பீகார் தேர்தல் முடிவுகள் அதிர்ச்சி அளிக்கிறது: ராகுல்காந்தி கருத்து

பீகார் தேர்தல் முடிவுகள் மிகவும் அதிர்ச்சி அளிக்கின்றன என்று ராகுல்காந்தி கருத்து தெரிவித்துள்ளார். இதுபற்றி அவர் தனது எக்ஸ் பதிவில்,’ இந்தியா கூட்டணி மீது நம்பிக்கை வைத்த பீகாரில் உள்ள லட்சக்கணக்கான வாக்காளர்களுக்கு எனது மனமார்ந்த நன்றியைத் தெரிவித்துக் கொள்கிறேன். பீகாரில் இந்த முடிவு உண்மையிலேயே அதிர்ச்சியளிக்கிறது. தொடக்கத்திலிருந்தே நியாயமற்ற தேர்தலில் நாம் வெற்றி பெறத் தவறிவிட்டோம். அரசியலமைப்புச் சட்டத்தையும், ஜனநாயகத்தையும் பாதுகாப்பதற்கான இந்தப் போராட்டம் தொடரும். காங்கிரஸ் கட்சியும், இந்தியா கூட்டணியும் இந்த முடிவை ஆழமாக மதிப்பாய்வு செய்து ஜனநாயகத்தைப் பாதுகாப்பதற்கான தங்கள் முயற்சிகளைத் தீவிரப்படுத்தும்’ என்று தெரிவித்துள்ளார்.

தொடர்ந்து போராடுவோம்: கார்கே

காங்கிரஸ் தலைவர் மல்லிகார்ஜுன கார்கே கூறுகையில்,’தேர்தல் முடிவுகளை நாங்கள் முழுமையாக ஆய்வு செய்து, முடிவுகளுக்கான காரணங்களைப் புரிந்துகொண்ட பிறகு விரிவான பார்வையை முன்வைப்போம். இந்தியா கூட்டணியை ஆதரித்த பீகாரில் உள்ள வாக்காளர்களுக்கு எங்கள் இதயத்தின் அடிப்பகுதியில் இருந்து நாங்கள் மிகவும் நன்றியுள்ளவர்களாக இருக்கிறோம். நீங்கள் சோர்வடைய வேண்டிய அவசியமில்லை என்று ஒவ்வொரு காங்கிரஸ் ஊழியருக்கும் நான் சொல்ல விரும்புகிறேன். நீங்கள் எங்கள் மரியாதை மற்றும் பெருமை. உங்கள் கடின உழைப்பு எங்கள் பலம். மக்களிடையே விழிப்புணர்வை ஏற்படுத்துவதில் நாங்கள் எந்த முயற்சியையும் விட்டுவிட மாட்டோம். அரசியலமைப்பையும் ஜனநாயகத்தையும் காப்பாற்றுவதற்கான போராட்டத்தை நாங்கள் தொடர்வோம். இந்தப் போராட்டம் நீண்டது. நாங்கள் முழு அர்ப்பணிப்பு, தைரியம் மற்றும் உண்மையுடன் போராடுவோம்’ என்று குறிப்பிட்டுள்ளார்.

இது வாக்கு திருட்டு தான் சந்தேகம் வேண்டாம்: ஜெய்ராம் ரமேஷ் குற்றச்சாட்டு

காங்கிரஸ் பொதுச்செயலாளர் ஜெய்ராம் ரமேஷ் கூறுகையில்,’ பீகாரில் தேர்தல் முடிவுகள் மிகப்பெரிய அளவில் வாக்கு திருட்டை பிரதிபலிக்கின்றன என்பதில் சந்தேகமில்லை. இது பிரதமர், உள்துறை அமைச்சர் மற்றும் தேர்தல் ஆணையத்தால் திட்டமிடப்பட்டது. அரசியலமைப்பைப் பாதுகாப்பதற்கும் நமது ஜனநாயகத்தைக் காப்பாற்றுவதற்கும் அதன் பிரச்சாரத்தை இன்னும் அதிக வலிமையுடன் தொடர இந்திய தேசிய காங்கிரஸ் தனது உறுதியை புதுப்பிக்கிறது’ என்று தெரிவித்தார்.