தங்கம் விலை 2வது நாளாக அதிரடி மாற்றம் பவுனுக்கு ரூ.7,600 குறைந்தது: ஒரே நாளில் வெள்ளி கிலோவுக்கு 85,000 ரூபாய் சரிந்தது

சென்னை: தங்கம் விலை நேற்று 2வது நாளாக பவுனுக்கு ரூ.7600 குறைந்தது. அதே நேரத்தில் வெள்ளி காலை, மாலை என ஒரே நாளில் கிலோவுக்கு ரூ.85 ஆயிரம் சரிந்தது. நேற்று முன்தினம் காலையில் தங்கம் விலை பவுனுக்கு ரூ.4,800, மாலையில் ரூ.2,800 என குறைந்தது. இதன் மூலம் தங்கம் விலை ஒரே நாளில் பவுனுக்கு ரூ.7,600 குறைந்து, ஒரு பவுன் ரூ.1 லட்சத்து 26 ஆயிரத்து 800க்கு விற்பனையானது. இதேபோல வெள்ளியும் காலையில் கிலோவுக்கு ரூ.10 ஆயிரமும், மாலையில் கிலோவுக்கு ரூ.10 ஆயிரம் என ஒரே நாளில் கிலோவுக்கு ரூ.20 ஆயிரம் குறைந்து பார் வெள்ளி ரூ.4 லட்சத்து 5 ஆயிரத்துக்கு விற்பனையானது.

நேற்று 2வது நாளாக தங்கம் விலை சரிவை சந்தித்தது. நேற்று காலையில் தங்கம் விலை கிராமுக்கு ரூ.950 குறைந்து, ஒரு கிராம் ரூ.14,900க்கும், பவுனுக்கு ரூ.7,600 குறைந்து ஒரு பவுன் 1 லட்சத்து 19 ஆயிரத்து 200க்கும் விற்பனையானது. இதன் மூலம் தொடர்ச்சியாக 2 நாட்களில் மட்டும் தங்கம் விலை பவுனுக்கு ரூ.15,200 குறைந்தது. இதே போல வெள்ளியும் நேற்று காலையில் கிடுகிடுவென சரிவை சந்தித்தது. அதாவது யாரும் எதிர்பார்க்காத வகையில் காலையில் வெள்ளி விலை கிராமுக்கு ரூ.55 குறைந்து ஒரு கிராம் ரூ.350க்கும், கிலோவுக்கு ரூ.55 ஆயிரம் குறைந்து, பார் வெள்ளி ரூ.3.50 லட்சத்துக்கும் விற்பனையானது.

மாலையில் வெள்ளி விலையில் மேலும் மாற்றம் காணப்பட்டது. மாலையில் வெள்ளி விலை கிராமுக்கு ரூ.30 குறைந்து ஒரு கிராம் ரூ.320க்கும், கிலோவுக்கு ரூ.30 ஆயிரம் குறைந்து, பார் வெள்ளி ரூ.3.20 லட்சத்துக்கும் விற்பனையானது. இதன் மூலம் வெள்ளி விலை நேற்று காலை, மாலை என ஒரே நாளில் கிலோவுக்கு ரூ.85 ஆயிரம் குறைந்தது. அதே நேரத்தில் தங்கம் விலையில் மாலையில் எந்தவித மாற்றமும் ஏற்படவில்லை. வழக்கமாக தங்கம் விலை தான் உயரும். வெள்ளி விலை என்பது அந்த அளவுக்கு உயராது. ஆனால், கடந்த 2 மாதமாக யாரும் எதிர்பார்க்காத வகையில் தங்கத்துடன் போட்டிப் போட்டு வெள்ளி விலை உயர்ந்து அதிர்ச்சியை ஏற்படுத்தியது குறிப்பிடத்தக்கது.