டெல்லி உட்பட 11 முக்கிய நகரங்களை ஒப்பிடுகையில் சென்னை, பெங்களூருவில் காற்று மாசு ‘திருப்திகரம்’: ஆய்வறிக்கையில் வெளியான அதிர்ச்சித் தகவல்

மும்பை: ‘கிளைமேட் ட்ரெண்ட்ஸ்’ எனும் சுற்றுச்சூழல் ஆய்வு நிறுவனம் கடந்த 2015 முதல் 2025 நவம்பர் வரையிலான காலகட்டத்தில் இந்தியாவின் 11 முக்கிய நகரங்களின் காற்று மாசின் அளவை ஆய்வு செய்தது. இந்த நீண்டகால ஆய்வின் முடிவில், நாட்டின் முன்னணி நகரங்கள் எதுவும் பாதுகாப்பான காற்றுத் தரக் குறியீட்டை (ஏக்யூஐ) எட்டவில்லை என்ற கவலைக்குரிய தகவல் வெளியாகியுள்ளது. குறிப்பாகத் தலைநகர் டெல்லி தொடர்ந்து அதிக மாசுபட்ட நகரமாகவே நீடித்து வருகிறது. அங்கு 2016ம் ஆண்டில் காற்று மாசின் அளவு உச்சத்தைத் தொட்ட நிலையில், தற்போதும் ஆபத்தான நிலையிலேயே நீடிக்கிறது. கடந்த பத்தாண்டுகளில் லக்னோ, வாரணாசி மற்றும் அகமதாபாத் போன்ற நகரங்களில் காற்றின் தரம் முதற்பாதியில் மிகவும் மோசமாக இருந்தாலும், பிற்பாதியில் சற்று முன்னேற்றம் கண்டுள்ளது.

தென்னிந்திய நகரங்களான சென்னை, பெங்களூரு, புனே மற்றும் மும்பை போன்றவற்றில் காற்றின் தரம் வட மாநிலங்களை விடச் சற்று சிறப்பாக இருந்தாலும், இவையும் ‘நன்று’ என்ற வகைப்பாட்டிற்குள் வரவில்லை. நாட்டிலேயே குறைந்த அளவாகப் பெங்களூருவில் மாசு பதிவாகியிருந்தாலும், அதுவும் முழுமையான தூய்மையான காற்று என்ற வரம்பிற்குள் வரவில்லை என்பது குறிப்பிடத்தக்கது. வாகனப் புகை, தொழிற்சாலைக் கழிவுகள் மற்றும் பயிர்க்கழிவுகளை எரித்தல் ஆகியவை காற்று மாசு அதிகரிப்பதற்கு முக்கிய காரணங்களாக அமைந்துள்ளன. வட மாநிலங்களில் இமயமலைத் தொடர் காற்றைத் தடுத்து நிறுத்துவதாலும், இந்தோ-கங்கைச் சமவெளியின் புவியியல் அமைப்பு கிண்ணம் போல் செயல்படுவதாலும் மாசு அங்கேயே தேங்கி விடுகிறது. மேலும், குளிர்காலத்தில் ஏற்படும் வெப்பநிலை மாற்றத்தால் மாசு வளிமண்டலத்தின் கீழ் அடுக்குகளிலேயே சிக்குகிறது.

அடர்த்தியான நகரக் கட்டமைப்புகளும், உயரமான கட்டிடங்களும் காற்றின் வேகத்தைக் குறைத்து மாசை வெளியேற விடாமல் செய்கின்றன. புதிய ஆய்வறிக்கையின்படி, மிகவும் மோசமாக மாசுபட்ட 4 நகரங்களில் டெல்லி (213.6), லக்னோ (172.2), வாரணாசி (150.3), அகமதாபாத் (138.1) ஆகிய நகரங்கள் உள்ளன. குறைந்த அளவு மாசுபட்ட 4 நகரங்கள் பட்டியலில், மும்பை (104.3), புனே (101.5), சென்னை (84.6), பெங்களூரு (74.9) ஆகிய நகரங்கள் உள்ளன. இந்தப் பட்டியலில் உள்ள எந்த நகரமும் ‘நல்ல’ (Good) காற்றுத் தரப் பிரிவில் (0-50 ஏக்யூஐ) இடம்பெறவில்லை. அதேநேரம் மும்பை மற்றும் சென்னை ஆகிய நகரங்கள் ‘திருப்திகரமான’ நிலைக்குக் கீழே உள்ளன. இதுகுறித்து ‘ஸ்கைமெட்’ வானிலை மையத்தின் துணைத் தலைவர் மகேஷ் பலாவத் கூறுகையில், ‘வளிமண்டலத்தில் உள்ள மாசுப் துகள்கள் மழையினால் அடித்துச் செல்லப்படாவிட்டால், அவை நீண்ட நேரத்திற்கு அங்கேயே தங்கி விடுகின்றன. இதனால் புகை மூட்டம் போன்ற சூழல் நீடிக்கிறது.

இந்த ஆண்டு வடமேற்கு இந்தியாவில் போதிய மழைப்பொழிவு இல்லாததால் காற்று மாசு அதிகரித்துள்ளது’ என்று தெரிவித்தார். மேலும் தொழில்நுட்பத்தின் உதவியுடன் உள்ளூர் அளவிலான காற்று மாசைக் குறைக்க முடியும் என கான்பூர் ஐஐடி பேராசிரியர் எஸ்.என்.திரிபாதி நம்பிக்கை தெரிவித்துள்ளார். அதேவேளையில், ‘இந்தியாவுக்கு நீண்டகால அறிவியல் சார்ந்த கொள்கை மாற்றங்களும், கடுமையான முடிவுகளை எடுப்பதற்கான உண்மையான அரசியல் உறுதியும் தேவை’ என்று கிளைமேட் ட்ரெண்ட்ஸ் நிறுவனத்தின் ஆய்வாளர் பாலக் பல்யான் வலியுறுத்தியுள்ளார். இத்தகைய ஒருங்கிணைந்த நடவடிக்கைகளால் மட்டுமே எதிர்காலத்தில் சுவாசிக்கத் தகுந்த காற்றை உறுதி செய்ய முடியும் என்று ஆய்வறிக்கை சுட்டிக்காட்டுகிறது. வாகனப் புகை, தொழிற்சாலை நடவடிக்கைகள் மற்றும் பயிர்க் கழிவுகளை எரித்தல் ஆகியவை காற்று மாசுபடுவதற்கு முக்கிய காரணங்களாகக் குறிப்பிடப்பட்டுள்ளன.