மதுரை மாவட்டம் மேலூர் நாகப்பன் சிவல்பட்டியில் களைகட்டிய திருவிழா: மீன்களை பிடிக்க அதிகாலையிலேயே குவிந்த மக்கள்

மதுரை: மதுரை மாவட்டம் மேலூர் அருகே நடைபெற்ற பாரம்பரிய மிக்க மீன்பிடி திருவிழாவில் நாட்டு வகை மீன்களை மக்கள் அள்ளி சென்றனர். மேலூர் அருகே நாகப்பன் சிவல்பட்டியில் 2 ஆண்டுகளுக்கு பிறகு களைகட்டிய மீன்பிடி திருவிழா பாரம்பரியமிக்க மீன்பிடி திருவிழா நடைபெற்றது. இதில் கச்சா, ஊத்தா, கூடை, வலை உள்ளிட்ட மீன்பிடி உபகரணங்களை கொண்டு மக்கள் மீன்பிடித்தனர். 7 முதல் 10 கிலோ எடை கொண்ட மீன்கள் கிடைத்ததால் கிராம மக்கள் மகிழ்ச்சி அடைந்தனர்.

சுற்றுவட்டார பகுதிகளை சேர்ந்த கிராம மக்கள் ஆயிரத்திற்கும் மேற்பட்டோர் அதிகாலை 3 மணிக்கே கண்மாய் கரையில் குவிந்தனர். பின்னர் கிராம பெரியவர்கள் அனுமதி அளித்தவுடன் ஒருசேர கண்மாய்க்குள் இறங்கி ஆர்வமுடன் மீன் பிடித்தனர். மீன்பிடி திருவிழாவில் ஒவ்வொரு நபருக்கும் 7 முதல் 10 கிலோ எடை கொண்ட மீன்கள் சில நிமிடங்களிலேயே கிடைத்தன. இதில் கட்லா, ரோகு, கெளுத்தி, ஜிலேபி மற்றும் அயிரை உள்ளிட்ட நாட்டுவகை மீன்களை பிடித்த பொதுமக்கள் மகிழ்ச்சியுடன் வீடு திரும்பின.