55-60 வயதில் பெண்கள் திருப்புமுனை சந்திக்கும் நேரம்!

நன்றி குங்குமம் டாக்டர்

செவ்விது செவ்விது பெண்மை!

மீனா: ஒரு பெண்ணின் வாழ்க்கையில் 55 முதல் 60 வயது வரை என்பது மிகவும் முக்கியமான காலமாகும். இந்த வயது கட்டம் வாழ்க்கையின் நடுவில் இருந்து முதியவர்களின் நிலைக்கு நகரும் ஒரு இடைநிலையாக இருக்கிறது. குழந்தைகள் பெரும்பாலும் பெரியவர்களாகி தங்கள் வாழ்க்கையில் நிலைபெறத் தொடங்கும் காலம் இது. குடும்பப் பொறுப்புகள் குறையத் தொடங்கினாலும், உடலும் மனமும் புதிய மாற்றங்களை சந்திக்க ஆரம்பிக்கும். இந்த காலம் வெறும் வயதாகும் நிலையல்ல; அது உடல் மாற்றங்களையும், மன வலிமையையும், வாழ்க்கையை மீண்டும் அமைக்கும் வாய்ப்பையும் கொண்ட ஒரு முக்கியமான பருவம்.

ரேவதி: ஆமாம். இந்த வயது பெண்களின் வாழ்க்கையில் உண்மையில் ஒரு புதிய கட்டம் தொடங்கும் நேரம். இந்த நேரத்துல நம்ம என்ன என்ன மாற்றங்களை எதிர்கொள்கிறோம் அக்கா. நீ தான் நெறைய ரேடியோல எல்லாம் பேசி இருக்கல கொஞ்சம் எனக்கும் சொல்லேன் நானு என்னனு தெரிஞ்சுகுறேன்.

மீனா: உனக்கு சொல்லாமலா.. முதல் மற்றம் நம்ம உடல்ல ஏற்படுற மாதவிடாய் நிறைவுதான். இந்த வயதிற்கு வந்த பெண்களில் பெரும்பாலானவர்கள் மெனோபாஸ் (மாதவிடாய் நிறைவு) நிலையை கடந்திருக்கிறார்கள். இதனால் ஈஸ்ட்ரஜன், புரோஜெஸ்ட்ரோன் போன்ற ஹார்மோன்களின் அளவு குறைகிறது.

ரேவதி: அந்த ஹார்மோன் குறையுறதால நமக்கு என்ன பிரச்சனைகள் எல்லாம் வருது அக்கா.

மீனா: அதன் காரணமாக சில முக்கியமான உடல் மாற்றங்கள் ஏற்படுகின்றன. முதலில் குறிப்பிட வேண்டியது எலும்பு ஆரோக்கியம். ஈஸ்ட்ரஜன் குறைவதால் எலும்பின் அடர்த்தி குறைந்து ஆஸ்டியோபோரோசிஸ் ஏற்படும் வாய்ப்பு அதிகரிக்கிறது. இதனால் சிறிய விழுதலும் கூட எலும்பு முறிவை ஏற்படுத்தலாம்.அதேபோல் இதயநோய் அபாயமும் அதிகரிக்கிறது. இளமையில் பெண்களை இதய நோயிலிருந்து பாதுகாக்கும் ஹார்மோன் தாக்கம் குறைவதால், உயர் இரத்த அழுத்தம், கொலஸ்ட்ரால் அதிகரிப்பு, மற்றும் இதய நோய்கள் உருவாகும் வாய்ப்பு அதிகரிக்கிறது.

ரேவதி: இன்னும் வேற என்ன பிரச்சனை எல்லாம் இதனால வருது அக்கா ?

மீனா: இதோ சொல்றேன் ரேவதி. இந்த வயதில் பல பெண்கள் வயிற்றுப் பகுதியில் கொழுப்பு சேர்வதை கவனிக்கலாம். இது உடல் அழகை மட்டும் பாதிப்பதில்லை; அது சர்க்கரை நோய் மற்றும் மெட்டபாலிக் சிண்ட்ரோம் போன்ற பிரச்சனைகளுக்கு வழிவகுக்கலாம்.மேலும் தூக்க குறைபாடுகள் இந்த காலத்தில் பொதுவாக காணப்படுகின்றன.

ரேவதி: அதனால்தான் இந்த வயதில் பெண்கள் தங்களுடைய உடல்நலத்தை அதிக கவனத்துடன் பார்த்துக்கொள்ள வேண்டும்னு சொல்றாங்க போல.

மனநலம் மற்றும் மூளை செயல்பாடு

மீனா: இந்த வயதில் பெண்கள் சில நேரங்களில் நினைவாற்றல் குறைவு, கவனம் சிதறுதல் போன்ற அனுபவங்களைப் பகிர்கிறார்கள். பெரும்பாலும் இது வயதின் இயல்பான மாற்றமாகவே இருக்கும். ஆனால் இந்த வயது பெண்களுக்கு மனதளவிலும் ஒரு முக்கியமான காலம். தமிழக குடும்ப அமைப்பில், ஒரு பெண் தனது வாழ்க்கையின் பெரும்பகுதியை குடும்பத்திற்காகவும், குழந்தைகளுக்காகவும் செலவழித்திருக்கிறார்.

குழந்தைகள் திருமணம் செய்து தனி வாழ்க்கை தொடங்கும் போது, சில பெண்களுக்கு தனிமை உணர்வு ஏற்படலாம். சிலருக்கு இது ஒரு புதிய சுதந்திரம் போலவும் தோன்றலாம். மனஅழுத்தம், கவலை, மற்றும் மனச்சோர்வு (Depression) சில பெண்களுக்கு இந்த காலத்தில் அதிகரிக்கலாம், குறிப்பாக கணவர் ஓய்வு பெற்ற பிறகு வாழ்க்கை மாற்றம், குடும்ப உறுப்பினரை இழத்தல், குழந்தைகள் வெளிநாடு அல்லது வேறு நகரம் செல்லுதல் போன்ற சூழ்நிலைகளில். ஆனால் அதே நேரத்தில், இந்த வயது பெண்கள் அனுபவமும் அறிவும் நிறைந்தவர்களாக இருப்பார்கள்.

ரேவதி: ஆமாம். வாழ்க்கை அனுபவம் இந்த வயதில் பெரிய வலிமையாக இருக்கும்.

முதியோர் மருத்துவத்தின் முக்கியத்துவம்

மீனா: இந்த வயதில் பெண்களுக்கு தேவையான மருத்துவ பராமரிப்பு ஜெரியாட்ரிக் (geriatric) ஹெல்த் (முதியோர் மருத்துவம்) என்ற துறையில் அதிக கவனம் பெறுகிறது. பெண்கள் பொதுவாக ஆண்களை விட நீண்ட காலம் வாழ்கிறார்கள். அதனால் அவர்கள் முதியோர் உடல்நல பிரச்சனைகளை அதிகமாக சந்திக்கிறார்கள்.

இந்த வயதில் கவனிக்க வேண்டிய முக்கிய சோதனைகள்

*எலும்பு அடர்த்தி பரிசோதனை

*இரத்த அழுத்தம் பரிசோதனை

*சர்க்கரை நோய் பரிசோதனை

*மார்பகப் புற்றுநோய் பரிசோதனை

*கர்ப்பப்பைவாய்புற்று (Cervical cancer) பரிசோதனை

*கண் மற்றும் கேள்வித்திறன் பரிசோதனை

இந்த சோதனைகள் முறையாக செய்யப்படும்போது பின்னர் வரும் உடல்நல பிரச்சனைகளை தடுப்பது சாத்தியம்.

ரேவதி: ஆமாம். Regular Health check-up இந்த வயதில் மிகவும் அவசியம்.

மறைந்து இருக்கும் பிரச்சனை: முதியோர் மீதான துஷ்பிரயோகம்.

மீனா: இந்த வயது பெண்கள் சந்திக்கும் ஒரு பெரிய ஆனால் பேசப்படாத பிரச்சனை முதியோர் மீதான துஷ்பிரயோகம் (Elder Abuse) ஆகும். இது எப்போதும் உடல் வன்முறை மட்டுமாக இருக்காது.

அது பல வடிவங்களில் இருக்கலாம்

*கவனிக்காமல் விடுதல்

*பணத்தை தவறாக பயன்படுத்துதல்

*அவமதித்து பேசுதல்

*குடும்ப முடிவுகளில் புறக்கணித்தல்

தமிழக குடும்பங்களில், முன்பு குடும்பத்தின் மையமாக இருந்த பெண்கள் சில சமயம் வயது அதிகரித்த பிறகு புறக்கணிக்கப்படுவதாக உணரலாம். இது அவர்களுக்கு மனச்சோர்வு மற்றும் தனிமை உணர்வை அதிகரிக்கலாம்.அதனால் இந்த பிரச்சனை குறித்து சமூகத்தில் விழிப்புணர்வு ஏற்படுத்துவது மிகவும் அவசியம்.

ரேவதி: ஆமாம். முதியவர்களுக்கு மரியாதையும் பாதுகாப்பும் கிடைப்பது மிகவும் முக்கியம்.புதிய வாழ்க்கை கட்டத்தை உருவாக்கும் வாய்ப்பு.

மீனா: அனைத்து சவால்களுக்கும் நடுவிலும் இந்த வயது பெண்களுக்கு ஒரு முக்கியமான வாய்ப்பு உள்ளது. பல பெண்கள் இந்த காலத்தில்,

*ஆன்மிக பயணம்

*சமூக சேவை

*பெண்கள் குழு செயல்பாடுகள்

*பேரக்குழந்தைகளை வளர்த்தல்

போன்ற புதிய வாழ்க்கை அர்த்தங்களை உருவாக்குகிறார்கள்.

உடல் மற்றும் மன ஆரோக்கியத்தை பாதுகாக்க மூன்று முக்கிய விஷயங்கள் உதவும்:

1. தினசரி உடற்பயிற்சி: நடைபயிற்சி, யோகா போன்றவை எலும்பு மற்றும் தசைவலிமையை பாதுகாக்கும்.

2. சத்தான உணவு: கால்சியம், புரதம், காய்கறிகள், மற்றும் பழங்கள் அதிகம் உள்ள உணவு அவசியம்.

3. சமூக தொடர்புகள்: நண்பர்கள், குடும்பம், மற்றும் சமூக உறவுகள் மனநலத்தை பாதுகாக்கும்.

ரேவதி: ஆமாம். இந்த மூன்று விஷயங்கள் இருந்தால் இந்த வயதில் வாழ்க்கை ஆரோக்கியமாக இருக்கும்.

குடும்பத்தை கட்டிய பெண்களுக்கு சமூகத்தின் மரியாதை

மீனா: 55 முதல் 60 வயது பெண்கள் வாழ்க்கையின் பல சவால்களை கடந்து வந்தவர்கள். அவர்கள் குடும்பங்களை உருவாக்கியவர்கள், தலைமுறைகளை வளர்த்தவர்கள். அவர்களின் உடல்நலமும் மனநலமும் பாதுகாப்பது என்பது தனிப்பட்ட விஷயமல்ல. அது ஒரு சமூகத்தின் மனிதநேயத்தின் அளவுகோல்.

இந்த வயதில் பெண்களுக்கு தேவையானது மருந்துகள் மட்டும் அல்ல. அவர்களுக்கு தேவையானது மரியாதை, கவனம் மற்றும் அன்பு.

ரேவதி: மிக சரி. அந்த மரியாதையும் அன்பும் கிடைத்தால் இந்த வயது பெண்களின் வாழ்க்கை இன்னும் அர்த்தமுள்ளதாக இருக்கும்.

தொகுப்பு: மனநல மருத்துவர் மா . உஷா நந்தினி