நாகர்கோவில் சந்திப்பு ரயில் நிலையத்தில் இறுதி கட்டத்தில் புதிய பிளாட்பார பணிகள்

*நடைமேடை அமைக்கும் பணியும் தீவிரம்

நாகர்கோவில் : நாகர்கோவில் சந்திப்பு ரயில் நிலையத்தில் புதிதாக 2 பிளாட்பாரங்கள் அமைக்கும் பணிகள் இறுதி கட்டத்தை எட்டி உள்ளன. 2026 மார்ச் மாதத்துக்குள் பணிகள் முடிவடையும் என எதிர்பார்க்கப்படுகிறது. திருவனந்தபுரம் ரயில்வே கோட்டத்தின் கீழ் உள்ள நாகர்கோவில் சந்திப்பு ரயில் நிலையம், அதிக வருவாய் பெற்று கொடுக்கும் ரயில் நிலையங்களில் முக்கியமான ரயில் நிலையமாகும். ஆண்டுக்கு சுமார் ரூ.80 கோடிக்கு மேல் வருமானம் வருகிறது.

தற்போது இந்த ரயில் நிலையத்தில் தற்போது 1, 1 ஏ, 2, 3 ஆகிய 4 பிளாட்பாரங்கள் உள்ளன. 4 வது மற்றும் 5 வது பிளாட்பாரங்கள் அமைக்கும் பணி கடந்த வருடம் தொடங்கியது. இந்த புதிய பிளாட்பாரங்கள் 625 மீட்டர், அதாவது 26 பெட்டிகள் கொண்ட ரயில்கள் நிறுத்தும் வகையில் அமைக்கப்பட்டு வருகின்றன.

புதிய பிளாட்பாரம் கட்டுமான பணிகள் இறுதி கட்டத்தை எட்டி உள்ளன. மேற்கூரைகள், குடிநீர் தொட்டிகள், தரை தளம் அமைத்தல், அலங்கார கற்கள் பதித்தல், தண்ணீர் இணைப்புகள் கொடுப்பதற்கான பணிகள் நடந்து முடிந்துள்ளன. மின் பாதைகளுக்கான கம்பங்கள் நடப்பட்டு அது தொடர்பான இணைப்புகள் அமைத்தல் பணிகள் நடந்து வருகின்றன. 2026 மார்ச் மாதத்துக்குள் பணிகள் முடிக்கப்பட்டு இரு பிளாட்பாரங்களிலும் ரயில்கள் வரும் என கூறப்படுகிறது.

4, 5 பிளாட்பாரத்துக்கு பயணிகள் செல்ல வசதியாக நடைமேடை அமைப்பதற்கான பணிகளும் நடக்கின்றன. இந்த நடை மேடைக்கு பயணிகள் எளிதில் செல்லும் வகையில், ரயில் நிலையத்தின் வெளியில் இருந்து நடைமேடை அமைக்கப்பட உள்ளது. தற்போது ரயில் நிலையத்துக்கு வெளியே புதிதாக பஸ் நிறுத்தம் அமைக்கப்பட்டுள்ளது. பஸ்கள் வந்து செல்ல வசதியாக கான்கிரீட் தளம் அமைக்கப்பட்டுள்ளது.

பஸ் அல்லது வாகனங்களில் வருபவர்கள், ரயில் நிலையத்துக்கு வெளியே இருந்தவாறே 4, 5 பிளாட்பாரத்துக்கு செல்ல நடைமேடை அமைகிறது. இதற்கான பில்லர்கள் அமைக்கும் பணி ரயில் நிலைய தபால் நிலையத்தின் அருகில் நடந்து வருகிறது. 4, 5 பிளாட்பாரங்கள் செயல்பாட்டுக்கு வந்தால், ரயில்களை உள் வாங்குவதில் பிரச்னை இருக்காது என அதிகாரிகள் கூறி உள்ளனர். இதே போல் கூடுதலாக 3 பிட் லைன்கள் அமைக்கும் பணி முடிவடைந்துள்ளன.

இதன் மூலம் ரயில்களை பராமரிப்பு செய்ய கூடுதல் வசதி உள்ளது. ரயில்களை சுத்தம் செய்வதற்காக தண்ணீரை பெறும் வகையில் புதிதாக நீர் தேக்க தொட்டியும் கட்டப்பட்டுள்ளது. கூடுதல் பிளாட்பாரங்கள் அமைக்கும் பணிகள் முடிவடைந்ததும், அடுத்த கட்டமாக ரயில்வே பணிமனை மேம்பாட்டு பணிகள் தொடங்கும் என அதிகாரிகள் கூறி உள்ளனர்.

புதுப்பிப்பு பணிகளும் தீவிரம்

கடந்த 2023ம் ஆண்டு ஆகஸ்ட் மாதத்தில் நாடு முழுவதும் ரயில் நிலையங்களை நவீனப்படுத்தும் வகையில் அம்ரித் பாரத் திட்டத்தை ஒன்றிய அரசு அறிவித்தது. இதில் குமரி மாவட்டத்தில் நாகர்கோவில் சந்திப்பு ரயில் நிலையமும் தேர்வு செய்யப்பட்டு பணிகள் தொடங்கின. ரூ.25.78 கோடியில் முதற்கட்டமாக மேம்பாட்டு பணிகள் நடந்து வருகின்றன. இந்த மறுசீரமைப்பு பணியில் நாகர்கோவில் சந்திப்பு ரயில் நிலையம் புதிய வடிவமைப்புடன் நவீனப்படுத்தப்பட உள்ளது.

அலங்கார வளைவுகள், நவீன பார்க்கிங் வசதிகள், இயற்கை புல்வெளியுடன் அலங்கார தோட்டத்துடன் கூடிய ரவுண்டானா, செல்பி பாயிண்ட், பஸ் நிறுத்தங்கள், கூடுதல் எஸ்கலேட்டர்கள், லிப்ட் வசதிகள், பயணிகள் தங்கும் அறைகள், ரயில் நிலையத்தில் ஓய்வு அறைகள், தபால் நிலையம், காவல் நிலைய கட்டிங்கள், ஸ்டேஷன் மாஸ்டர் அறைகள், கேண்டீன்கள் புதுப்பிப்பு உள்ளிட்ட மொத்தம் 14 பணிகள் நடந்து வருகின்றன.

இதில் 1வது பிளாட்பார மேற்கூரைகள் புதுப்பிக்கப்பட்டு உள்ளன. பார்க்கிங் அமைக்கப்பட்டுள்ளது. அலங்கார வளைவு அமைக்கும் பணிகளும் வேகமாக நடந்து வருகின்றன. ஸ்டேஷன் மாஸ்டர் அறை புதுப்பிக்கப்பட்டு உள்ளது. இது போன்ற ஒரு சில பணிகள் மட்டும் முடிவடைந்துள்ன.