இயற்கை அழகு!

குழந்தைகளுக்கான குளியல் பொடி!

பெரியவர்களுடன் ஒப்பிடும்போது குழந்தைகளின் சருமம் மிகவும் மென்மையானதும் உணர்திறன் அதிகமுடையதுமாக இருப்பதால், வெயில், வியர்வை, தூசி மற்றும் ஈரப்பதம் போன்றவை எளிதாக சரும பிரச்னைகளை ஏற்படுத்தக்கூடும். குறிப்பாக வெப்பக் கட்டி, அரிப்பு, சரும எரிச்சல், வியர்வை நாற்றம் போன்ற பிரச்னைகள் கோடையில் அதிகமாக காணப்படுகின்றன. இதுபோன்ற நேரங்களில் இயற்கை பொருட்களால் வீட்டிலேயே தயாரிக்கப்படும் குளியல் பொடி, குழந்தைகளின் சருமத்தை பாதுகாக்க உதவும்.

இந்த குளியல் பொடி தயாரிக்க தேவையான பொருட்கள்

பச்சைப்பயறு 500 கிராம்

கடலைப்பருப்பு 200 கிராம்

கஸ்தூரி மஞ்சள் 50 கிராம்

வெட்டிவேர் 50 கிராம்

ஆவாரம் பூ 100 கிராம்

ரோஜா இதழ் (உலர்த்தியது) 1 கப்

வேப்பிலை (நிழலில் உலர்த்தியது) 1கப்.

செய்முறை

முதலில் பச்சைப்பயறு மற்றும் கடலைப்பருப்பை சுத்தமாக கழுவி நன்றாக உலர்த்திக் கொள்ள வேண்டும். ஈரப்பதம் இல்லாமல் இருப்பது மிகவும் முக்கியம். அதன் பிறகு ஆவாரம் பூ, ரோஜா இதழ் மற்றும் வேப்பிலையையும் நிழலில் நன்றாக உலர்த்த வேண்டும். கடும் வெயிலில் உலர்த்தினால் சில இயற்கை மணமும் சத்துக்களும் குறையக்கூடும்.

அனைத்து பொருட்களையும் ஒன்றாக கலந்து மில் அல்லது மிக்ஸியில் மிகவும் மென்மையான பொடியாக அரைத்துக் கொள்ள வேண்டும். பிறகு மெல்லிய சல்லடையில் சலித்து எடுத்தால் குழந்தைகளின் மென்மையான சருமத்திற்கு ஏற்ற மாதிரியான நைசான பொடி கிடைக்கும். இந்தப் பொடியை காற்று புகாத டப்பாவில் சேமித்து வைத்தால் நீண்ட நாட்கள் பயன்படுத்த முடியும்.

குளிப்பாட்டும் போது தேவையான அளவு பொடியை சிறிதளவு தண்ணீர், பால் அல்லது ரோஜா நீர் சேர்த்து பேஸ்ட் போல கலக்க வேண்டும். அதை குழந்தையின் உடலில் மெதுவாக தடவி குளிக்க வைக்கலாம். சருமத்தில் கடுமையாக தேய்க்காமல் மென்மையாக பயன்படுத்துவது முக்கியம்.

இந்த குளியல் பொடியின் முக்கியமான பலன், குழந்தைகளின் சருமத்தை இயற்கையாக சுத்தப்படுத்துவதுதான். பச்சைப்பயறு சருமத்தை மென்மையாக சுத்தம் செய்ய உதவுகிறது.

கடலைப்பருப்பு உடலில் இருக்கும் வியர்வை மற்றும் அதிகப்படியான எண்ணெய் தன்மையை குறைக்க உதவுகிறது. இதனால் கோடை காலத்தில் ஏற்படும் ஒட்டுணர்வு குறையக்கூடும்.

வெட்டிவேர் உடலுக்கு இயற்கையான குளிர்ச்சி தரும் தன்மை கொண்டது. அதனால் கோடை வெப்பத்தால் ஏற்படும் உடல் சூடு மற்றும் எரிச்சலை குறைக்க உதவுகிறது. வேப்பிலை மற்றும் கஸ்தூரி மஞ்சள் சருமத்தை பாதுகாக்கும் இயற்கை தன்மைகள் கொண்டவை. இவை சிறிய அரிப்பு, வெப்பக் கட்டி போன்ற பிரச்னைகள் வராமல் தடுக்க உதவக்கூடும்.

ஆவாரம் பூ மற்றும் ரோஜா இதழ்கள் உடலுக்கு புத்துணர்ச்சி தருவதோடு, இயற்கையான மென்மையான மணத்தையும் தருகின்றன. மேலும் சில குழந்தைகளுக்கு சருமத்தில் ஏற்படும் சிறிய சிவப்பு தடிப்புகளை குறைக்கவும் உதவலாம்.

இன்றைய காலத்தில் சந்தையில் கிடைக்கும் சில குழந்தைகள் சோப்புகள் மற்றும் வாசனை பொருட்களில் அதிக ரசாயன கலவைகள் இருக்கக்கூடும். ஆனால் வீட்டிலேயே தயாரிக்கப்படும் இந்த மாதிரியான குளியல் பொடிகளில் என்னென்ன பொருட்கள் சேர்க்கப்படுகின்றன என்பது பெற்றோருக்குத் தெளிவாக இருக்கும். அதனால் பலர் இயற்கை முறைகளை தேர்வு செய்கிறார்கள்.

ஆனால் எல்லா இயற்கை பொருட்களும் எல்லா குழந்தைகளுக்கும் பொருந்தும் என்று சொல்ல முடியாது. அதனால் முதன்முறையாக பயன்படுத்தும் முன் சிறிதளவு மட்டும் கையில் தடவி ஒவ்வாமை இருக்கிறதா என்பதை கவனிக்க வேண்டும். குழந்தையின் சருமத்தில் தொடர்ந்து அரிப்பு, சிவப்பு தடிப்பு அல்லது எரிச்சல் இருந்தால் மருத்துவரை அணுகுவது பாதுகாப்பானது.

- ஏ. கவின்