ஐசிசி பேட்டர்களுக்கான தரவரிசை பட்டியல் வெளியீடு: ஆதிக்கம் செலுத்தும் இந்தியர்கள்!

ஐசிசி டி20 பேட்ஸ்மேன்களுக்கான தரவரிசை பட்டியலில் -877 புள்ளிகளுடன் இந்திய அணியின் அதிரடி தொடக்க ஆட்டக்காரர் அபிஷேக் சர்மா முதலிடத்தில் நீடிக்கிறார். ஐசிசி மகளிருக்கான ஒருநாள் பேட்டர்களின் தரவரிசையில் இந்திய வீராங்கனை ஸ்மிரிதி மந்தனா முதலிடத்திற்கு முன்னேறினார்.

ஐசிசி டி20 உலகக்கோப்பை 2026 தொடர் விறுவிறுப்பாக நடைபெற்று வரும் நிலையில், சர்வதேச கிரிக்கெட் கவுன்சில் (ICC) புதிய டி20 பேட்டிங் தரவரிசைப் பட்டியலை வெளியிட்டுள்ளது. இந்த புதிய பட்டியலில் இந்திய அணியின் இளம் அதிரடி வீரர் அபிஷேக் சர்மா 877 புள்ளிகளுடன் தொடர்ந்து முதலிடத்தைத் தக்கவைத்துக் கொண்டுள்ளார்.

முந்தைய போட்டிகளை விட அவரது ரேட்டிங் புள்ளிகள் தற்போது சற்று குறைந்திருந்தாலும், முதலிடத்தை தக்கவைத்துள்ளார். இங்கிலாந்து வீரர் பில் சால்ட் 815 புள்ளிகளுடன் இரண்டாவது இடத்தில் உள்ளார். இருவருக்கும் இடையிலான வித்தியாசம் வெறும் 62 புள்ளிகள் மட்டுமே.

இங்கிலாந்து அணி உலகக்கோப்பை அரையிறுதி போட்டிக்கு முன்னேறியுள்ளதால், பில் சால்ட்டிற்கு இன்னும் இரண்டு போட்டிகள் கைவசம் உள்ளன. அதில் அவர் சிறப்பாக விளையாடும் பட்சத்தில், முதலிடத்தைப் பிடிப்பதற்கான வாய்ப்புகள் பிரகாசமாக உள்ளன. அபிஷேக் சர்மா சிறப்பாக விளையாடும் பட்சத்தில் அவர் முதலிடத்தில் தொடர்வார்.

இவர்களைத் தொடர்ந்து பாகிஸ்தான் வீரர் சாஹிப்ஸாதா ஃபர்ஹான் 810 புள்ளிகளுடன் மூன்றாவது இடத்தில் உள்ளார். நான்காவது இடத்தில் இலங்கை வீரர் பதும் நிசங்கா உள்ளார். அதே சமயம், இஷான் கிஷன்(742), சூர்யகுமார் யாதவ்(740), திலக் வர்மா(730] ஆகிய இந்திய வீரர்கள் 5, 6, 7 ஆகிய இடங்களில் உள்ளனர்.

இதே போல் ஐசிசி மகளிர் ஒருநாள் போட்டிகளுக்கான பேட்டர்களின் தரவரிசைப் பட்டியலில், இந்திய அணி வீராங்கனை ஸ்மிருதி மந்தனா மீண்டும் முதலிடத்தைப் பிடித்து அசத்தியுள்ளார். சமீபத்தில் ஆஸ்திரேலியாவுக்கு எதிரான ஒருநாள் தொடரில் சிறப்பான ஆட்டத்தை வெளிப்படுத்திய மந்தனா, 790 ரேட்டிங் புள்ளிகளுடன் தென் ஆப்பிரிக்காவின் லாரா வோல்வார்ட்டை பின்னுக்குத் தள்ளி இந்த முதலிடத்தை பிடித்தார்.

ஸ்மிருதி மந்தனாவைத் தொடர்ந்து, தென் ஆப்பிரிக்காவின் லாரா வோல்வார்ட் 782 புள்ளிகளுடன் இரண்டாம் இடத்திலும், ஆஸ்திரேலியாவின் பெத் மூனி மூன்றாம் இடத்திலும் உள்ளனர். சமீபத்தில் சர்வதேச கிரிக்கெட்டில் இருந்து ஓய்வு பெற்ற ஆஸ்திரேலியாவின் அலிசா ஹீலி 744 புள்ளிகளுடன் நான்காவது இடத்திலும், ஆஷ்லி கார்ட்னர் ஐந்தாவது இடத்திலும் நீடிக்கின்றனர்.

இந்திய அணியைப் பொறுத்தவரை, கேப்டன் ஹர்மன்பிரீத் கவுர் ஆஸ்திரேலியத் தொடரில் தொடர்ச்சியாக 53, 54 மற்றும் 25 ரன்களைக் குவித்ததன் மூலம் நான்கு இடங்கள் முன்னேறி, தற்போது 652 புள்ளிகளுடன் ஒன்பதாவது இடத்தைப் பிடித்துள்ளார்.