பிரிட்டன் நாடாளுமன்றத்தில் முதல் தமிழ்ப் பெண்!
அவர் போட்டியிட்ட தொகுதியில் 19,415 வாக்குகள் பெற்று உமா குமரன் வெற்றி பெற்றுள்ளார். இதன் மூலம் பிரிட்டன் நாடாளுமன்றத்துக்குள் நுழையும் முதல் தமிழர் என்ற சாதனையை படைத்துள்ளார் உமா குமரன். பிரிட்டன் நாடாளுமன்றத் தேர்தலில் மொத்தம் 8 தமிழர்கள் போட்டியிட்ட நிலையில், கவின் கரன், மயூரா செந்தில், தேவின்னா பால், நார்னி ரதர்ஃபோர்ட் ராஜன் ஆகியோர் தோல்வியை சந்தித்துள்ளனர். கிழக்கு லண்டனில் பிறந்து வளர்ந்த உமா குமரனின் பெற்றோர் இலங்கையை சேர்ந்தவர்களாவார். 1980 காலகட்டத்தில் நடைபெற்ற உள்நாட்டு போரின் காரணமாக இவரது குடும்பமும் உறவினர்களின் குடும்பங்களும் பல்வேறு நாடுகளில் குடியேறி உள்ளதாக தெரிவித்துள்ளார். ‘புரட்சி என்னுடைய ரத்தத்தில் கலந்துள்ளது’ எனக் கூறியுள்ள உமா குமாரன் கடந்த 15 ஆண்டுகளாக தொழிலாளர் கட்சியில் இணைந்து செயல்பட்டு வருகிறார் என்பது குறிப்பிடதக்கது. இந்நிலையில், தோல்விக்குப் பொறுப்பேற்று கன்சர்வேட்டிவ் கட்சித் தலைவர் பதவியில் இருந்து விலகுவதாக பிரதமர் ரிஷி சுனக் அறிவித்துள்ளார். விரைவில் மன்னர் சார்லசை சந்தித்து பிரதமர் பதவியை ராஜினாமா செய்வதற்கான கடிதத்தை வழங்க இருப்பதாகவும் கூறியுள்ளார்.
