புயல் சென்னையை தாக்குமா என்பது குறித்து இன்னும் தெளிவான எச்சரிக்கை தரவில்லை: அமைச்சர் விளக்கம்!

சென்னை: புயல் சென்னையை தாக்குமா என்பது குறித்து இன்னும் தெளிவான எச்சரிக்கை தரவில்லை என புயல் முன்னெச்சரிக்கை தொடர்பாக அமைச்சர் கே.கே.எஸ்.எஸ்.ஆர். ராமச்சந்திரன் விளக்கம் அளித்துள்ளார். இது தொடர்பாக அமைச்சர் தெரிவித்ததாவது; நாகையில் இரு பகுதிகளில் அதிக மழைப்பொழிவு இருந்தது. மழையால் இதுவரை மிகப்பெரிய பாதிப்பு இல்லை. அந்தந்த மாவட்ட ஆட்சியர்களுடன் தொடர்ந்து ஆலோசனை நடத்தி அறிவுறுத்தல்கள் வழங்கப்பட்டு வருகிறது.

புயல் கரையை கடக்கும்வரை வெளியே வரவேண்டாம் என்ற முதலமைச்சரின் அறிவுரையைப் பின்பற்ற வேண்டும். 28 பேரிடர் மீட்புக் குழுக்கள் தயார் நிலையில் உள்ளன. மேலும் 10 குழுக்கள் பிற மாநிலங்களில் இருந்து விமானம் மூலம் வரவைக்க உள்ளோம். விமானப்படை மற்றும் கடலோர காவல் படைக்கும் எச்சரிக்கை அளிக்கப்பட்டுள்ளது. நாளை பாதிப்பை பொறுத்து தேவையான மாவட்டங்களுக்கு கூடுதல் கண்காணிப்பு அலுவலர்களை அனுப்ப நடவடிக்கை எடுக்கப்பட்டுள்ளது.

இதுவரை போக்குவரத்து பாதிப்பு, உயிரிழப்பு இல்லை. 16 கால்நடைகள் உயிரிழந்துள்ளன, 24 குடிசைகள் சேதம் அடைந்துள்ளன. எந்தத் துறை அதிக பாதிப்பு ஏற்பட்டுள்ளது என்பதை பார்த்து, துறை சார்ந்த மூத்த அதிகாரிகளை அனுப்ப நடவடிக்கை எடுக்கப்பட்டுள்ளது. எல்லா மாவட்டத்திலும் 6 ஆயிரத்திற்கும் அதிகமான நிவாரண முகங்கள் தயார் நிலையில் உள்ளன. புயல் சென்னையை தாக்குமா என்பது குறித்து இன்னும் தெளிவான எச்சரிக்கை தரவில்லை. கடைசியாக கிடைத்த தகவல்படி சென்னையை ஒட்டி புயல் செல்லும் என்று கூறப்பட்டுள்ளது. தேசிய, மாநில பேரிடர் மீட்புப் படையினர் தயார் நிலையில் உள்ளனர்.