குட்டையில் குளித்த காட்டு யானைகள்

*மலை கிராம மக்கள் அச்சம்

சத்தியமங்கலம் : தாளவாடி மலைப்பகுதியில் உள்ளது அருள்வாடி, மல்லன்குழி, தமிழ்புரம் உள்ளிட்ட கிராமங்களை ஒட்டிய வனப்பகுதிகளில் கடந்த சில நாட்களாக யானைகள் கூட்டம் கூட்டமாக பகல் நேரங்களில் நடமாடுகின்றன. இந்த நிலையில் நேற்று வனப்பகுதியில் இருந்து வெளியேறிய 10க்கும் மேற்பட்ட காட்டு யானைகள் மல்லன்குழி அருகே வனப்பகுதியை ஒட்டி அமைந்துள்ள குட்டையில் குளித்தபடி தும்பிக்கையால் தண்ணீரை உறிஞ்சி விளையாடி மகிழ்ந்தன.

யானைகள் கூட்டமாக குட்டையில் குளிப்பதை அப்பகுதியில் ஆடு, மாடு மேய்க்கும் தொழிலாளர்கள் கண்டு அச்சமடைந்தனர். பகல் நேரங்களில் காட்டு யானைகள் வனப்பகுதியை விட்டு வெளியேறி விவசாய விளைநிலங்களில் நடமாடுவதால் விவசாயிகள் தங்களது விவசாயப் பணிகளை மேற்கொள்ள முடியாமல் தவித்து வருகின்றனர்.

மேலும் ஆடு, மாடு உள்ளிட்ட கால்நடைகள் மேய்ச்சலில் ஈடுபடும் விவசாயிகள் மற்றும் தொழிலாளர்களும் அப்பகுதியில் கால்நடைகளை மேய்ச்சலுக்கு ஓட்டிச் செல்ல அச்சப்பட வேண்டிய நிலை ஏற்பட்டுள்ளது. கூட்டமாக சுற்றி திரியும் காட்டு யானைகளை அடர்ந்த வனப்பகுதிக்குள் விரட்டி அடிக்க வனத்துறையினர் நடவடிக்கை எடுக்க வேண்டும் என தாளவாடி மலைப்பகுதி விவசாயிகள் மற்றும் பொதுமக்கள் கோரிக்கை விடுத்துள்ளனர்.