அனைத்து துறை அலுவலர்களும் ஒருங்கிணைந்து பொதுமக்களை மழை பாதிப்பிலிருந்து மீட்டிட பணியாற்றிட வேண்டும்

*கண்காணிப்பு அதிகாரி அறிவுறுத்தல்

கடலூர் : வடகிழக்கு பருவமழையை முன்னிட்டு மாவட்ட கண்காணிப்பாளர் மற்றும் சர்க்கரை துறை மேலாண்மை இயக்குநர் அன்பழகன் தலைமையில் மாவட்ட ஆட்சியர் சிபி ஆதித்யா செந்தில்குமார் முன்னிலையில் அனைத்து துறை அலுவலர்களுடன் ஆய்வுக்கூட்டம் நடைபெற்றது. இக்கூட்டத்தில் மாவட்ட கண்காணிப்பாளர் மற்றும் சர்க்கரை துறை மேலாண்மை இயக்குனர் அன்பழகன் தெரிவித்ததாவது:

கடலூர் மாவட்டத்தில் பெண்ணையாறு, கெடிலம், வெள்ளாறு, பரவனாறு, கொள்ளிடம் ஆகிய 5 பெரிய ஆறுகளும், 228 பெரிய ஏரிகளும் உள்ளன. பேரிடர் காலங்களில் பாதிப்புக்குள்ளாக கூடிய பகுதிகளாக 239 இடங்கள் கண்டறியப்பட்டுள்ளது.

அதில் 22 இடங்கள் மிக அதிகமாக பாதிப்புக்குள்ளாக கூடிய இடங்களாகவும், 39 இடங்கள் அதிகம் பாதிப்புக்குள்ளாக கூடிய இடங்களாகவும், 20 இடங்கள் மிதமாக பாதிப்புக்குள்ளாக கூடிய இடங்களாகவும், 158 இடங்கள் குறைவான அளவு பாதிப்பு ஏற்படக்கூடிய இடங்களாகவும் கண்டறியப்பட்டுள்ளன.

கடலூர் மாவட்டத்தில் உள்ள 28 புயல் பாதுகாப்பு மையங்களில் 8,400 நபர்கள் தங்கும் அளவில் ஏற்பாடு செய்யப்பட்டுள்ளது. மேலும், 14 பல்நோக்கு பாதுகாப்பு மையங்களில் 15,800 நபர்களும், 191 தற்காலிக தங்கும் இடங்களில் 1,54,875 நபர்களும் தங்கும் அளவுக்கு வசதிகள் ஏற்பாடு செய்யப்பட்டுள்ளன.பேரிடர் காலங்களில் உரிய அலுவலர்களுக்கு இடையேயான தகவல் தொடர்பை மேம்படுத்தும் பொருட்டு முக்கிய அலுவலர்களுக்கு 125 எண்ணிக்கையில் வாக்கி டாக்கி கருவிகள் வழங்கப்பட்டுள்ளன.

பேரிடர் காலங்களில் உரிய அலுவலர்களுக்கு குறுகிய காலத்துக்குள் செய்தி அளித்திட 35 கம்பியில்லா தொலை தொடர்பு கருவிகளும், மாவட்ட பேரிடர் கட்டுப்பாட்டு அறையில் செயற்கைக்கோள் தொலைபேசி 2 தயார் நிலையில் உள்ளது. மழையளவை கண்டறிய 25 நிலையான மழைமாணிகள், 39 தானியங்கி மழைமாணிகள் மற்றும் 4 தானியங்கி வானிலை மையங்கள் அமைக்கப்பட்டு மாவட்டத்தின் வானிலை நிலவரம் தொடர்ந்து கண்காணிக்கப்பட்டு வருகிறது.

மழை தொடர்பாக மாவட்ட அவசர கட்டுப்பாட்டு அறையை தொடர்பு கொள்வதற்கு 1077 (கட்டணமில்லா எண்) மற்றும் 04142-220700, 290325, 290326, 290327 ஆகிய தொலைபேசி எண்கள் 24x7 நேரமும் செயல்பட்டு வருகிறது. மேலும் வடகிழக்கு பருவமழை காலங்களில் கூடுதலாக வாட்ஸ்ஆப் மூலம் தகவல் தெரிவிப்பதற்கு ஏதுவாக (94899-30520) என்ற எண் கொண்ட மொபைல் போன் செயல்பாட்டில் உள்ளது.

இயற்கை இடர்பாடுகள் குறித்து உடனடியாக நிருவாகத்திற்கு தகவல் அளித்திட முதல் தகவல் அளிப்பவர்களாக 4932 நபர்கள் கண்டறியப்பட்டுள்ளனர். பாதிக்கப்படும் இடங்களில் உள்ள கால்நடைகளை பாதுகாப்பாக இடமாற்றம் செய்வதற்கு 1,334 முதல் தகவல் அளிப்பவர்கள் தயார் நிலையில் உள்ளனர். “பேரிடர் கால நண்பன்” திட்டத்தின் கீழ் கடலூர் மாவட்டம் முழுவதிலிருந்தும் 300 தன்னார்வலர்கள் கண்டறியப்பட்டு பயிற்சி அளிக்கப்பட்டு தயார் நிலையில் உள்ளனர்.

தேசிய பேரிடர் மீட்புக்குழுவினர் 35 நபர்கள் மற்றும் தமிழ்நாடு பேரிடர் மீட்புக்குழுவினர் 40 நபர்களும் வருகை புரிந்துள்ளனர். தேவையான இடங்களில் மீட்பு நடவடிக்கையில் ஈடுபட அறிவுறுத்தப்பட்டுள்ளது. அனைத்து துறை அலுவலர்களும் ஒருங்கிணைந்து பொதுமக்களை மழை பாதுகாப்பிலிருந்து மீட்டிட பணியாற்றிட வேண்டும். இவ்வாறு அவர்

கூறினார்.

இந்நிகழ்ச்சியில் மாவட்ட வருவாய் அலுவலர் புண்ணிய கோட்டி, மாவட்ட ஊரக வளர்ச்சி முகமையின் கூடுதல் ஆட்சியர் பிரியங்கா, மாவட்ட கூடுதல் காவல் கண்காணிப்பாளர் கோடீஸ்வரன், மாவட்ட ஆட்சியரின் நேர்முக உதவியாளர் (கணக்கு) தீபா, சிதம்பரம் சார் ஆட்சியர் கிஷன்குமார், பயிற்சி ஆட்சியர் மாலதி உட்பட அனைத்து துறை உயர் அலுவலர்கள் கலந்து கொண்டனர்.