சமூக வலைதளங்கள் மூலம் நிறவெறி தூண்டல்; மணமகனின் நிறத்தை வைத்து கிண்டல்: வைரலாகும் 11 ஆண்டுகால காதல் ஜோடி

போபால்: காதல் திருமணப் புகைப்படத்தை பார்த்துத் தனது நிறத்தைக் கேலி செய்தவர்களுக்கு மணமகன் தக்க பதிலடி கொடுத்துள்ளார். மத்தியப் பிரதேசத்தைச் சேர்ந்த ரிஷப் ராஜ்புத் மற்றும் சோனாலி சவுக்கி ஆகியோர் கடந்த 11 ஆண்டுகளாக காதலித்து வந்த நிலையில், இருவீட்டார் சம்மதத்துடன் அண்மையில் திருமணம் செய்துகொண்டனர். இவர்களது திருமணப் புகைப்படங்கள் சமூக வலைதளங்களில் வெளியானதைத் தொடர்ந்து, மணமகனின் கருப்பு நிறத்தைச் சுட்டிக்காட்டி பலரும் மோசமான கருத்துகளைப் பதிவிட்டிருந்தனர். அழகாக இருக்கும் மணப்பெண், கருப்பு நிறத்தில் இருக்கும் இவரை எதற்காகத் திருமணம் செய்தார் என்றும், பணத்திற்காகத் திருமணம் செய்தாரா என்றும் சமூகதள வாசிகள் பலர் நிறவெறியைத் தூண்டும் வகையில் கேள்விகளை எழுப்பி விமர்சித்திருந்தனர்.

இந்நிலையில், தன் மீதான விமர்சனங்களுக்கு மணமகன் ரிஷப் ராஜ்புத் நெகிழ்ச்சியாகவும், அதிரடியாகவும் பதிலளித்துள்ளார். இது குறித்து அவர் கூறுகையில், ‘இந்தத் திருமண தருணத்திற்காக நான் கிட்டத்தட்ட 11 ஆண்டுகள் காத்திருந்தேன். நான் அரசு ஊழியர் இல்லை என்றாலும், என் குடும்பத்தைக் கவனித்துக் கொள்ளும் அளவிற்கு நல்ல வருமானம் ஈட்டுகிறேன். என்னிடம் ஏதுமில்லாத காலத்திலிருந்தே அவர் (சோனாலி சவுக்கி) என்னை நேசித்தார். கல்லூரி நாட்களில் இருந்தே என் வாழ்வின் இன்ப, துன்பங்களில் எனக்குத் துணையாக நின்றார். அதனால் உங்களின் கருத்துகளைப் பற்றிக் கவலையில்லை’ என்று தெரிவித்துள்ளார். மணமகனின் இந்தத் துணிச்சலான பதிலடிக்குப் பிறகு, பலரும் நிறவெறிக்கு எதிராகக் குரல் கொடுத்து தம்பதிக்கு ஆதரவு தெரிவித்து வருகின்றனர்.