இந்தியன் வங்கி 120வது நிறுவன தின இருவார கொண்டாட்டத்தை முன்னிட்டு MSME கடன் முகாம் மற்றும் CSR செயல்பாடுகளை நடத்தியது

டெல்லி: இந்தியன் வங்கி தனது 120வது நிறுவன தின (Foundation Day) இருவாரக் கொண்டாட்டத்தின் ஒரு பகுதியாக புதுதில்லியில் நடைபெற்ற கடன் சிறப்பு முகாமில் சுமார் ₹500 கோடி மதிப்பிலான MSME கடன்களுக்கு ஒப்புதல் வழங்கியது. இந்நிகழ்வில் 128 பயனாளிகளுக்கு கடன் ஒப்புதல் ஆவணங்களை வங்கியின் நிர்வாக இயக்குநர் மற்றும் தலைமை செயல் அதிகாரி (MD & CEO) பினோத் குமார் வழங்கினார். இது, பிரதமரின் “விக்சித் பாரத்” (Viksit Bharat) இலக்கிற்கு ஏற்ப குறு, சிறு மற்றும் நடுத்தர தொழில் நிறுவனங்களின் வளர்ச்சிக்கு வங்கி அளித்து வரும் உறுதிப்பாட்டை மீண்டும் வலியுறுத்துகிறது.

120வது நிறுவன தின இருவாரக் கொண்டாட்டத்தின் ஒரு பகுதியாக, நாடு முழுவதும் இந்தியன் வங்கி மாபெரும் கடன் மேளாக்கள், நிறுவன சமூகப் பொறுப்பு (CSR) நடவடிக்கைகள், டிஜிட்டல் வங்கி விழிப்புணர்வு நிகழ்ச்சிகள் மற்றும் வாடிக்கையாளர் தொடர்பு முகாம்களை நடத்தி வருகிறது. இந்நிகழ்வுகளின் மூலம் ₹1,250 கோடி மதிப்பிலான கடன் விண்ணப்பங்கள் திரட்டப்பட்டுள்ளன. இது எதிர்கால வணிக வளர்ச்சிக்கான வலுவான அடித்தளத்தை பிரதிபலிக்கிறது. சமூகப் பொறுப்பின் மீதான தனது அர்ப்பணிப்பை மேலும் வலுப்படுத்தும் வகையில், இந்தியன் வங்கி நைனா ஆக்டிவிட்டி எஜுகேஷன் சொசைட்டி, டெல்லி நிறுவனத்திற்கு சக்கர நாற்காலிகளையும், சக்ஷி (Sakshi) அரசு சாரா அமைப்பிற்கு தையல் இயந்திரங்களையும் வழங்கியது.

இதன் மூலம் மாற்றுத்திறனாளிகளின் இயக்க வசதி, வாழ்வாதார மேம்பாடு மற்றும் சமூக முன்னேற்றம் ஊக்குவிக்கப்பட்டது. இந்நிகழ்வில், MSME வாடிக்கையாளர்களுக்கு ஒருங்கிணைந்த மற்றும் எளிமையான வங்கி சேவையை வழங்கும் நோக்கில் உருவாக்கப்பட்ட “யூனிஃபைட் MSME போர்டல்” (Unified MSME Portal) அறிமுகப்படுத்தப்பட்டது. இது தொழில்நுட்பம் சார்ந்த வங்கி சேவை வழங்கலில் இந்தியன் வங்கியின் உறுதிப்பாட்டை மேலும் வலுப்படுத்துகிறது. இந்நிகழ்வில் பேசிய MD & CEO பினோத் குமார் கூறியதாவது, “இந்தியன் வங்கியின் 120 ஆண்டுகால பாரம்பரியத்தை கொண்டாடும் இந்த வேளையில், வாடிக்கையாளரை மையமாகக் கொண்ட, தொழில்நுட்பம் வழிநடத்தும் வங்கி சேவைகள் மூலம் அனைவரையும் உள்ளடக்கிய வளர்ச்சியை முன்னெடுப்பதில் நாங்கள் உறுதியாக இருக்கிறோம்.

2032ஆம் ஆண்டுக்குள் ₹35 லட்சம் கோடி வணிக இலக்கை அடையும் தெளிவான நோக்கத்துடன், நிதி உட்சேர்க்கையை வலுப்படுத்தவும், MSME நிறுவனங்கள் மற்றும் தொழில் முனைவோர்களை மேம்படுத்தவும், இந்தியாவின் வளர்ச்சிப் பயணத்திற்கு துணைபுரியும் எளிமையான டிஜிட்டல் வங்கி தீர்வுகளை தொடர்ந்து வழங்கவும் செயல்படுவோம்.” 120வது நிறுவன தின இருவாரக் கொண்டாட்டத்தின் போது, வங்கி தொடர்ந்து வாடிக்கையாளர் ஈடுபாட்டை அதிகரித்தல், அனைவரையும் உள்ளடக்கிய வளர்ச்சியை ஊக்குவித்தல் மற்றும் டிஜிட்டல் மாற்றத்தை விரைவுபடுத்துதல் ஆகியவற்றில் கவனம் செலுத்தும். இது, நிதி உட்சேர்க்கை மற்றும் டிஜிட்டல் அதிகாரமளிப்பு கொண்ட இந்தியாவை உருவாக்கும் வங்கியின் உறுதிப்பாட்டை பிரதிபலிக்கிறது.

இந்நிகழ்வில் தனிநபர் கடன் மற்றும் MSME பிரிவின் தலைமை பொது மேலாளர் (CGM) சுஜய் மல்லிக், டெல்லி களப் பொது மேலாளர் (FGM) அஜய் அகர்வால் மற்றும் டெல்லி மத்திய மண்டல மேலாளர் (ZM) பவன் குமார் பைத்யா ஆகியோரும் கலந்து கொண்டனர்.