‘உங்களுடன் ஸ்டாலின்’ திட்ட முகாமில் மனு அளித்ததையடுத்து ராங்கியம் அழகப்பெருமாள் கோயில் ஊரணி சீரமைப்பு
*கிராம மக்கள் வரவேற்பு
திருமயம் : ‘உங்களுடன் ஸ்டாலின்’ திட்ட முகாமில் மனு கொடுக்கப்பட்டதையடுத்து, திருமயம் அருகே உள்ள ராங்கியம் கோயில் ஊரணி சுத்தம் செய்யப்பட்டு, மழை நீர் சேகரிப்பிற்கு தயாராகியுள்ளது.
புதுக்கோட்டை மாவட்டம், திருமயம் அருகே உள்ள ராங்கியம் கிராமத்தில் பழமை வாய்ந்த அழகப் பெருமாள் கோயில் ஊரணி உள்ளது. இதனை அப்பகுதியைச் சேர்ந்த மக்கள் கடந்த சில ஆண்டுகளாக குளிப்பதற்காக பயன்படுத்தி வந்தனர். மேலும், ஊரணி மழைநீர் தேக்கி வைப்பதால், நிலத்தடி நீர் மட்டம் உயர்ந்திருந்தது.
இந்நிலையில், கடந்த சில ஆண்டுகளாக நீர்வரத்து வாரிகள் சரிவர தூர்வாரி பராமரிப்பின்றி கிடந்தது. இதனால், ஊரணியில் நீரின்றி பயன்பாடின்றி புதர்மண்டி பாழடைந்தது. சமீபத்தில் பெய்த மழையால் ஊரணிக்கு நீர் வந்தாலும், பொதுமக்கள் பயன்படுத்த முடியாத நிலை ஏற்பட்டது.
இதனை சரி செய்யக்கோரி அப்பகுதியினர் புகார் செய்தும் நடவடிக்கை எடுக்கப்படவில்லை. இதனிடையே, கடந்த மாதம் அப்பகுதியில் நடைபெற்ற ‘உங்களுடன் ஸ்டாலின்’ திட்ட முகாமில் ராங்கியம் பகுதியைச் சேர்ந்த மக்கள் மனு கொடுத்தனர். மேலும், பொதுமக்களின் கோரிக்கையை தினகரன் நாளிதழ் செய்தியாக வெளியிட்டது.
இதனைத் தொடர்ந்து சம்பந்தப்பட்ட துறை அதிகாரிகள் உத்தரவின் பேரில் ராங்கியம் ஊராட்சி சார்பில் கருவேல மரம் மண்டி கிடந்த ஊரணி சுத்தம் செய்யப்பட்டது. இதனால், மழைநீர் சேகரிக்கப்பட்டு, நிலத்தடி நீர் உயரும் வாய்ப்பு ஏற்பட்டுள்ளது என கிராமத்தினர் தெரிவித்தனர்.
