அருகம்புல் சூப்... தூதுவளை தேநீர்...மதிப்புக்கூட்டினால் மெகா வருமானம்!

நான் மாஸ்டர் டிகிரி படிச்சிட்டு, 10 வருஷம் கணித ஆசிரியரா இருந்தேன். ஆசிரியர் வேலையை செஞ்சிக்கிட்டே, இயற்கை விவசாயமும் செய்ய ஆரம்பிச்சேன். இயற்கை விவசாயத்தில் இறங்கி, பலன்களையும் விளைச்சலையும் பார்த்த பிறகு வேலையை விட்டுட்டு முழுநேர விவசாயியா மாறினேன். இப்போ எங்க விளைபொருட்களை நானே மதிப்புக்கூட்டி விக்கறேன். நூற்றுக்கும் மேற்பட்ட மதிப்புக்கூட்டிய பொருட்களை உற்பத்தி செய்றோம்” என விவசாயத்துக்கு வந்ததைப் பற்றி விவரிக்கத் தொடங்கினார் ராஜேஷ்கண்ணன். தஞ்சாவூர் மாவட்டம் சரபோஜிராஜபுரம் கிராமத்தில் 5 ஆண்டுகளாக இயற்கை விவசாயமும், மதிப்புக்கூட்டு வணிகமும் செய்து வரும் ராஜேஷ்கண்ணனைச் சந்தித்தபோது மேலும் சில தகவல்களை நம்மிடம் பகிர்ந்துகொண்டார்.

“தாத்தா காலத்துலர்ந்து வளர்ந்த தென்னை மரங்கள் ஒன்னரை ஏக்கர்ல இருக்கு. இந்த 150 மரங்கள்ல இருந்து 2 மாசத்துக்கு ஒருதடவை முத்தின தேங்காய்களை பறிக்கறோம். தன்னால கீழ விழுற தேங்காய்களையும் எடுத்து வச்சிக்கறோம். இந்தத் தேங்காய்களை உரிச்சி, காய்ந்த பிறகு உடச்சி, உள்ள இருக்குற தேங்காய் பத்தைகளை 8 துண்டுகளாக நறுக்கிக்கறோம். அப்பதான் சீக்கிரம் காயும். இந்தத் துண்டுகளை ட்ரேக்களில் அடுக்கி சோலார் ட்ரையர்ல காயவைக்கறோம். தேவையான அளவுக்குக் காய்ந்ததும், மரச்செக்கில் கொடுத்து எண்ணெய் எடுத்துக்கறோம். இந்த எண்ணெயை சோப் தயாரிக்கவும், கூந்தல் எண்ணெய் தயாரிக்கவும் பயன்படுத்திக்கறோம்” என்றவர், சோப் தயாரிப்பு பற்றி பேசினார்.

“1 கிலோ தேங்காய் எண்ணெய் கூட கொஞ்சம் நல்லெண்ணெய், விளக்கெண்ணெயும் சேர்த்து, 150 கிராம் காஸ்டிக் சோடாவோட கலந்து சோப் செய்றோம். கற்றாழை, வேப்பிலை, துளசி உள்ளிட்ட பொருட்களைக் கலந்து “ஆலுவேரா சோப்” செய்றோம். சந்தன சோப், ஹெர்பல் சோப், நீம் சார்க்கோல், குப்பைமேனி சோப்ன்னு சிலவகை சோப்களை செய்றோம். நாங்க உற்பத்தி செய்ற தேங்காய் எண்ணெய்ல 80 சதவீதத்தை சோப் தயாரிக்க பயன்படுத்திக்கிறோம். கொஞ்சம் சமையல் எண்ணெயும், கூந்தல் எண்ணெயும் செய்றோம்” என்றார்.

``அரை ஏக்கர்ல அருகம்புல் வளருது. இந்த மண்ணோட இயல்புக்கும், நீர்வளத்துக்கும் இந்தப்புல் தானாவே வளருது. இந்த அருகம்புல்லை அறுத்து, ஒருவாரம் வரைக்கும் நிழலில் காய வச்சுக்கறோம். அப்புறம் பொடியா அரைக்கறதுக்கு முன்னாடி 2 மணிநேரம் வெயில்ல காயவச்சு, மொறுமொறுன்னு காஞ்சப்புறம் எடுத்து அரைக்கறோம். இந்த அருகம்புல் பொடியை மிளகு, சீரகம், நாட்டுச்சோளம் எல்லாம் பொடியாக்கி கலந்து சேர்ந்து “அருகம்புல் சூப்” பொடியா விக்கறோம்” என அருகம்புல் விளைச்சல், மதிப்புக்கூட்டலை விளக்கினார்.

ஆவாரம்பூ தேனீர், தூதுவளை தேனீர் போன்றவற்றையும் உற்பத்தி செய்யும் ராஜேஷ்கண்ணன், “ஆவாரம்பூ ஆண்டு முழுக்க கிடைக்கும். ஆவாரம்பூ டீயில ஆவாரம்பூ, கடுக்கா, சுக்கு, வால்மிளகு, திப்பிலி எல்லாம் கலந்து செய்யறோம். தூதுவளை டீயில சுக்கு மிளகு எல்லாம் கலந்து பண்றோம்” என செய்முறையை விளக்கினார். இவர், மால்ட் எனும் சத்துபானங்களில் பீட்ரூட் மால்ட், ஏபிசி மால்ட், மஞ்சள் மால்ட் என 3 வகைகளை உற்பத்தி செய்கிறார். ``ஏபிசி என ஆப்பிள் பீட்ரூட் கேரட் மால்ட் செய்றோம். இதுக்கான ஆப்பிள், பீட்ரூட்டை ஊட்டி ஆர்கானிக் விவசாயிகள் கிட்ட இருந்து வாங்கறோம். இதையெல்லாம் சுத்தப்படுத்தி, நறுக்கி, உலர்த்தி, பொடியாக்கி `ஏபிசி மால்ட்’ செய்றோம். மஞ்சள் மால்ட்டுக்கு பச்சை மஞ்சள், நாட்டுச்சர்க்கரை, பாதாம், முந்திரி, ஏலக்காய் சேர்த்து காய்ச்சறோம். அதை காய்ச்சி, ஆறவைத்து, உலர்த்தி, பொடியாக்கி மஞ்சள் மால்ட் செய்றோம்’’ என்றார்.

“2016லயே இயற்கை விவசாயம் செய்ய ஆரம்பிச்சேன். 2019லதான் ஆசிரியர் வேலையை விட்டுட்டு முழுநேர விவசாயியா ஆனேன். வேற தொழில்ல இருந்து இயற்கை விவசாயம் செய்ய இறங்கும்போது, இருக்குற வேலையை சட்டுன்னு விட்டுட்டு வந்துடக் கூடாது. இருக்குற வேலையையும் பாத்துக்கிட்டு, பகுதிநேரமா வேலையாளா இருந்து விவசாயத்தை செய்யணும். இது நமக்கு பொருந்தி வந்த பிறகுதான் வேலையை விட்டுட்டு முழுநேர விவசாயத்தில் இறங்கணும். இதுல இருக்குற சிரமங்களையும் எதிர்கொள்ளணும். எங்க பொருட்களை இனியாள் எனும் பெயரில் சந்தைப்படுத்தறோம். நான் முதல்ல மதிப்புக்கூட்டி பொருட்களை வித்தப்ப மாசத்துக்கு ரெண்டாயிரம் ரூபாய் கிடைக்கறதே கஷ்டம். அப்புறம் கொஞ்சம் கொஞ்சமா விற்பனை அதிகரிச்சது. ஃபேஸ்புக், இன்ஸ்டாகிராம், வாட்ஸப்ன்னு சோஷியல் மீடியாவும், நம்ம கிட்ட வாங்கிய வாடிக்கையாளர்கள், அவங்களோட நண்பர்கள், உறவினர்கள்கிட்ட செய்ற வாய்வழி விளம்பரமும்தான் எங்களோட மார்க்கெட்டிங். 2020ம் ஆண்டுல இருந்து விற்பனை நல்லா அதிகரிச்சது. விவசாயம் சார்ந்த மதிப்புக்கூட்டிய 180 தயாரிப்புகள் எங்க ப்ராண்ட்ல இருக்கு. இப்போ மாசத்துக்கு சராசரியா 1000 சோப் விக்கறோம். தூதுவளை தேனீர், ஆவாரம்பூ தேனீர், அருகம்புல் சூப், மால்ட் பொருட்கள் எல்லாம் நல்லா விக்குது. மாசத்துக்கு சராசரியா 2 லட்சம் ரூபாய்க்கு வியாபாரம் நடக்குது. இதுல மூலதனம், செலவெல்லாம் போக மாசத்துக்கு சுமார் முப்பதாயிரம் ரூபாய் லாபம் கிடைக்குது” என தனது அனுபவ அறிவுரை, வருவாயின் வளர்ச்சி ஆகியவற்றை நிறைவாகச் சொன்னார்.

தொடர்புக்கு:

தி.ராஜேஷ்கண்ணன்:

99525 30890