2வது நாளாக சூறைக்காற்றுடன் தொடர் மழை: ராமேஸ்வரத்தில் இயல்பு வாழ்க்கை கடும் பாதிப்பு

ராமேஸ்வரம்: டிட்வா புயலால் ராமேஸ்வரம் தீவில் 2வது நாளாக பலத்த காற்றுடன் தொடர்ந்து மழை பெய்கிறது. இதனால், பொதுமக்களின் இயல்பு வாழ்க்கை வெகுவாக பாதிக்கப்பட்டுள்ளது. வங்கக்கடலில் இலங்கை அருகே உருவான ‘டிட்வா’ புயல், சென்னை மற்றும் வடமாவட்டங்களை நோக்கி நகர்கிறது. இதனால், நான்கு கடலோர மாவட்டங்களில் இன்று அதிகனமழைக்கான ‘ரெட் அலர்ட்’ விடுக்கப்பட்டுள்ளது. டிட்வா புயலால் ராமேஸ்வரம் தீவுப்பகுதியில் நேற்று முன்தினம் நள்ளிரவு முதல் இன்று வரை தொடர்ந்து மழை பெய்து வருகிறது. மேலும், இன்று 55 முதல் 60 கி.மீ வேகத்தில் சூறைக்காற்று வீசி வருகிறது. சூறைக் காற்றால் பாம்பன் ரயில் பாலத்தில் ரயிலை இயக்க தடை விதிக்கப்பட்டுள்ளது. ராமேஸ்வரத்திற்கு ரயில் சேவை 2வது நாளாக ரத்து செய்யப்பட்டுள்ளது.

கடல் சீற்றம் அதிகமாக இருப்பதால் தனுஷ்கோடி, அரிச்சல்முனை பகுதிக்கு சுற்றுலாப் பயணிகள் செல்ல 2வது நாளாக இன்றும் தடை விதிக்கப்பட்டது. பாம்பன் துறைமுகத்தில் தொடர்ந்து மூன்றாவது நாளாக 4ம் எண் புயல் எச்சரிக்கை கூண்டு ஏற்றப்பட்டுள்ளது. ராமேஸ்வரம், பாம்பன் மீனவர்கள் நான்காவது நாளாக கடலுக்கு செல்லாமல் படகுகளை கரை நிறுத்தி வைத்துள்ளனர். இன்று காலை 6 மணி நிலவரப்படி ராமேஸ்வரத்தில் 74 மி.மீ, தங்கச்சிமடம்-74 மி.மீ, பாம்பன்74 மி.மீ என மொத்தம் 222 மி.மீ மழை பதிவாகியுள்ளது. புயல் எச்சரிக்கையால் ராமநாதபுரம் மாவட்டம் முழுவது பள்ளிகளுக்கு விடுமுறை விடப்பட்டுள்ளது. தொடர் மழையால் ராமேஸ்வரத்தில் 2வது நாளாக பொதுமக்களின் இயல்பு வாழ்க்கை முடங்கியுள்ளது.

டெல்டா

டிட்வா புயல் காரணமாக டெல்டா மாவட்டங்களான நாகை, திருவாரூர், தஞ்சை, மயிலாடுதுறை, புதுக்கோட்டை, காரைக்கால், கரூர், பெரம்பலூர், அரியலூர், திருச்சி மற்றும் காரைக்கால் மாவட்டங்களில் பலத்த காற்றுடன் விடிய விடிய மழை பொழிந்தது. பல இடங்களில் இன்று பகலிலும் மழை நீடித்தது. ஏற்கனவே பெய்த மழை காரணமாக டெல்டா மாவட்டங்களில் நடவு செய்து 30 நாட்களே ஆன 1 லட்சம் ஏக்கர் சம்பா, தாளடி பயிர்கள் நீரில் மூழ்கி இருந்தன. மழை ஓய்ந்த நிலையில் தண்ணீரை வடிய வைக்கும் பணியில் விவசாயிகள் ஈடுபட்டனர். இந்நிலையில் மீண்டும் தொடர் மழை பெய்து வருவதால் பயிர்களில் தண்ணீர் சூழ்ந்து வருகிறது. இதனால் மீண்டும் பயிர்கள் மூழ்கும் அபாயம் ஏற்பட்டுள்ளது.

புயல் காரணமாக நாகை, தஞ்சை, புதுகை, மயிலாடுதுறை, காரைக்கால், திருவாரூர் மாவட்ட மீனவர்கள் கடலுக்கு செல்லவில்லை. சுமார் 1.50 லட்சம் மீனவர்கள், மீன்பிடி சார்ந்த தொழிலாளர்கள் 15 நாட்களுக்கும் மேலாக வீடுகளில் முடங்கி உள்ளனர். படகுகள் பாதுகாப்பாக நிறுத்தப்பட்டுள்ளது. டிட்வா புயல் காரணமாக டெல்டா மாவட்டங்களில் அனைத்து பள்ளிகளுக்கும், நாகை, மயிலாடுதுறை, பெரம்பலூர், திருவாரூர், புதுக்கோட்டை மாவட்டங்களில் கல்லூரிகளுக்கும், காரைக்காலில் பள்ளி, கல்லூரிகளுக்கும் இன்று விடுமுறை விடப்பட்டுள்ளது.

மதுரை-சென்னை-பெங்களூரு விமான சேவை இன்று ரத்து

மதுரை விமான நிலையத்தில் இருந்து சென்னைக்கு தினசரி 10 முறை, பெங்களூருக்கு 4 முறை, ஹைதராபாத்திற்கு 3 முறை, டெல்லி, மும்பைக்கு ஒருமுறையும், வெளிநாட்டு சேவையாக துபாய், கொழும்பு, அபுதாபி நகரங்களுக்கும் விமானங்கள் இயக்கப்படுகின்றன. இந்நிலையில், தொடர் மழை, பலத்த காற்று காரணமாக மதுரையிலிருந்து சென்னை, பெங்களூருக்கு விமான சேவையை இன்று முழுவதும் இன்டிகோ விமான நிறுவனம் ரத்து செய்துள்ளது.

தூத்துக்குடி - சென்னை

தூத்துக்குடி மாவட்டத்தில் அதிகபட்சமாக காயல்பட்டினத்தில் 7 செ.மீ மழை பதிவாகியுள்ளது. தொடர் மழை காரணமாக தூத்துக்குடி - சென்னை, தூத்துக்குடி - பெங்களூரு விமான சேவைகள் ரத்து செய்யப்பட்டுள்ளன. தூத்துக்குடி துறைமுகத்தில் தொடர்ந்து 3வது நாளாக 3ம் எண் புயல் எச்சரிக்கை கூண்டு ஏற்றப்பட்டுள்ளது.