மணல் கடத்தலில் ஈடுபட்ட அதிமுக நிர்வாகி கைது: 2 லாரி, ஜேசிபி பறிமுதல்

திருச்சி: திருச்சி அருகே மணல் கடத்தலில் ஈடுபட்ட அதிமுக நிர்வாகி உள்பட 4 பேர் கைது செய்யப்பட்டனர். திருச்சி மாவட்டம் தொட்டியம் அருகே உள்ள காட்டுப்புத்தூர் காவிரி ஆற்றில் இரவு நேரங்களில் சட்ட விரோதமாக மணல் கடத்தப்படுவதாக எஸ்பி செல்வநாகரத்தினத்துக்கு தகவல் வந்தது. இதையடுத்து, எஸ்பி உத்தரவின் பேரில் தனிப்படை போலீசார் இரவில் காட்டுப்புத்தூர் தொட்டியம் செல்லும் சாலையில் மேல காரைக்காடு பகுதியில் தீவிர ரோந்து பணியில் ஈடுபட்டனர். அப்போது அந்த வழியாக வந்த ஜேசிபி, இரண்டு டிப்பர் லாரிகள், ஒரு மாட்டு வண்டியை நிறுத்தி சோதனை செய்தனர்.

அப்போது அவர்கள் காரைக்காடு காவிரி ஆற்றில் இருந்து அனுமதி இன்றி மணல் கடத்தி வந்தது தெரியவந்தது. இதையடுத்து வாகனங்கள், மாட்டு வண்டியை தனிப்படை போலீசார் பறிமுதல் செய்து காட்டுப்புத்தூர் போலீசில் ஒப்படைத்தனர். இதுதொடர்பாக போலீசார் விசாரணை மேற்கொண்டதில், மணல் கடத்தலில் ஈடுபட்டது அதிமுக மாவட்ட எம்ஜிஆர் மன்ற துணை செயலாளர் மேலகரக்காடு கோவிந்தராஜ்(53), கவியரசு(30), சக்திவேல்(40), விக்னேஷ்(28) என தெரியவந்தது. இதுகுறித்து போலீசார் வழக்கு பதிந்து 4 பேரையும் நேற்று கைது செய்தனர்.