டிட்வா புயல் காரணமாக பலத்த காற்று: திருவள்ளூர், காஞ்சி, செங்கல்பட்டில் சாரல் மழை

திருவள்ளூர்: டிட்வா புயல் காரணமாக பலத்த காற்று வீசி வருகிறது. இதனால் திருவள்ளூர், காஞ்சிபுரம், செங்கல்பட்டு மாவட்டங்களில் சாரல் மழை பெய்து வருகிறது. அதே நேரத்தில் சில இடங்களில் அணைகளுக்கு நீர்வரத்து அதிகரித்துள்ளதால் அணைகளுக்கு செல்வது, செல்பி எடுப்பது, வேடிக்கை பார்க்க செல்ல வேண்டாம் என எச்சரிக்கை விடுக்கப்பட்டுள்ளது. இலங்கை அருகே உருவாகியுள்ள டிட்வா புயல் வடக்கு- வட மேற்கு திசையில் தமிழகம் நோக்கி நகர்ந்து வருகிறது. நாளை அதிகாலையில் தென்மேற்கு மற்றும் அதை ஒட்டிய மத்திய மேற்கு வங்கக் கடல் பகுதிகளில் சென்னை, திருவள்ளூர், காஞ்சிபுரம் உள்ளிட்ட வட தமிழகம்-புதுச்சேரி மற்றும் அதை ஒட்டிய தெற்கு ஆந்திர கடலோர பகுதிகளுக்கு அப்பால் கரை கடக்கும் என்றும் எதிர்பார்க்கப்படுகிறது என சென்னை வானிலை ஆய்வு மையம் தெரிவித்துள்ளது.

இந்த புயலையொட்டி திருவள்ளூர், காஞ்சிபுரம், செங்கல்பட்டு மாவட்டத்தில் பரவலாக சாரல் மழை பெய்து வருகிறது. அதுபற்றிய விவரம் வருமாறு: திருவள்ளூர்: திருவள்ளூர் மாவட்டத்தில் விட்டு விட்டு பெய்து வரும் மழை காரணமாக நீர்நிலைகள் நிரம்பி வருகிறது. பூண்டி சத்தியமூர்த்தி சாகர் நீர்த்தேக்கத்தின் 2739 மில்லியன் கன அடி தண்ணீர் இருப்பு உள்ளது. அணையின் பாதுகாப்பு கருதி வினாடிக்கு 2,500 கன அடி வீதம் உபரிநீர் வெளியேற்றப்பட்டு வருகிறது. செம்பரம்பாக்கம் ஏரியின் மொத்த கொள்ளளவான 3645 மில்லியன் கன அடியில் தற்போது தண்ணீர் இருப்பு 304 மில்லியன் கன அடியாக உள்ளது. ஏரிக்கு நீர் வரத்து வினாடிக்கு 100 கன அடியாக உள்ளது. வினாடிக்கு 1200 கனஅடி வீதம் உபரி நீர் வெளியேற்றப்படுகிறது. புழல் ஏரியின் மொத்த கொள்ளளவான 3300 மில்லியன் கன அடியில் தண்ணீர் இருப்பு 2786 மில்லியன் கன அடியாக உள்ளது.

ஏரிக்கு நீர்வரத்து வினாடிக்கு 446 கன அடியாக உள்ளது. சென்னை மக்களின் குடிநீருக்காக 184 கன அடி வீதம் தண்ணீர் திறக்கப்படுகிறது. பாதுகாப்பு கருதி ஏரியிலிருந்து இன்று உபரிநீர் திறப்பு வினாடிக்கு 1000 கன அடியாக அதிகரிக்கப்பட்டுள்ளது. வெளியேற்றப்படும் உபரிநீர், செங்குன்றம் சாமியார் மடம், வடகரை, பாபா நகர், தண்டல்கழனி, புழல் திருநீலகண்ட நகர், தமிழன் நகர், காஞ்சி அருள் நகர், மேக்ரோ மார்வெல் நகர், வடபெரும்பாக்கம், கொசப்பூர், மணலி, சடையங்குப்பம் உள்பட 10க்கும் மேற்பட்ட கிராமங்கள் வழியே செல்வதால், கால்வாய் ஓரங்களில் வசிக்கும் மக்கள் பாதுகாப்பான இடங்களுக்கு செல்ல அறிவுறுத்தப்படுகிறது. மேலும், இப்பகுதியில் வேடிக்கை பார்ப்பது, செல்பி எடுப்பது, ரீல்ஸ் பதிவிடுவது, குளிப்பது, துணி துவைப்பது தூண்டில் மற்றும் வலைகள் மூலம் மீன்பிடிப்பது போன்ற செயல்களில் ஈடுபட வேண்டாம் என்று கலெக்டர் மு.பிரதாப் அறிவுறுத்தியுள்ளார்.

சோழவரம் ஏரியில் தண்ணீர் இருப்பு 541 மில்லியன் கன அடியாக உள்ளது. 45 கன அடி நீர் வந்து கொண்டிருக்கிறது. குடிநீர் தேவைக்காக 400 கன அடி வீதம் அனுப்பப்பட்டு வருகிறது. கண்ணன்கோட்டை ஏரியில் தண்ணீர் இருப்பு 436 மில்லியன் கன அடியாக உள்ளது. குடிநீருக்காக வினாடிக்கு 2 கன அடி வீதம் தண்ணீர் திறக்கப்படுகிறது. செங்கல்பட்டு: செங்கல்பட்டு நகரில் நேற்றிரவு முதல் விட்டு விட்டு சாரல் மழை பெய்து வருகிறது. மாவட்டத்தில் ரெட் அலர்ட் விடுக்கப்பட்டுள்ளதால் மாவட்ட நிர்வாகம் பாதுகாப்பு ஏற்பாடுகளை மேற்கொண்டுள்ளது. 54 இடங்களில் சமூக சமையலறைகள் தயார் நிலையில் உள்ளன. மின்வாரியம் மூலம் மின்கம்பங்கள் மற்றும் மின்சார உபகரணங்கள் கையிருப்பில் வைக்கப்பட்டுள்ளன. 287 வெள்ள நிவாரண முகாம்கள் 20 புயல் பாதுகாப்பு மையங்கள், கானாத்தூர், நெம்மேலி, பட்டிபுலம் ஆகிய இடங்களில் 3 பல்நோக்கு புயல் பாதுகாப்பு மையங்களும் செயல்பாட்டில் உள்ளன.

முடிச்சூர், கூடுவாஞ்சேரியில் 55 பேர் அடங்கிய மாநில பேரிடர் மீட்பு குழுவினர் மற்றும் மணல் மூட்டைகள் தயார் நிலையில் உள்ளது. வெள்ளம் மிக அதிகளவில் பாதிக்கக்கூடிய பகுதிகளாக 71 இடங்கள் கண்டறியப்பட்டுள்ளது. இந்த பகுதிகளுக்கு உணவு மற்றும் அத்தியாவசிய தேவைகள் தயாராக உள்ளது. படகுகள், இயந்திரப்படகுகள், மர அறுவை இயந்திங்கள், நீர் இரைக்கும் இயந்திரங்கள், ஜேசிபி, கிரேன், மின்னாக்கிகள், பரிசல், டிராக்டர், ஆகியவை தயார் நிலையில் உள்ளன. அரசு மருத்துவமனை 24 மணி நேரமும் இருக்குமாறும், மருந்துகள் மருத்துவ உபகரணங்கள் கையிருப்பிலும் இருக்குமாறு அறிவுறுத்தப்பட்டுள்ளது. ஜெனரேட்டர்கள் தயார் நிலையில் உள்ளது. கலெக்டர் அலுவலகத்தில் அவசரகால கட்டுப்பாட்டு அறை 24 மணி நேரம் என்ற அடிப்படையில் இயங்கிவருகிறது. மேலும் கட்டணமில்லா தொலைபேசி எண் 1077, தொலைபேசி 044-27427412, 27427414, வாட்ஸ் ஆப் 9444272345 எண்கள் அறிவிக்கப்பட்டுள்ளது என்று கலெக்டர் தி.சினேகா தெரிவித்துள்ளார்.

காஞ்சிபுரம்: காஞ்சிபுரம் மாவட்டத்திற்கு ஆரஞ்ச் அலர்ட் விடுக்கப்பட்டுள்ளது. இருப்பினும் காஞ்சிபுரம், வாலாஜாபாத், ஸ்ரீபெரும்புதூர், உத்திரமேரூர், குன்றத்தூர் போன்ற பகுதிகளில் சில இடங்களில் நேற்றிரவு சாரல் மழை பெய்தது. இன்று காலையில் வானம் மேகமூட்டத்துடன் காணப்படுகிறது. மாவட்டத்தில் 381 ஏரிகளில் சில ஏரிகளுக்கு மட்டும் நீர்வரத்து உள்ளது. முக்கியமாக தாமல் ஏரி நிரம்பி உபரநீர் வெளியேறுகிறது. இந்த புயல் காரணமாக பரவலாக மழை பெய்தால் ஏரிகள் நிரம்பும் என விவசாயிகள் எதிர்பார்க்கின்றனர். மேலும் உத்திரமேரூர், கீழ்கதிர்பூர், மேல்கதிர்பூர், கீழம்பி மற்றும் வாலாஜாபாத், அவலூர், கம்மராஜபுரம், பிள்ளைபாக்கம் உள்ளிட்ட பல கிராமங்களில் விவசாய பணிகள் தொடங்கியுள்ளது. விவசாயிகள் மகிழ்ச்சியில் உள்ளனர்.

வெள்ள அபாய எச்சரிக்கை

பூண்டி நீர்த்தேக்கத்திலிருந்து உபரி நீர் வெளியேறும் கொசஸ்தலையாறு செல்லும் கிராமங்களான நம்பாக்கம், கிருஷ்ணாபுரம், ஆட்ரம்பாக்கம், ஒதப்பை, நெய்வேலி, எறையூர், பீமன்தோப்பு, கொரக்கந்தண்டலம், சோமதேவன்பட்டு, மெய்யூர், வெள்ளியூர், தாமரைப்பாக்கம். திருக்கண்டலம், ஆத்தூர், பண்டிக்காவனுர், ஜெகநாதபுரம், புதுகுப்பம், கன்னிப்பாளையம், வன்னிப்பாக்கம், அசூவன்பாளையம், மடியூர், சீமாவரம், வெள்ளிவாயல்சாவடி, நாப்பாளையம், இடையான்சாவடி, மணலி, மணலி புதுநகர், சடையான்குப்பம், எண்ணுர் ஆகிய பகுதிகளில் கொசஸ்தலை ஆற்றின் இருபுறமும் உள்ள தாழ்வான பகுதிகளில் வசிப்பவர்கள் பாதுகாப்பாக இருக்குமாறு கலெக்டர் மு.பிரதாப் எச்சரிக்கை விடுத்துள்ளார்.