பல வருடங்கள் சேமிப்பை கல்விக்குக் கொடையாகக் கொடுத்த பேராசிரியர் தம்பதி

ஓய்வுபெற்ற பிறகு தங்களுடைய வாழ்க்கையை எப்படி நடத்த வேண்டும் என்று பலரும் திட்டமிடுவார்கள். பல ஆண்டுகள் உழைத்துச் சம்பாதித்த பணத்தைச் சேமித்து வைத்து, வயதான காலத்தில் நிம்மதியாக வாழ வேண்டும் என்பதுதான் பெரும்பாலானவர்களின் ஆசையாக இருக்கும். ஆனால் அசாமைச் சேர்ந்த பேராசிரியர் தம்பதி, தங்களுடைய ஓய்வுக்காலத்துக்காகச் சேமித்து வைத்திருந்த ரூ.1 கோடியை அடுத்த தலைமுறையின் கல்விக்காகக் கொடுத்து, அந்த வழக்கமான எண்ணத்தையே மாற்றியிருக்கிறார்கள்.

அசாமின் காட்டன் கல்லூரியில் நாற்பது ஆண்டுகளுக்கும் மேலாகப் பணியாற்றியவர்கள் பேராசிரியர் பன்னாலால் கோஸ்வாமி, அவரது மனைவி பேராசிரியர் நந்திதா பட்டாச்சார்யா கோஸ்வாமி. இருவரும் ஆசிரியர் பணியை வெறும் வேலையாகப் பார்க்கவில்லை. கல்வி என்பது ஒருவருடைய வாழ்க்கையை மட்டும் மாற்றுவதல்ல; ஒரு தலைமுறையையே மாற்றக்கூடிய சக்தி என்ற நம்பிக்கையுடன் தங்கள் பணியை மேற்கொண்டனர்.

பன்னாலால் கோஸ்வாமி வேதியியல் பேராசிரியர். அவரது மனைவி நந்திதா பட்டாச்சார்யா கோஸ்வாமி சமஸ்கிருதப் பேராசிரியராகப் பணியாற்றியவர். பின்னர் அதே கல்லூரியில் துணை முதல்வராகவும் பொறுப்பு வகித்தார். இருவரும் 2009ஆம் ஆண்டு ஓய்வுபெற்றனர். ஆனால் ஆசிரியர் பணியிலிருந்து ஓய்வு பெற்றாலும், கல்வியுடனான அவர்களுடைய தொடர்பு மட்டும் முடிவுக்கு வரவில்லை.

அரசுப் பணியில் இருந்த காலத்தில் கிடைத்த வருமானத்தில் இருந்து அவர்கள் சிறுகச் சிறுகச் சேமித்து வந்தனர். ஆடம்பரமான வாழ்க்கையைத் தேடாமல், தேவைக்கேற்ப செலவு செய்து மீதமுள்ள பணத்தை எதிர்காலத்துக்காக வைத்தனர். ஆண்டுகள் கடந்து சென்றன. அவர்கள் சேமித்த தொகையும் படிப்படியாக அதிகரித்தது. ஒரு கட்டத்தில் அந்தச் சேமிப்பு ரூ.1 கோடியை எட்டியது.

அந்த நேரத்தில், அந்தப் பணத்தை என்ன செய்வது என்ற கேள்வி அவர்களுக்குள் எழுந்தது. வயதான காலத்தில் தங்களுடைய வசதிக்காக வைத்துக்கொள்ளலாம். பிள்ளைகளுக்குக் கொடுக்கலாம். ஏதாவது சொத்து வாங்கலாம். இப்படிப் பல வழிகள் அவர்களுக்குக் கிடைத்திருக்கலாம். ஆனால் அவர்கள் எடுத்த முடிவு முற்றிலும் வேறுபட்டது.

அசாமில் உள்ள குமார பாஸ்கர் வர்மா சமஸ்கிருத மற்றும் பண்டைய ஆய்வுகள் பல்கலைக்கழகத்துக்கு தங்கள் சேமிப்பான ரூ.1 கோடியையும் நன்கொடையாக வழங்க முடிவு செய்தனர். சமஸ்கிருதம், இந்தியாவின் பண்டைய அறிவு மரபுகள், வரலாறு உள்ளிட்ட துறைகளில் கல்வி மற்றும் ஆராய்ச்சியை முன்னெடுத்து வரும் இந்தப் பல்கலைக்கழகத்துக்கு, தங்களுடைய வாழ்நாள் சேமிப்பை வழங்க வேண்டும் என்று அவர்கள் நினைத்தனர்.

பல ஆண்டுகளாகச் சேமித்த பணத்தை ஒரே நாளில் கொடுத்துவிடுவது எளிதான முடிவு அல்ல. அதிலும் அது அவர்களுடைய ஓய்வுக்காலத்துக்காக வைத்திருந்த பணம். இருந்தாலும், அந்தப் பணம் தங்களிடம் இருப்பதைவிட மாணவர்களின் கல்விக்கும் ஆராய்ச்சிக்கும் பயன்பட்டால் அதற்கு இன்னும் பெரிய அர்த்தம் இருக்கும் என்று அவர்கள் கருதினர்.

“பணம் எங்களுக்கு ஒரு சுமையாகிவிட்டது. மக்களின் பணத்தை மக்களுக்கே திருப்பிக் கொடுத்ததன் மூலம் அந்தச் சுமையை நாங்கள் குறைத்துக் கொண்டோம்” என்பதுதான் அவர்களின் எண்ணம்.

அவர்கள் அரசுப் பணியில் இருந்தவர்கள். மக்களின் வரிப்பணத்தில் இருந்து கிடைத்த சம்பளத்தைப் பெற்றுத்தான் வாழ்க்கையை நடத்தினர். அதனால் தாங்கள் சம்பாதித்து சேமித்த பணமும் இறுதியில் சமூகத்துக்கே திரும்பிச் செல்ல வேண்டும் என்ற எண்ணம் அவர்களிடம் இருந்திருக்கிறது. அந்த எண்ணம்தான் அவர்களுடைய வாழ்நாள் சேமிப்பை ஒரு பெரிய நன்கொடையாக மாற்றியுள்ளது.

இந்த ரூ.1 கோடி இனி அந்தத் தம்பதியின் வங்கிக் கணக்கில் இருக்கப்போவதில்லை. அது மாணவர்களின் கல்வியாக மாறப்போகிறது. ஆராய்ச்சிக்கான உதவியாக மாறப்போகிறது. பழமையான அறிவு மரபுகளைத் தேடும் புதிய தலைமுறையினருக்கு ஒரு வாய்ப்பாக மாறப்போகிறது. ஒருவருடைய வாழ்நாள் உழைப்பில் சேமிக்கப்பட்ட பணம், இனி பலருடைய வாழ்க்கையைத் தொடப்போகிறது.

பேராசிரியர்களாக அவர்கள் நாற்பது ஆண்டுகளுக்கும் மேலாக மாணவர்களுக்குப் பாடம் கற்றுக் கொடுத்திருக்கிறார்கள். ஆனால் ஓய்வுக்குப் பிறகு அவர்கள் செய்த இந்தச் செயல், அவர்கள் வகுப்பறையில் கற்றுக் கொடுத்த எந்தப் பாடத்தையும் விடப் பெரியதாக இருக்கிறது.

வாழ்க்கையில் சம்பாதிப்பதும் சேமிப்பதும் அவசியம்தான். ஆனால் நாம் சம்பாதித்ததில் ஒரு பகுதி மற்றவர்களின் வாழ்க்கையை மேம்படுத்தும்போது, அந்தச் செல்வத்திற்கு இன்னொரு அர்த்தம் கிடைக்கிறது. தங்களுடைய வாழ்நாள் சேமிப்பை அடுத்த தலை முறையின் அறிவுக்காக வழங்கிய இந்தப் பேராசிரியர் தம்பதி, அதைச் செயலில் நிரூபித்திருக்கிறார்கள்.

அவர்கள் கொடுத்தது வெறும் ரூ.1 கோடி அல்ல. பல ஆண்டுகளாக உழைத்து உருவாக்கிய ஒரு நம்பிக்கையை அவர்கள் கொடுத்திருக்கிறார்கள். கல்வி மீது வைத்திருந்த நம்பிக்கையை கொடுத்திருக்கிறார்கள். தங்களுக்குப் பிறகு வரும் தலைமுறையும் அறிவால் வளர வேண்டும் என்ற கனவை கொடுத்திருக்கிறார்கள்.

- எஸ். ஆர்த்தி

ஆஹா வெந்தயம்!

*வெந்தயத்தை தயிருடன் ஊற வைத்து சாப்பிட்டால் சீதபேதி குணமாகும்.

*குழந்தை பெற்ற தாய் மார்கள், ஏலக்காய் சிறிது ஊற வைத்த வெந்தயத்தை சாப்பிட்டு வர பால் அதிகம் சுரக்கும். குழந்தை கொழு கொழு என ஆகும்,

*வெந்தயம், உளுந்து, அரிசி, கருப்பட்டி இவை களைக் கொண்டு களி செய்து சாப்பிட்டால் கோடை உஷ்ணம் தாக்காது.

*வெந்தயத்தில் இரும்புச் சத்து உள்ளதால் இரத்த அழுத்தத்திற்கு ஏற்றதாகும்.

*ஒரு ஏலக்காய் விதையுடன் சிறிது வெந்தயத்தைச் சேர்த்து சாப்பிட்டால் தொடர் வாந்தி நிற்கும்.

மஞ்சள், வெந்தயம், சின்ன வெங்காயம் ஆகியவற்றை அரைத்து தீக்காயம், தீப் புண், மீது பூசி வர புண் விரைவில் ஆறும்.

*மலச்சிக்கல் உள்ளவர்கள் காலை உணவுக்கு முன்பு சிறிது வெந்தயத் துடன் இரண்டு சின்ன வெங்காயத்தைச் சேர்த்து சாப்பிட்டு வர மலச் சிக்கல் அகலும்.

*அவுரி இலையுடன், சிறிது வெந்தயம், மிளகு, சேர்த்து கசாயம் செய்து குடித்தால் விஷம் முறியும்.