அறியலாம் ஆப்ஸ்
கையா ஹெல்த்!
கையா ஹெல்த் (Kaia Health) செயலி… முதுகுவலி, கழுத்துவலி, மூட்டு வலி போன்ற தசை மற்றும் எலும்பு தொடர்பான பிரச்சினைகளுக்கு டிஜிட்டல் முறையில் உதவி வழங்கும் செயலி. உடல் வலியால் பாதிக்கப்பட்டவர்கள் மருத்துவமனைக்குச் செல்லும் நேரம் கிடைக்காதபோது அல்லது வீட்டிலிருந்தபடியே வழிகாட்டுதலைப் பெற விரும்பும்போது இந்த செயலி பயனுள்ளதாக இருக்கிறது.
இந்த செயலியின் முக்கிய சிறப்பு உடற்பயிற்சி, உடல் இயக்கம், வலி மேலாண்மை மற்றும் மனநல ஆதரவு ஆகியவற்றை ஒருங்கிணைத்து வழங்குகிறது. பயனரின் உடல்நிலை, வலியின் தன்மை மற்றும் தினசரி செயல்பாடு களைப் பொறுத்து தனிப்பயனாக்கப்பட்ட பயிற்சிகளை இது பரிந்துரைக்கிறது. குறிப்பாக நீண்டகால முதுகுவலியால் அவதிப்படுபவர்களுக்கு மெதுவான நீட்டிப்பு பயிற்சிகள் மற்றும் தசைகளை வலுப்படுத்தும் இயக்கங்களை கற்றுத்தருகிறது.
இந்தச் செயலி வழங்கப்படும் பயிற்சிகள் வீடியோ வடிவில் இருப்பதால், பயனர்கள் எளிதாகப் பின்பற்ற முடியும். தவறான உடல் நிலை, நீண்ட நேரம் அமர்ந்து வேலை செய்வது, குறைந்த உடல் இயக்கம் போன்ற காரணங்களால் ஏற்படும் வலிகளை குறைக்க உதவும் வழிமுறைகளும் இதில் இடம்பெற்றுள்ளன. வலியைக் குறைப்பதோடு மட்டுமல்லாமல், எதிர் காலத்தில் அதே பிரச்சினை மீண்டும் வராமல் தடுக்கும் வாழ்க்கைமுறை மாற்றங்களையும் இது ஊக்குவிக்கிறது.
நாள்பட்ட வலியுடன் வாழும் பலருக்கு உடல் வலியுடன் சேர்ந்து மன அழுத்தம் மற்றும் பதற்றமும் ஏற்படலாம். இதைக் கருத்தில் கொண்டு, தியானம், சுவாசப் பயிற்சி மற்றும் மன அமைதியை மேம்படுத்தும் அம்சங்களையும் கையா ஹெல்த் செயலி வழங்குகிறது. இதனால் வலி பற்றிய பயம் குறைந்து, பயனர்களின் நம்பிக்கை அதிகரிக்கிறது.
மருத்துவ ஆராய்ச்சிகளை அடிப்படையாகக் கொண்டு உருவாக்கப்பட்ட இந்த செயலி, வீட்டிலிருந்தபடியே பாதுகாப்பாக உடற்பயிற்சி செய்ய உதவுவதால் உலகளவில் பலரால் பயன் படுத்தப்படுகிறது. குறிப்பாக முதுகுவலி மற்றும் மூட்டு வலி காரணமாக அடிக்கடி மருத்துவமனைக்கு செல்ல முடியாதவர்களுக்கு இது ஒரு பயனுள்ள டிஜிட்டல் உடல்நலத் துணையாக செயல்படுகிறது. எனினும் வலி தீவிரமாகவும் நாள்பட்டும் இருக்கும் பட்சத்தில் மருத்துவர் ஆலோசனைகள் பெற்று இந்த செயலியைப் பயன்படுத்தவும்.
