர்வு முகமையின் செயல்பாடுகள் குறித்தும் காங்கிரஸ் எம்பிக்கள் கேள்வி எழுப்பியுள்ளது குறிப்பிடத்தக்கது.