கர்நாடக முதல்வர் நாற்காலிக்கு கடும் போட்டி; சித்தராமையா வீட்டில் ‘டிபன்’ சாப்பிட்ட டி.கே.சிவக்குமார்

* காங்கிரஸ் மேலிட உத்தரவுக்காக காத்திருக்கும் தலைவர்கள்

* எச்.டி.குமாரசாமியின் கிண்டல் பேட்டியால் திடீர் பரபரப்பு

பெங்களூரு: கர்நாடக முதல்வர் பதவி குறித்த இறுதி முடிவைக் காங்கிரஸ் மேலிடம் தான் எடுக்கும் என்று துணை முதல்வர் டி.கே. சிவக்குமார் திட்டவட்டமாக கூறிய நிலையில், இன்று காலை சித்தராமையா வீட்டிற்கு சென்று காலை உணவு சாப்பிட்டார். கர்நாடகாவில் கடந்த 2023ம் ஆண்டு காங்கிரஸ் ஆட்சி அமைந்தபோது, முதல்வர் பதவிக்குச் சித்தராமையா மற்றும் டி.கே. சிவக்குமார் இடையே ரகசிய ஒப்பந்தம் ஏற்பட்டது. அதில் முதல் இரண்டரை ஆண்டுகள் சித்தராமையாவும், மீதமுள்ள காலம் சிவக்குமாரும் ஆட்சி செய்ய முடிவு செய்யப்பட்டதாகக் கூறப்படுகிறது. கடந்த 20ம் தேதியுடன் இரண்டரை ஆண்டுகள் நிறைவடைந்த நிலையில், முதல்வர் நாற்காலியைக் கைப்பற்றுவதில் இருவருக்கும் இடையே மோதல் வெடித்துள்ளது. நாடாளுமன்றக் குளிர்காலக் கூட்டத்தொடர் தொடங்கவுள்ள நிலையில், டெல்லி சென்று மேலிடத் தலைவர்களைச் சந்திக்க இருப்பதாகவும் சிவக்குமார் கூறினார்.

இந்தத் தலைமை மாற்ற விவகாரத்திற்கு முற்றுப்புள்ளி வைக்கும் நோக்கில், முதல்வர் சித்தராமையா மற்றும் துணை முதல்வர் டி.கே. சிவக்குமாரை உடனடியாக டெல்லிக்கு வருமாறு காங்கிரஸ் மேலிடம் அழைப்பு விடுத்துள்ளது. சிவக்குமார் தரப்பு தங்களுக்கு அளிக்கப்பட்ட வாக்குறுதியை நிறைவேற்ற வேண்டும் என்பதில் உறுதியாக உள்ளதால், இந்த டெல்லி பயணம் முக்கியத்துவம் வாய்ந்ததாகக் கருதப்படுகிறது. மறுபுறம் சித்தராமையா ஆதரவாளர்கள் எழுத்துப்பூர்வமான ஒப்பந்தம் ஏதுமில்லை என்று வாதிடுகின்றனர். ஆனால், சிவக்குமார் தரப்பினரோ தனிப்பட்ட பதவி ஆசையைத் தாண்டி, கட்சித் தலைமை அளித்த வாக்குறுதியைக் காப்பாற்ற வேண்டும் என்று வலியுறுத்துகின்றனர். இந்தச் சூழலில் காங்கிரஸ் மேலிடத் தலைமை கண்டிப்புடன் உத்தரவிட்டதைத் தொடர்ந்து, சமரசம் செய்துகொள்ளும் வகையில் முதல்வர் சித்தராமையா தனது இல்லத்தில் இன்று காலை உணவு விருந்திற்கு (பிரேக் பாஸ்ட்) ஏற்பாடு செய்திருந்தார். அதன்படி சித்தராமையாவின் இல்லத்திற்கு டி.கே.சிவக்குமார் மற்றும் அவரது ஆதாரவாளர்கள் சென்று டிபன் சாப்பிட்டனர்.

இந்தச் சந்திப்பின்போது கருத்து வேறுபாடுகளைக் களைந்து மேலிடத்தின் முடிவுக்குக் கட்டுப்படுவதாக இரு தலைவர்களும் உறுதியளித்தனர். அதன்படி இரு தலைவர்களும் இன்று பிற்பகல் டெல்லி சென்று, தேசிய தலைவர்களுடன் ஆலோசனை நடத்த உள்ளதாக காங்கிரஸ் வட்டாரங்கள் தெரிவித்தன. இருப்பினும், இந்தச் சந்திப்பை ‘காலை உணவில் ஒற்றுமை; கட்சியில் வேற்றுமை’ என்று கிண்டல் செய்துள்ள பாஜக தலைமையிலான தேசிய ஜனநாயகக் கூட்டணிக் கட்சிகள், உள்கட்சிப் பூசலால் மாநில அரசு நிர்வாகம் ஸ்தம்பித்துவிட்டதாகக் குற்றம் சாட்டியுள்ளன. இதுகுறித்து மதச்சார்பற்ற ஜனதா தளத் தலைவரும், ஒன்றிய அமைச்சருமான எச்.டி.குமாரசாமி கூறுகையில், ‘டி.கே. சிவக்குமார் முதல்வர் ஆக விரும்பினால் எங்கள் கட்சி எம்.எல்.ஏக்கள் ஆதரவு தருவார்கள்’ என்று கிண்டலாகத் தெரிவித்துள்ளார். மேலும் எதிர்க்கட்சிகள், வரவிருக்கும் கூட்டத்தொடரில் நம்பிக்கையில்லாத் தீர்மானம் கொண்டுவரத் திட்டமிட்டுள்ளன.