அமித்ஷாவின் கபட நாடகத்தை ஏற்க மாட்டார்கள் பாஜவின் மாய்மால அரசியல் தமிழ்நாட்டு மக்கள் மத்தியில் ஒருபோதும் எடுபடாது: செல்வப்பெருந்தகை விளாசல்
அமித்ஷா பேசும் போது, தமிழ் மொழில் பேச முடியவில்லையே என்ற வருத்தம் ஏற்படுவதாக நாடகமாடியிருக்கிறார். தேசிய கல்விக் கொள்கையின் மூலம் இந்தி திணிப்பை எதிர்த்த தமிழ்நாட்டிற்கு சமக்ரா சிக்ஷா அபியான் திட்டத்தின் மூலம் ஒதுக்க வேண்டிய ரூ.2152 கோடியை ஒதுக்காமல் வஞ்சித்ததற்கு அமித்ஷா என்ன பதில் கூறப் போகிறார் ? இந்தி மொழியை தமிழ்நாட்டின் மீது திணிக்க கங்கணம் கட்டி செயல்படும் அமித்ஷாவினுடைய கபட நாடகத்தை தமிழ்நாட்டு மக்கள் ஏற்க மாட்டார்கள்.
தமிழ்நாட்டில் மக்கள் பேராதரவோடு நடைபெற்று வருகிற மு.க.ஸ்டாலின் தலைமையிலான நல்லாட்சியை குறை கூறுவதற்கு அமித்ஷாவுக்கு எந்த உரிமையும் இல்லை. அதிகமான நிதியை தமிழ்நாட்டு மக்களிடம் இருந்து வஞ்சித்து, வாட்டி வதைத்து வசூலித்து விட்டு தமிழ்நாட்டிற்கு அதிக நிதி ஒதுக்கியதாக அமித்ஷா கூறுவதற்கு என்ன ஆதாரம் இருக்கிறது ? இதற்கு அமித்ஷா பதில் கூறுவாரா ? எனவே, தமிழ்நாட்டு மக்களை தொடர்ந்து மாற்றாந்தாய் மனப்பான்மையோடு நடத்தி வருகிற பாஜவின் மாய்மால அரசியல் தமிழ்நாட்டில் ஒருபோதும் எடுபடாது. தமிழ்நாட்டில் பாஜ ஆட்சி என்பது கானல் நீராகத் தான் இருக்கப் போகிறது. இவ்வாறு அவர் கூறியுள்ளார்.