சென்னையில் இன்றும் நாளையும் விட்டு விட்டு கனமழை பெய்யக்கூடும்: வானிலை ஆய்வு மையம் தகவல்

சென்னை: வேதாரண்யத்தில் இருந்து 110 கிலோ மீட்டர் தொலைவில் டிட்வா புயல் மையம் கொண்டுள்ளது என வானிலை மையம் தெரிவித்துள்ளது. வங்கக்கடலில் மையம் கொண்டுள்ள டிட்வா புயல் மணிக்கு 10 கி.மீ வேகத்தில் வடக்கு, வடமேற்கு திசையில் நகர்கிறது. சென்னைக்கு 350 கி.மீ தூரத்தில் தெற்கு திசையில் மையம் கொண்டுள்ளது. புதுச்சேரிக்கு 250 கி.மீ. தொலைவிலும், காரைக்காலுக்கு 150 கி.மீ. தொலைவிலும் டிட்வா புயல் மையம் கொண்டுள்ளது. தொடர்ந்து வடக்கு, வடமேற்கு திசையில் நகரும் டிட்வா புயல் வடதமிழ்நாட்டின் கடலோரத்தை ஒட்டி செல்லும் என தெரிவிக்கப்பட்டுள்ளது.

இதன் காரணமாக செங்கல்பட்டு, விழுப்புரம், கடலூர், மயிலாடுதுறை, நாகை மாவட்டங்களில் அதி கனமழை பெய்ய வாய்ப்புள்ளதாகவும், புதுச்சேரி மற்றும் காரைக்காலில் இன்று அதி கனமழை பெய்ய வாய்ப்பு எனவும் வானிலை ஆய்வு மையம் தெரிவித்துள்ளது. சென்னையில் இன்றும் நாளையும் மிக கனமழை பெய்ய வாய்ப்புள்ளது. திருவள்ளூர், ராணிப்பேட்டை காஞ்சி, திருவண்ணாமலை மாவட்டங்களில் இன்று மிக கனமழை பெய்யும் என தகவல் தெரிவிக்கப்பட்டுள்ளது.

காரைக்காலில் காலை 8.30 மணி முதல் மாலை 3.30 மணி வரை 7 மணி நேரத்தில் 13 செ.மீ. மழை பெய்ய வாய்ப்பு என தெரிவிக்கப்பட்டது. நாகை மாவட்டத்தில் 7 மணி நேரத்தில் 11 செ.மீ.மழை பெய்துள்ளது. தமிழ்நாட்டில் டிசம்பர் 1ம் தேதி முதல் படிப்படியாக மழை குறையக் கூடும் என வானிலை ஆய்வு மையும் தகவல் தெரிவிக்கப்பட்டது. ஆந்திர கடலோரம், மத்திய மேற்கு, தமிழக கடலோரம், மன்னார் வளைகுடா, குமரிக் கடலில் 90 கி.மீ. வேகத்தில் காற்றுவீசுக்கூடும் என எதிர்பார்க்கப்படுகிறது.