இயற்கை அழகு!

கார்குழல் அழகுக்கு கற்றாழை போதும்!

பல்லாயிரக்கணக்கான ஆண்டுகளாக மருத்துவ குணங்களுக்காகவும், அழகுப் பராமரிப்பிற்காகவும் பயன்படுத்தப்பட்டு வரும் ஒரு அற்புதமான தாவரம் கற்றாழை. இதில் வைட்டமின்கள் (A, C, E, B12), தாதுக்கள், அமினோ அமிலங்கள் மற்றும் ஆன்டி-ஆக்ஸிடன்ட்டுகள் நிறைந்துள்ளன.

கூந்தல் மற்றும் சரும பராமரிப்பில் வாரம் ஒருமுறை கற்றாழை அவசியம்.

சருமத்திற்கு கற்றாழை தரும் நன்மைகள்

இயற்கை ஈரப்பதம்: கற்றாழை ஜெல்லில் 95% நீர்ச்சத்து உள்ளது. இது சருமத்தை வறட்சியடையாமல், எப்போதும் ஈரப்பதத்துடனும் பொலிவுடனும் வைத்திருக்க உதவுகிறது. எண்ணெய் பசை சருமம் உள்ளவர்கள் இதைப் பயன்படுத்தினாலும் முகத்தில் கூடுதல் எண்ணெய் வழியாது.

பருக்கள் மற்றும் தழும்புகளை நீக்க: இதில் உள்ள அழற்சி எதிர்ப்பு பண்புகள் (Anti-inflammatory) மற்றும் பாக்டீரியா எதிர்ப்பு பண்புகள் முகப்பருக்களைக் கட்டுப்படுத்துகின்றன. மேலும், பருக்களால் ஏற்படும் வடுக்கள் மற்றும் தழும்புகளை விரைவாக மறையச் செய்கிறது.

சூரிய ஒளியில் இருந்து பாதுகாப்பு (Sunburn Relief): வெயிலில் அதிகம் சுற்றுவதால் ஏற்படும் கதிரியக்கப் பாதிப்புகள் (Sunburn) மற்றும் சருமக் கருமையைக் குணப்படுத்த கற்றாழை உதவுகிறது. இது சருமத்திற்கு குளிர்ச்சியையும், உடனடி நிவாரணத்தையும் தருகிறது.

இளமையைத் தக்கவைக்க (Anti-Aging): கற்றாழை சருமத்தில் உள்ள கொலாஜன் (Collagen) உற்பத்தியை அதிகரித்து, சுருக்கங்கள் மற்றும் கோடுகளைக் குறைக்கிறது. இதனால் சருமம் எப்போதும் இளமையாகக் தோற்றமளிக்கும்.

சருமத்திற்கு பயன்படுத்தும் முறை: கற்றாழை ஜெல்லை எடுத்து நன்றாகக் கழுவி, முகத்தில் நேரடியாகத் தடவி 15-20 நிமிடங்கள் ஊறவைத்து குளிர்ந்த நீரால் கழுவலாம். இதனுடன் சில துளிகள் எலுமிச்சைச் சாறு அல்லது தேன் சேர்த்தும் முகத்தில் தேய்க்கலாம்.

கூந்தலுக்கு கற்றாழை தரும் நன்மைகள்: ஆரோக்கியமான மற்றும் அடர்த்தியான கூந்தல் வளர்ச்சிக்கு கற்றாழை பெரிதும் உதவுகிறது.

முடி வளர்ச்சியைத் தூண்ட: கற்றாழையில் உள்ள புரோட்டியோலிடிக் என்சைம்கள் (Proteolytic enzymes) தலையில் உள்ள இறந்த செல்களை நீக்கி, மயிர்க்கால்களைப் புதுப்பித்து முடி வளர்ச்சியைத் தூண்டுகின்றன.

பொடுகுத் தொல்லைக்கு முற்றுப்புள்ளி: இதன் பூஞ்சை எதிர்ப்பு (Anti-fungal) பண்புகள், தலையில் ஏற்படும் பொடுகு, அரிப்பு மற்றும் வறட்சியைத் தடுக்கிறது.

இயற்கை கண்டிஷனர்: வேதிப்பொருட்கள் கலந்த கண்டிஷனர்களுக்குப் பதிலாக கற்றாழை ஜெல்லைப் பயன்படுத்தலாம். இது முடியை மென்மையாகவும், பளபளப்பாகவும் (Silky and Shiny) மாற்றுகிறது.

முடி உதிர்வைக் குறைக்க: தலையின் பி.எச் (pH) அளவைச் சீராகப் பராமரிப்பதன் மூலம் கூந்தல் வேர்கள் பலமடைந்து, முடி உதிர்வது கணிசமாகக் குறைகிறது.

கூந்தலுக்கு பயன்படுத்தும் முறை: கற்றாழை ஜெல்லுடன் சம அளவு தேங்காய் எண்ணெய் அல்லது விளக்கெண்ணெய் கலந்து, தலையின் வேர்ப் பகுதிகளில் நன்றாக மசாஜ் செய்து, 30 நிமிடங்கள் கழித்து சீயக்காய் அல்லது மென்மையான ஷாம்பு கொண்டு அலசலாம்.

- எஸ்.ஆர்த்தி