முதல்வர் வாழ்த்து ராஜராஜ சோழனின் புகழ் போற்றுவோம்

சென்னை: மாமன்னர் ராஜராஜ சோழனின் 1040வது சதய விழாவையொட்டி முதல்வர் மு.க.ஸ்டாலின் சமூக வலைதளங்களில் நேற்று வெளியிட்டுள்ள பதிவு: தமிழர்களின் கலைத்திறன், போர்த்திறன், கப்பற்கலை, பாசனமுறை என அனைத்தின் உச்சமாக ஆட்சிசெய்து மங்காப் புகழொளியை தமதாக்கிக் கொண்ட மாமன்னர் ராஜராஜ சோழனின் 1040வது சதய விழா இன்று.

தஞ்சை மாவட்டத்திற்கு இன்று உள்ளூர் விடுமுறை அறிவிக்கப்பட்டு, நேற்று முதல் பல்வேறு நிகழ்ச்சிகளுடன், தஞ்சை மாநகர் முழுவதும் வண்ண விளக்குகள் ஒளிர, சதய விழா கோலாகலத்துடன் கொண்டாடப்பட்டு வருகிறது. தமிழர்களின் பெருமையாக அவர் நமக்காக விட்டுச் சென்றுள்ள பங்களிப்புகளை நினைவுகூர்ந்து, பாதுகாத்து, அடுத்த தலைமுறைக்கும் எடுத்துச் சொல்லி, மாமன்னர் ராஜராஜ சோழன் புகழ் போற்றுவோம். இவ்வாறு அவர் கூறியுள்ளார்.