*பொதுமக்கள் எதிர்பார்ப்பு
நீடாமங்கலம் : நீடாமங்கலம் அருகே பழுதடைந்த மேலாளவந்தச்சேரி ஊராட்சி அலுவலகம் சீரமைக்க வேண்டும் என்று பொதுமக்கள் எதிர்பார்க்கின்றனர்.
திருவாரூர் மாவட்டம் நீடாமங்கலம் அருகே காரிச்சாங்குடி கீழத் தெருவில் உள்ளது, மேலாளவந்தச்சேரி ஊராட்சி மன்ற அலுவலகம். இந்த அலுவலகம் 1990ம் ஆண்டு கட்டப்பட்டு செயல்பட்டு வருகிறது. 1,648 மக்கள் தொகை கொண்ட ஊராட்சியாக உள்ளது.
இந்த ஊராட்சி அலுவலகத்தின் உள்பகுதியில் போர்டிக்கல் மற்றும் மின் மீட்டர் உள்ள இடம், அலுவலக கோப்புகள் வைக்கப்பட்டுள்ள இடம் உள்ளிட்ட பல்வேறு இடங்களில் சிமெண்ட் காரைகள் பெயர்ந்து கம்பிகள் தெரிகிறது. மழை காலங்களில் மழைநீர் உள்ளே கசியும் போது சிமெண்ட் காரைகள் கீழே விழுகிறது.
இதனால் ஊராட்சி தலைவர், ஊராட்சி செயலாளர் உள்ளிட்ட ஊராட்சியில் பணிபுரியும் பணியாளர்கள் அலுவலகத்திற்கு வர அச்சப்படுகின்றனர்.தங்களது கிராமத்தில் அத்தியாவசிய தேவைகளையும், குறைபாடுகளை ஊராட்சி தலைவரிடம் தெரிவிக்க ஊராட்சி அலுவலகத்திற்கு வருவதற்கே மக்கள் அச்சமாக உள்ளது. எனவே சம்மந்தப்பட்ட துறை அதிகாரிகள் மேலாளவந்தச்சேரி ஊராட்சி அலுவலகத்தை நேரில் பார்வையிட்டு புதிய ஊராட்சி அலுவலகம் கட்ட நடவடிக்கைஎடுக்க வேண்டும் என்றனர்.
