பால தடுப்புக்கட்டையில் கார் மோதி சென்னை இன்ஸ்பெக்டரின் கணவர், மருமகள் பரிதாப பலி: மகன் படுகாயம்

திருச்சி: துவரங்குறிச்சி அருகே இன்று காலை பால தடுப்பு கட்டையில் கார் மோதி சென்னை போலீஸ் இன்ஸ்பெக்டரின் கணவர், மருமகள் பலியாகினர். மகன் படுகாயமடைந்தார். மதுரை மாவட்டம் நாகமலை புதுக்கோட்டையை சேர்ந்தவர் பேட்ரிக்(55). மதுரையில் உள்ள தனியார் கல்லூரியில் பேராசிரியராக பணியாற்றி வந்தார். இவரது மனைவி சென்னை கொளத்தூர் போலீஸ் இன்ஸ்பெக்டராக பணியாற்றி வருகிறார். இவர்களது மகன் மெல்வின்(32). இன்ஜினியர். சென்னையில் உள்ள ஒரு ஐடி கம்பெனியில் வேலை செய்து வருகிறார். மருமகள் ஆரோக்கிய பிரிசில்லா(26).

பேட்ரிக், மகன், மருமகளுடன் சென்னைக்கு சென்று விட்டு நேற்றிரவு காரில் மதுரைக்கு திரும்பிக்கொண்டிருந்தார். காரை மகன் மெல்வின் ஓட்டினார். இன்று காலை 9 மணி அளவில் மழை பெய்து கொண்டிருந்தபோது திருச்சி மாவட்டம் துவரங்குறிச்சி அடுத்த கோசிகுறிச்சி பிரிவு அருகே மதுரை தேசிய நெடுஞ்சாலையில் மெல்வின் கண் அயர்ந்ததால் கட்டுப்பாட்டை இழந்த கார் பாலத்தின் தடுப்பு கட்டையில் பயங்கரமாக மோதி விபத்துக்குள்ளானது. இதில் காரின் முன்பகுதி நொறுங்கியது. இடிபாட்டுக்குள் சிக்கி பேட்ரிக் அந்த இடத்திலேயே பரிதாபமாக பலியானார். படுகாயமடைந்த ஆரோக்கிய பிரிசில்லா, மெல்வின் மதுரை தனியார் மருத்துவமனையில் சேர்க்கப்பட்டனர்.

அங்கு சிகிச்சை பலனின்றி சிறிது நேரத்தில் ஆரோக்கிய பிரிசில்லா இறந்தார். மெல்வினுக்கு தீவிர சிகிச்சை அளிக்கப்பட்டு வருகிறது. தகவலறிந்து வந்த துவரங்குறிச்சி போலீசார் மற்றும் தீயணைப்புத் துறையினர் இடிபாட்டுக்குள் சிக்கியிருந்த பேட்ரிக் உடலை மீட்டு பிரேத பரிசோதனைக்காக மணப்பாறை அரசு மருத்துவமனைக்கு அனுப்பி வைத்தனர். மேலும் வழக்கு பதிந்து விசாரணை மேற்கொண்டு வருகின்றனர்.