தர்மேந்திரா மறைவுக்கு பின் குடும்பத்தில் விரிசல்; தனித்தனியாக நினைவேந்தல் கூட்டம் நடத்திய மனைவிகள்: பாலிவுட்டில் பரபரப்பை ஏற்படுத்திய ஹேமமாலினி

மும்பை: மறைந்த நடிகர் தர்மேந்திராவுக்கு அவரது இரு குடும்பத்தாரும் தனித்தனியாக நினைவேந்தல் கூட்டம் நடத்தியது பாலிவுட் வட்டாரத்தில் சலசலப்பை ஏற்படுத்தியுள்ளது. பாலிவுட் திரையுலகின் ஜாம்பவானாகத் திகழ்ந்த நடிகர் தர்மேந்திரா (89), வயது முதிர்வு மற்றும் உடல்நலக்குறைவு காரணமாகக் கடந்த 24ம் தேதி காலமானார். அவருக்குப் பிரகாஷ் கவுர் மற்றும் ஹேமமாலினி (பாஜக எம்பியும், நடிகையுமாவார்) என இரண்டு மனைவிகள் உள்ள நிலையில், இரு குடும்பத்தாரும் தனித்தனியாக வசித்து வந்தாலும், ஒருவருக்கொருவர் மரியாதையான இடைவெளியைக் கடைப்பிடித்து வந்தனர்.

தர்மேந்திராவின் மறைவு இந்தியத் திரையுலகையே சோகத்தில் ஆழ்த்திய நிலையில், அவரது இறுதிச் சடங்குகள் மும்பையில் உள்ள பவன் ஹன்ஸ் மயானத்தில் முழு அரசு மரியாதையுடன் நடைபெற்றது. இந்நிலையில் தர்மேந்திராவின் மறைவைத் தொடர்ந்து நடைபெற்ற நினைவேந்தல் நிகழ்ச்சிகள் தற்போது சர்ச்சையைக் கிளப்பியுள்ளன. தர்மேந்திராவின் முதல் மனைவி பிரகாஷ் கவுர் மற்றும் மகன்கள் சன்னி தியோல், பாபி தியோல் ஆகியோர் மும்பையில் உள்ள நட்சத்திர ஓட்டல் ஒன்றில் பிரம்மாண்டமாக நினைவேந்தல் கூட்டத்தை நடத்தினர்; இதில் ஏராளமான திரையுலகப் பிரபலங்கள் கலந்துகொண்டனர். ஆனால், இந்த முக்கிய நிகழ்ச்சியில் இரண்டாவது மனைவி ஹேமமாலினி மற்றும் அவரது மகள்கள் ஈஷா, அஹானா ஆகியோர் கலந்துகொள்ளவில்லை.

மாறாக, ஹேமமாலினி தனது ஜூஹூ இல்லத்தில் தனியாக நினைவேந்தல் கூட்டத்தை நடத்தியதாகத் தகவல்கள் வெளியாகியுள்ளன. ‘குடும்பத்திற்குள் எந்தப் பிரச்னையும் இல்லை, நாங்கள் ஒற்றுமையாகவே இருக்கிறோம்’ என்று ஹேமமாலினி முன்பு கூறியிருந்தாலும், தற்போது தனித்தனியாகத் துக்க அனுசரிப்பு நிகழ்ச்சிகள் நடத்தப்பட்டிருப்பது இரு குடும்பத்தினரிடையே பனிப்போர் நிலவுவதை உறுதிப்படுத்துவதாக அமைந்துள்ளது என பாலிவுட் வட்டாரங்களில் பேசப்படுகிறது.