தேர்தல் கமிஷன் முடிவால் அதிர்ச்சி: புதிய கட்சி துவங்கும் பணிகளை துரிதப்படுத்த நிர்வாகிகளுக்கு ராமதாஸ் அதிரடி உத்தரவு

திண்டிவனம்: அன்புமணிக்கே பாமக சொந்தம் என தேர்தல் ஆணையம் அறிவித்துவிட்டதால் அதிர்ச்சி அடைந்த ராமதாஸ் வரும் சட்டமன்ற தேர்தலை சந்திக்க புதிய கட்சி துவங்கும் வேலையை துரிதப்படுத்துமாறு முன்னணி நிர்வாகிகளுக்கு உத்தரவிட்டுள்ளார். பாமகவில் தந்தை, மகன் மோதலை தொடர்ந்து ராமதாஸ் தலைமையில் ஒரு அணியும், அன்புமணி தலைமையில் மற்றொரு அணியும் செயல்பட்டு வருகிறது. ராமதாஸ் வயது மூப்பு காரணமாக தமிழகம் முழுவதும் சுற்றுப்பயணம் செய்வதில் சிரமம் இருக்கும் என்பதால் புதிய செயல் தலைவராக தனது மூத்த மகள் காந்தியையும், இளைஞர் சங்க தலைவராக ஜி.கே.மணியின் மகன் தமிழ்குமரனையும் நியமித்தார். யாருக்கு கட்சி என்பதும், மாம்பழம் சின்னம் யாருக்கு என்பது குறித்தும் இரு தரப்பினருக்கும் கடும் போட்டி இருந்தது. தங்களுக்குதான் மாம்பழம் சின்னம் ஒதுக்க வேண்டுமென 2 அணிகளுமே தனித்தனியாக தேர்தல் ஆணையத்தில் மனு அளித்தனர்.

இந்நிலையில் அன்புமணிக்கே பாமக சொந்தம் என தேர்தல் ஆணையம் அறிவித்துவிட்டது. தேர்தல் கமிஷனின் இந்த பதில் ராமதாஸ் மற்றும் அவரது கட்சி நிர்வாகிகளுக்கு கடும் அதிர்ச்சியை ஏற்படுத்தியது. மேலும், நீதிமன்றம் சென்று உரிமையை பெற்று கொள்ளுங்கள் என தேர்தல் ஆணையம் கூறி உள்ளதால், விரைவில் உச்ச நீதிமன்றத்தில் முறையிட ராமதாஸ் திட்டமிட்டுள்ளார். ஒரு வேளை உச்ச நீதிமன்றத்தில் இந்த பிரச்னையை உரிமையியல் நீதிமன்றத்தை நாடி தீர்த்துக்கொள்ளுமாறு கூறிவிட்டால் பாமகவை மீட்கும் சட்டபோராட்டம் ஆண்டுகணக்கில் நீடிக்கும் என்பதால் வரும் 2026 சட்டசபை தேர்தலில் கூட்டணி பேச்சுவார்த்தை உள்ளிட்ட பல்வேறு விஷங்களில் சிக்கலாகிவிடும் என ராமதாஸ் நினைக்கிறார். அன்புமணிக்கு பாஜ ஆதரவும் உள்ளதால் வழக்கு மூலம் இந்த பிரச்னையை இப்போதைக்கு தீர்க்க முடியாது என்பதால் புதிய கட்சி துவங்கும் கட்டாய முடிவுக்கு அவர் வந்துவிட்டார்.

இதற்கான ஆரம்பட்ட வேலைகள் ஏற்கனவே துவங்கப்பட்ட நிலையில் புதிய கட்சி துவங்கும் பணியை விரைவு படுத்துமாறு நிர்வாகிகளுக்கு அவர் உத்தரவிட்டுள்ளார். இந்நிலையில், ஒருங்கிணைந்த கடலூர் மாவட்ட பாமக பொதுக்குழு கூட்டம் வடலூரில் உள்ள தனியார் திருமண மண்டபத்தில் இன்று நடக்கிறது. இந்த கூட்டத்தில் ராமதாஸ், செயல் தலைவர் ஸ்ரீகாந்தி, பொதுச்செயலாளர் முரளி சங்கர் உள்ளிட்ட முக்கிய நிர்வாகிகள் கலந்துகொள்கின்றனர். தேர்தல் கமிஷன் அறிவிக்கு பின் பாமகவில் ஏற்பட்டுள்ள சூழ்நிலைகள், கட்சியின் அடுத்த கட்ட நடவடிக்கை குறித்து ராமதாஸ் முக்கிய அறிவிப்பை வெளியிடுவார் என தெரிகிறது.