ஈரோட்டில் மாநகராட்சி கூட்டம் மக்கள் அடிப்படை பிரச்னைகளுக்கு கூடுதல் கவனம் செலுத்த வேண்டும்

*அதிகாரிகளுக்கு, கவுன்சிலர்கள் வலியுறுத்தல்

ஈரோடு : மக்களின் அடிப்படை பிரச்னைகளுக்கு அதிகாரிகள் கூடுதல் கவனம் செலுத்த வேண்டும் என ஈரோடு மாநகராட்சி கூட்டத்தில் கவுன்சிலர்கள் வலியுறுத்தினர்.

ஈரோடு மாநகராட்சி கூட்டரங்கில், மாமன்றத்தின் சாதாரண கூட்டம் நேற்று மேயர் நாகரத்தினம் தலைமையில் நடந்தது. துணை மேயர் செல்வராஜ், ஆணையர் அர்பித் ஜெயின் ஆகியோர் முன்னிலை வகித்தனர். இந்த கூட்டத்தில் 25 தீர்மானங்கள் நிறைவேற்றப்பட்டன. தொடர்ந்து, மாநகராட்சி நியமன உறுப்பினர் செந்தில்குமாருக்கு மாநகராட்சி கவுன்சிலர்கள் வாழ்த்து தெரிவித்தனர்.

கூட்டத்தில், கவுன்சிலர்கள் தங்களது பகுதிகளில் உள்ள பிரச்னைகள், கோரிக்கைகள் குறித்து பேசியதாவது:ஈரோடு மாநகராட்சியில் ஊராட்சிக்கோட்டை குடிநீர் திட்டத்தின் மூலம் குடிநீர் விநியோகத்தை முறைப்படுத்த வீடுகளுக்கு நீர்அழுத்த கட்டுப்பாட்டு கருவி பொருத்தப்பட்டுள்ளது. இத்திட்டத்தின் மூலம் ஒரு நபருக்கு தினமும் 132 லிட்டர் தண்ணீர் விநியோகிக்கப்படும் என தெரிவித்திருந்த நிலையில் பல பகுதிகளில் 3 நாட்களுக்கு ஒருமுறை 1 மணி நேரம் மட்டுமே தண்ணீர் விநியோகம் செய்யப்படுகிறது. இப்பகுதிகளுக்கு கூடுதல் நேரம் குடிநீர் விநியோகம் செய்ய நடவடிக்கை எடுக்க வேண்டும்.

இதுபோல், மாநகராட்சியில் விரிவாக்கம் செய்யப்பட்ட பெரும்பாலான பகுதிகளுக்கு ஊராட்சிக்கோட்டை தண்ணீர் இதுவரை விநியோகிக்கப்படவில்லை. மேலும், பெரும்பாலான இடங்களில் குடிநீர் குழாய்கள் பழுதடைந்து காணப்படுகிறது. இதனை சீரமைத்து, ஊராட்சிக்கோட்டை குடிநீர் கிடைக்க நடவடிக்கை எடுக்க வேண்டும். ஈரோடு கனி ஜவுளிச் சந்தையில் அனுமதி இல்லாமல் வைக்கப்பட்டுள்ள 10 கடைகளை உடனடியாக அகற்ற வேண்டும். இந்த வளாகத்தில் இப்போது 50 சதவீத கடைகள் மட்டுமே வாடகைக்கு விடப்பட்டுள்ளன. வாடகைக்கு இருப்பவர்களும் மாதந்தோறும் சிலர் கடைகளை காலி செய்து வருகின்றனர்.

இதனால், வாடகையை குறைத்து, கனி மார்க்கெட், காளைமாடு சிலை அமைக்கப்பட்டுள்ள வணிக வளாக கடைகளை வாடகைக்கு விட வேண்டும். நினைவு சின்னங்கள் போல் உள்ள மாநகராட்சி வணிக வளாகங்களை வாடகைக்கு விட நடவடிக்கை எடுக்க வேண்டும். மறைந்த ஈவிகேஎஸ் இளங்கோவன் எம்எல்ஏவாக இருந்தபோது நிதி ஒதுக்கீடு செய்யப்பட்டு முத்துக்குமாரசாமி வீதி பூங்கா புனரமைக்கப்பட்டு, இதுவரை திறக்கப்படாமல் புதர்மண்டி கிடக்கிறது.

ஜீவானந்தம் சாலையில் கழிவுநீர் கால்வாய் ஒருபுறம் மட்டும் அமைக்கப்பட்டு மறுபுறம் அமைக்கப்படாததால் கழிவுநீர் தேங்கி நிற்கிறது. இதனால் மறுபுறமும் கழிவுநீர் கால்வாய் அமைத்துத்தர வேண்டும். பாதாள சாக்கடை திட்டத்தில் போடப்பட்ட மூடிகளை சீரமைக்கவும், அடைப்புகளை உடனடியாக எடுக்கவும், சீரமைப்பு பணிக்காக பள்ளம் தோண்டும்போது கவுன்சிலர்களுக்கு முன்கூட்டியே தெரிவிக்க வேண்டும். வார்டுகளின் மக்கள் தொகையை மட்டும் கணக்கில் கொள்ளாமல் பரப்பளவைக் கவனத்தில் கொண்டு கூடுதல் எண்ணிக்கையில் தூய்மை பணியாளர்களை நியமிக்க வேண்டும்.

வாகனங்கள் பற்றாக்குறை: இதுபோல் தூய்மை பணியில் குப்பை அகற்றும் லாரிகள், ஆட்டோக்கள் சில வார்டுகளுக்கு 15 நாட்களுக்கு மேல்வரவில்லை. வாகனங்கள் பற்றாக்குறையாக உள்ளது. இதற்கு மாநகராட்சியில் உள்ள வாகனங்கள் பெரும்பாலானவை ஒரே நேரத்தில் எப்சிக்கு (தகுதி சான்று) சென்றுள்ளதால் வாகனங்கள் வரவில்லை என அதிகாரிகள் கூறுகின்றனர். இதனால் பல வார்டுகளில் குப்பைகள் சாலையோரம் கொட்டப்பட்டுள்ளது.

விரைந்து எப்சிக்கு சென்ற வாகனங்களை பணிக்கு கொண்டு வர வேண்டும். மாநகராட்சிப் பகுதிகளில் பெரும்பாலான இடங்களில் தெருவிளக்குகள் இல்லை. இதனால் வாகன ஓட்டிகள், பொதுமக்கள் கடும் அவதியடைந்து வருகின்றனர். எனவே, மாநகராட்சியில் உரிய ஆய்வு மேற்கொண்டு, தேவையான இடங்களில் தெருவிளக்குகள் அமைக்க வேண்டும்.

சாலைகள் பேட்ஜ் ஓர்க் விரைந்து செய்து, அனைத்து சாலைகளிலும் உள்ள வேகத்தடைகளிலும் வர்ணம் பூச வேண்டும். பொதுமக்களின் பிரச்னைகளில் அதிகாரிகள் கூடுதல் கவனம் செலுத்த வேண்டும். தூய்மைப் பணியாளர்களை கருணை அடிப்படையில் நியமிக்கும் விதிமுறைகளை மாநகராட்சி அதிகாரிகள் முறையாக பின்பற்ற வேண்டும்.

மாநகராட்சி தூய்மை பணியாளர்களுக்கு காலை உணவு வழங்கும் திட்டத்திற்கு ஒரு வேளைக்கு ஒரு நபருக்கு ரூ.41 செலவு செய்யப்படும் என அறிவிக்கப்பட்டுள்ளது. பள்ளிக் குழந்தைகளுக்கு வழங்கப்படும் காலை உணவுக்கு ரூ.11 மட்டுமே செலவு செய்யப்படும் நிலையில், தூய்மை பணியாளர்களுக்கு காலை உணவுக்கு மிக அதிகமாக தொகை ஒதுக்கீடு செய்துள்ளது ஏன் என்பதை விளக்க வேண்டும்.இவ்வாறு கவுன்சிலர்கள் பேசினர்.

குடிநீர் பிரச்னைக்கு தீர்வு:மாநகராட்சி ஆணையர் அர்பித் ஜெயின் மற்றும் துறை சார்ந்த அதிகாரிகள் பதிலளித்து பேசியதாவது:ஊராட்சிக்கோட்டை குடிநீர் திட்டத்தில் சிக்கல் இருப்பது உண்மை தான். ஊராட்சிக்கோட்டை குடிநீர் திட்டத்தின் மூலம் மாநகராட்சியில் தினசரி 91 எம்எல்டி முதல் 93 எம்எல்டி வரை குடிநீர் விநியோகம் செய்யப்பட்டு வருகிறது. பெரும்பாலான பகுதிகளில் மேடும், பள்ளமுமாக இருப்பதால், குடிநீர் விநியோகம் செய்வதில் சிக்கல் இருக்கிறது.

இதனால், அனைவருக்கும் குடிநீர் கிடைப்பதற்காக, வால்வு பொருத்தப்பட்டு வரப்படுகிறது. ஊராட்சிக்கோட்டை குடிநீர் திட்டத்தில் நிலவி வரும் சிக்கல்கள் இன்னும் ஒரு மாதத்தில் சீர் செய்யப்படும். தெருவிளக்குகள் கொள்முதல் செய்ய ரூ.20 லட்சம் நிதி ஒதுக்கப்பட்டுள்ளது. டிசம்பர் மாதத்திற்குள் தெருவிளக்குகள் பொருத்தப்படும்.

60 வார்டுகளில் பணியாற்றும் தூய்மைப் பணியாளர்களுக்கு 44 இடங்களில் காலை உணவு வ|ழங்கப்படுகிறது. போக்குவரத்து செலவு, உணவின் அளவு ஆகியவற்றை கணக்கில் கொண்டு மாநில அளவில் செலவு நிர்ணயிக்கப்பட்டுள்ளது. ஒப்பந்ததாரர் முறையாக உணவு விநியோகம் செய்யவில்லை எனில் ஓராண்டுக்குப் பிறகு ஒப்பந்தம் ரத்து செய்யப்படும்.

கனி மார்க்கெட் வணிக வளாகத்தில் அனுமதி பெறாமல் வைக்கப்பட்டுள்ள கடைகளை அகற்றிக்கொள்ள 15 நாள் அவகாசம் அளித்து அறிக்கை அளிக்கப்பட்டுள்ளது. இந்த காலக்கெடுவிற்குள் கடைகளை அகற்றாவிட்டால் மாநகராட்சி மூலம் கடைகள் அகற்றப்படும்.இவ்வாறு பதில் அளித்தனர்.இந்த கூட்டத்தில் மாநகராட்சி துணை ஆணையர் தனலட்சுமி, தலைமை பொறியாளர் முருகேசன், நகர்நல அலுவலர் டாக்டர் கார்த்திகேயன், உதவி ஆணையர்கள் உட்பட பலர் கலந்து கொண்டனர்.

அதிமுக கவுன்சிலர்கள் வெளிநடப்பு

மாமன்ற கூட்டத்தில் அதிமுக கவுன்சிலர்கள், சொத்து வரியை குறைக்க அனைத்து கவுன்சிலர்களும் சேர்ந்து நிறைவேற்றி அனுப்பப்பட்ட தீர்மானத்திற்கு 8 மாதங்களாகியும் உரிய நவடிக்கை எடுக்கவில்லை. இந்த வரியை குறைப்பதற்கான நடவடிக்கையை உடனடியாக எடுக்க வேண்டும். வீடுகளுக்கு பாதாள சாக்கடை இணைப்புக்கான கட்டணத்தை மாநகராட்சி வெளிப்படையாக அறிவித்து, இணைப்பு அளிக்கும் ஒப்பந்ததாரர் பெயரையும் தெரிவிக்க வேண்டும் என்பன உள்ளிட்ட கோரிக்கைகளை வலியுறுத்தி மேயர் நாகரத்தினத்திடம் மனு அளித்து, மாமன்ற கூட்டத்தில் இருந்து வெளிநடப்பு செய்தனர்.

மாநகராட்சி கட்டிடத்திற்கு கலைஞர் பெயர்

மாமன்ற கூட்டத்தில் மண்டல தலைவர் பழனிசாமி பேசியதாவது: மாநகராட்சி வளாகத்தில் கட்டப்பட்ட புதிய கட்டிடத்திற்கு முன்னாள் முதல்வர் கலைஞர் பெயரை வைக்க வேண்டும் என மாமன்றத்தில் தீர்மானம் நிறைவேற்றி அரசுக்கு அனுப்பிவைத்து ஓராண்டு ஆகிறது. ஆனால் இதுவரை நடவடிக்கை இல்லை. விரைந்து, அரசிடம் அனுமதி பெற்று, பெயர் வைக்க நடவடிக்கை எடுக்க வேண்டும்.

சாலைகளில் குழாய் உடைப்பு, பாதாள சாக்கடை சீரமைப்பு என பல்வேறு பணிகளுக்காக தோண்டப்பட்ட பள்ளம் பல மாதங்களாக மூடப்படாமல் உள்ளன. அதிகாரிகளிடம் பலமுறை கூறியும் எந்த நடவடிக்கையும் இல்லை. குடிநீர் விநியோகம், தெருவிளக்குகள் போன்ற அடிப்படை வசதிகளைக் கூட அதிகாரிகள் செய்து கொடுப்பதில்லை. எனவே, மக்களின் அடிப்படை பிரச்னைகளுக்கு அதிகாரிகள் உடனடி நடவடிக்கை எடுக்க வேண்டும், என்றார்.