மக்கள் தார்பாலின், மெழுகுவர்த்தி ஆர்வமுடன் வாங்கியதால் கஜாவை நினைவுபடுத்திய ‘டிட்வா’ புயல்

*மாவட்ட நிர்வாகமும் உஷார் நிலை

கந்தர்வகோட்டை : புதுக்கோட்டை மாவட்டத்தில் ‘டிட்வா’ புயல் காரணமாக பள்ளி, கல்லூரிகளுக்கு அரை நாள் விடுமுறை விடப்பட்டதையடுத்து, மக்கள் மெழுகுவர்த்தி, தீ பெட்டி, டார்ச் லைட், மண்ணெண்ணெய் விளக்கு, பழங்களை முன்னெச்சரிக்கையாக வாங்கி வைக்க ஆர்வம் காட்டியதால் கஜா புயல் பாதிப்புகளை நினைவுபடுத்தியுள்ளது.

கடந்த 2018ஆம் ஆண்டு கஜா புயல் கடுமையாக தாக்கியதால் புதுக்கோட்ைட, தஞ்சாவூர் உள்ளிட்ட மாவட்டங்களில் லட்சக்கணக்கான புளியன், தென்னை, மா, பலா உள்ளிட்ட மரங்கள் வேறுடன் முறிந்தன. மின்கம்பங்கள், மின்மாற்றிகள் உடைந்து மின்பாதைகள் முற்றிலும் சேதமடைந்தன.

மேலும், சாலைகள், குடிநீர், போக்குவரத்து உள்ளிட்ட அடிப்படை தேவைகள் அனைத்தும் முற்றிலும் பாதிக்கப்பட்டன. இதனால், ஏராளமானோர் உணவு, தண்ணீர் இல்லாமல் தவித்தனர்.

இந்த பாதிப்புகளிலிருந்து மக்கள் இன்னும் மீளாத நிலையில், வங்கக்கடலில் உருவாகியுள்ள டிட்வா புயல் காரணமாக புதுக்கோட்டை உள்ளிட்ட 9 மாவட்டங்களுக்கு வானிலை ஆய்வு மையம் ‘ரெட் அலர்ட்’ விடுத்தது. இதையடுத்து, தமிழக அரசு புதுக்கோட்டை மாவட்டத்திற்கு பாதுகாப்பு படை மற்றும் மீட்பு படைகளை தயார் நிலையில் வைத்துள்ளது. மேலும், மக்களும் பாதுகாப்பாக இருக்க அறிவுறுத்தியுள்ளது.

இதையடுத்து, கஜா புயலைப்போன்று டித்வா பாதிப்பை ஏற்படுத்துமோ என்ற ஒரு விதமான அச்சத்தில் புதுக்கோட்டை மாவட்டம், புதுக்கோட்டை மாநகராட்சி, இலுப்பூர், கறம்பக்குடி, கந்தர்வக்கோட்டை, அறந்தாங்கி நகராட்சி, ஆவுடயார்கோவில், விராலிமலை உள்ளிட்ட நகரங்கள், கிராமங்களில் உள்ள பள்ளிகளுக்கு நேற்று அரைநாள் விடுமுறை அளிக்கப்பட்டது.

தமிழக அரசு, தென்னிந்திய வானிலை ஆய்வு மையம் அறிவுறுத்திய நிலையில் பொதுமக்கள் கூரைவீடுகளை பாதுகாக்க தார்பாலின், கட்டுக்கம்பிகள், போர்வைகள், தீ பெட்டி, டார்ச் லைட், பழங்கள், மண்ணெண்ணெய் உள்ளிட்ட அத்தியாவசியப் பொருட்களை ஆர்வமுடன் வாங்கி சேமித்து வைத்துள்ளனர்.

தீயணைப்பு வீரர்கள், காவல்துறை அதிகாரிகள், வருவாய்த்துறை அதிகாரிகள் அனைவரும் தயார் நிலையில் உள்ளனர். ‘டிட்வா’ சாதாரணமாக கரையை கடந்து செல்லுமா, அல்லது கஜாவை போல கடும் பாதிப்புகளை ஏற்படுத்துமா என்பது தெரியாத நிலையில், முன்னெச்சரிக்கையாக அரசும், மக்களும் தயார் நிலையில் இருப்பதால், கஜாவை மக்களுக்கு நினைவுபடுத்தியதுபோலவே உள்ளதாக பொதுமக்களும், சமூக ஆர்வலர்களும் தெரிவித்துள்ளனர்.