நார்ச்சத்து நிறைந்த சிகப்பு அரிசி!

நன்றி குங்குமம் டாக்டர்

நாம் தினசரி எடுத்துக் கொள்ளும் உணவுகளில் அரிசிக்கு முக்கிய இடம் உண்டு. இந்த அரிசியில் பல வகைகள் உள்ளன அதில் ஒவ்வொன்றும் உடலுக்கு ஒவ்வொரு வித நன்மைகளை தருபவையாக இருக்கிறது. அந்தவகையில், சிகப்பு அரிசி சாப்பிடுவதால் உண்டாகும் நன்மைகள் என்ன பயன்கள் என்ன என்பதை தெரிந்து கொள்வோம்:

*சிகப்பு அரிசியை, தீட்டப்படாத அரிசி என்றும், முழு அரிசி என்றும் சரக்கு அரிசி என்றும் ஆங்கிலத்தில் பிரவுன் ரைஸ் என்றும் அழைக்கப்படுகிறது.

*சிகப்பு அரிசியில் நார்ச்சத்துகள் நிறைந்துள்ளதால், ரத்தத்தில் உள்ள கொலஸ்டராலின் அளவை குறைத்து ரத்தத்தை சீராக்கும் திறன் கொண்டது.

*சிகப்பரிசியில் வைட்டமின் பி6 நிறைந்துள்ளதால் இருதய நோய்களை தடுக்க உதவும், மேலும், மெக்னீசியம் சிகப்பு அரிசியில் நிறைந்துள்ளதால், மலக்கட்டு ஏற்படாமல், மலச்சிக்கலை சரி செய்ய உதவுகிறது.

*சிகப்பு அரிசியில் கார்போஹைட்ரேட்டு, மெக்னீசியம் அதிகம் உள்ளது. இது சர்க்கரை நோயை கட்டுக்குள் வைத்துக் கொள்ள உதவுகிறது.

*சிகப்பு அரிசியில் இருக்கும் எண்ணெய், நம் உடலில் இருக்கும் எல்.டி.எல் ( Low Density Lipoprotein) என்கிற கெட்ட கொழுப்பைக் குறைக்க உதவுகிறது.

*சிகப்பு அரிசியில் உள்ள தாது உப்புகள் கூந்தல், பற்கள், நகங்கள், தசைகள், எலும்புகள் ஆகியவற்றின் வளர்ச்சிக்குப் பெரிதும் உதவுகிறது.

*சிகப்பரிசியில், சாதம், தோசை, புட்டு, ரவை உப்புமா, அடை, கொழுக்கட்டை என பலவற்றை சமைக்கலாம். ஆனால், வெள்ளை அரிசி சமைக்க எடுத்துக் கொள்ளும் நேரத்தைவிட, சிகப்பு அரிசி அதிகநேரம் எடுத்துக் கொள்ளும்.

*புளிக்க வைக்கப்பட்ட சிகப்பு அரிசியில் சிறுநீர்ப்பை, கல்லீரல், உணவுக் குழாய் மற்றும் ரத்தப் புற்றுநோய்கள் வராமல் காக்கக் கூடிய தன்மைகள் இருக்கின்றன.

*சிவப்பு அரிசி ரத்தத்தில் இறுக்கத்தன்மையை தளர்த்தி பிராணவாயு கிரகிப்பை அதிகப்படுத்துவதால் உயர் ரத்த அழுத்தம் போன்றவை ஏற்படும் வாய்ப்பை தடுக்கிறது. ரத்தத்தில் இருக்கும் கழிவுகளை நீக்கி, ரத்தத்தை தூய்மைப்படுத்துகிறது. இதனால் உடல் சுறுசுறுப்பாக இயங்க முடிகிறது.

*புற்றுநோய் உண்டாக்கக்கூடிய வேதியியல் பொருட்கள் பெருங்குடலை அணுகாத வண்ணம் சிகப்பு அரிசியில் உள்ள நார்ச்சத்து பார்த்துக் கொள்ளுவதால், கோலோன் புற்றுநோய் தடுக்கப்படுகிறது.

தொகுப்பு:- ரிஷி