வளர்சிதை மாற்றமும் - ஃபேட்டி லிவரும்

நன்றி குங்குமம் டாக்டர்

தொடர்ந்து மது அருந்துபவர்களுக்கு மட்டுமே ஃபேட்டி லிவர் என்னும் கல்லீரலில் கொழுப்பு சேரும் நோய் வரும் என்று பலரும் நினைக்கிறார்கள். ஆனால், மதுப் பழக்கமே இல்லாத பலருக்கும் இந்த பாதிப்பு இருப்பதை மருத்துவர்கள் தற்போது அதிகம் கண்டறிந்து வருகின்றனர். இதில் ஆச்சரியமான விஷயம் என்னவென்றால், இவர்களில் பலர் ஒல்லியாகவும், பார்ப்பதற்கு மிகவும் ஆரோக்கியமாகவும் இருப்பவர்கள்தான் என்கிறார் பொது மருத்துவ ஆலோசகர் கௌதம் குமார் ஏ.பி. இவர் கொழுப்பு கல்லீரல் நோய் குறித்து நம்முடன் பகிர்ந்து கொண்டவை.

உடல் பருமன் உள்ளவர்களுக்கு மட்டுமே ஃபேட்டி லிவர் வரும் என்பது மக்களிடையே உள்ள மிகப்பெரிய தவறான புரிதல்களில் ஒன்றாகும். சரியான உடல் எடையுடன் இருந்தாலும், உடலின் வளர்சிதை மாற்றத்தில் குறைபாடுகள் உள்ள பலருக்கும் இந்த பாதிப்பு ஏற்படுவதை நாங்கள் தற்போது அதிகம் பார்க்கிறோம். முன்பு நான்-ஆல்கஹாலிக் ஃபேட்டி லிவர் டிசீஸ் என்று அழைக்கப்பட்ட இந்த நிலை, தற்போது மெட்டபாலிக் டிஸ்பங்ஷன்-அசோசியேட்டட் ஸ்டீட்டோடிக் லிவர் டிசீஸ் என்று அழைக்கப்படுகிறது. மது அருந்துவதால் மட்டும் அல்லாமல், உடலின் வளர்சிதை மாற்றக் கோளாறுகளால் கல்லீரலில் அதிகப்படியான கொழுப்பு சேரும்போது இது ஏற்படுகிறது.

உலகம் முழுவதும் தற்போது மிகவும் பொதுவாகக் காணப்படும் நாள்பட்ட கல்லீரல் நோயாக மெட்டபாலிக் டிஸ்பங்ஷன்-அசோசியேட்டட் ஸ்டீட்டோடிக் லிவர் டிசீஸ் உள்ளது. இது சுமார் 25 முதல் 30 சதவீத பெரியவர்களைப் பாதிக்கிறது. சர்க்கரைநோய் உள்ளவர்களுக்கு இதன் பாதிப்பு இன்னும் அதிகம். சர்க்கரைநோய் உள்ளவர்களில் 50 முதல் 70 சதவீதம் பேருக்கு ஃபேட்டி லிவர் பாதிப்பு இருக்கலாம் என ஆய்வுகள் தெரிவிக்கின்றன.

‘தி லான்செட் ரீஜினல் ஹெல்த் - சவுத் ஈஸ்ட் ஆசியா’ என்ற இதழில் வெளியான தேசிய அளவிலான ஆய்வின்படி, இந்தியாவில் 10-ல் 4 பெரியவர்களுக்கு இந்தப் பாதிப்பு இருக்கலாம் என தெரிய வந்திருக்கிறது. சரியான உடல் எடையுடன் இருப்பவர்களுக்கும் இந்த நோய் பாதிப்பு அதிகரித்து வருவது மருத்துவர்களுக்குப் பெரும் கவலையை அளித்துள்ளது. ஃபேட்டி லிவர் பாதிப்புள்ள 5 பேரில் ஒருவர் உடல் பருமன் இல்லாதவராக உள்ளார். குறிப்பாக ஆசியாவைச் சேர்ந்தவர்கள் இதனால் அதிகம் பாதிக்கப்படுகின்றனர் என ஆய்வுகள் கூறுகின்றன. ஒருவர் பார்ப்பதற்கு ஒல்லியாக இருந்தாலும், அவரது கல்லீரல், கணையம் மற்றும் குடல் போன்ற உள்ளுறுப்புகளைச் சுற்றி அதிகப்படியான கொழுப்பு சேர்ந்திருக்கலாம். ‘உள்ளுறுப்பு கொழுப்பு’ எனப்படும் இந்த மறைந்திருக்கும் கொழுப்பு, தோலுக்கு அடியில் சேரும் கொழுப்பை விட மிகவும் ஆபத்தானது.

இன்றைய நவீன வாழ்க்கை முறை இந்தப் பிரச்னைக்கு முக்கியக் காரணமாக உள்ளது. நீண்ட நேர வேலை, நீண்ட நேரம் ஒரே இடத்தில் உட்கார்ந்திருப்பது, உடற்பயிற்சியின்மை, தூக்கமின்மை, நாள்பட்ட மன அழுத்தம், அடிக்கடி பதப்படுத்தப்பட்ட உணவுகளை உண்பது, சர்க்கரை அதிகம் உள்ள பானங்கள் மற்றும் சுத்திகரிக்கப்பட்ட மாவுச்சத்து உணவுகளை உட்கொள்வது ஆகியவை இந்த அபாயத்தை அதிகரிக்கின்றன.

இந்தியர்களுக்கு ஆபத்து அதிகம் இருப்பது ஏன்?

உலகிலேயே அதிக சர்க்கரை நோயாளிகளைக் கொண்ட நாடுகளில் ஒன்றாக இந்தியா தொடர்ந்து இருந்து வருகிறது. இதனால் மெட்டபாலிக் டிஸ்பங்ஷன்-அசோசியேட்டட் ஸ்டீட்டோடிக் லிவர் டிசீஸ் போன்ற நோய்கள் இங்கு ஒரு முக்கிய பொது சுகாதாரப் பிரச்னையாக மாறி வருகின்றன. இதில் கவலைக்குரிய விஷயம் என்னவென்றால், சர்க்கரைநோய் இப்போது முதியவர்களுக்கு மட்டும் வருவதில்லை. மாறிவரும் வாழ்க்கை முறை மற்றும் உணவுப் பழக்கவழக்கங்களால் இளைஞர்கள், பதின்ம வயதினர் மற்றும் குழந்தைகளுக்கும் கூட வளர்சிதை மாற்றக் கோளாறுகள் கண்டறியப்படுவது அதிகரித்து வருகிறது.

மேற்கத்திய நாடுகளைச் சேர்ந்தவர்களை விட, தெற்காசியர்களுக்கு குறைவான உடல் எடையிலேயே இன்சுலின் எதிர்ப்பு ஏற்படும் தன்மை உள்ளது. இந்த இன்சுலின் எதிர்ப்பு, கல்லீரலில் கொழுப்பு சேர்வதை ஊக்குவிக்கிறது. இதனால் இந்தியர்கள் அதிக உடல் எடையுடன் இல்லாவிட்டாலும் எளிதில் மெட்டபாலிக் டிஸ்பங்ஷன்-அசோசியேட்டட் ஸ்டீட்டோடிக் லிவர் டிசீஸ் நோயால்

பாதிக்கப்படுகின்றனர்.

இந்த நோயின் ஆரம்ப கட்டங்களில் எந்தவொரு அறிகுறியும் வெளியே தெரியாது என்பதுதான் இதில் உள்ள மிகப்பெரிய சவாலாகும். பலரும் வழக்கமான முழு உடல் பரிசோதனை செய்யும்போதோ அல்லது வேறு ஏதேனும் காரணத்திற்காக அல்ட்ராசவுண்ட் ஸ்கேன் செய்யும்போதோ தான் தங்களுக்கு இந்தப் பாதிப்பு இருப்பதை அறிந்துகொள்கிறார்கள்.

சில ஆரம்பக்கால அறிகுறிகள்

*தொடர்ந்து சோர்வாக இருப்பது

*சாப்பிட்ட உடனே வயிறு நிறைந்தது போன்ற உணர்வு

*அடிக்கடி வயிறு உப்புசம் அல்லது வயிற்றில் அசௌகரியம் ஏற்படுவது இருப்பினும், இந்த அறிகுறிகள் பெரும்பாலும் லேசானதாகவும், குறிப்பிட்ட நோயைக் குறிக்காத வகையிலும் இருப்பதால், இவற்றை நாம் எளிதில் அலட்சியப்படுத்தி விடுகிறோம்.

*இந்த பாதிப்பைக் கண்டறியாமல் அல்லது சரியாகக் கையாளாமல் விட்டால், இது படிப்படியாக கல்லீரல் சுருக்கம், கல்லீரல் செயலிழப்பு மற்றும் சில சமயங்களில் கல்லீரல் புற்றுநோயாகக் கூட மாறக்கூடும்.

*இதன் பாதிப்பு கல்லீரலோடு மட்டுமே நின்றுவிடுவதில்லை. இந்த நோய் உள்ளவர்களுக்கு கீழ்க்கண்ட பாதிப்புகள் வருவதற்கான அபாயம் அதிகம் என்று ஆய்வுகள் மூலம் தெரிய வந்துள்ளது.

*டைப் 2 சர்க்கரை நோய், மாரடைப்பு, பக்கவாதம், நாள்பட்ட சிறுநீரக நோய், முக்கியமாக, மெட்டபாலிக் டிஸ்பங்ஷன்-அசோசியேட்டட் ஸ்டீட்டோடிக் லிவர் டிசீஸ் பாதிப்புள்ளவர்களின் மரணங்களுக்கு இதய நோய்களே முதன்மைக் காரணமாக உள்ளன.

*இந்த நோயை மருத்துவர்கள் ரத்தப் பரிசோதனைகள், வயிற்றுப் பகுதிக்கான அல்ட்ராசவுண்ட் ஸ்கேன், பைப்ரோ ஸ்கேன் ஆகியவற்றின் மூலம் கண்டறிகிறார்கள்.

*சர்க்கரைநோய் உள்ளவர்கள், உயர் ரத்த அழுத்தம் உள்ளவர்கள், அதிக கொலஸ்ட்ரால் அல்லது ட்ரைகிளிசரைடுகள் உள்ளவர்கள், தொப்பை உள்ளவர்கள், நீர்க்கட்டி பிரச்னை உள்ள பெண்கள், தூக்கத்தில் மூச்சுத்திணறல் உள்ளவர்கள், குடும்பத்தில் யாருக்கேனும் சர்க்கரைநோய் அல்லது கல்லீரல் நோய் இருப்பவர்கள் இந்த பரிசோதனைகளை செய்து கொள்ள வேண்டும்.

*ஆரம்பத்திலேயே நோய் கண்டறியப்பட்டால் பாதிப்பை முழுமையாகக் குணப்படுத்தி பழைய நிலைக்குத் திரும்பிவிட முடியும்.

*இதற்கான வாழ்க்கைமுறை மாற்றங்களைப் பொறுத்தவரை, சர்க்கரை இல்லாத பிளாக் காபி (தினமும் 3-6 கப்) குடிப்பது நன்மை பயக்கும் என நிரூபிக்கப்பட்டுள்ளது.

*பதப்படுத்தப்பட்ட உணவுகள், சர்க்கரை பானங்கள் மற்றும் சுத்திகரிக்கப்பட்ட மாவுச்சத்து (மைதா போன்ற) உணவுகளைக் குறைத்துக் கொள்ள வேண்டும்.

*காய்கறிகள், பழங்கள், முழு தானியங்கள், நார்ச்சத்து மற்றும் புரதச்சத்து நிறைந்த சரிவிகித உணவைச் சாப்பிட வேண்டும்.

*தவறாமல் உடற்பயிற்சி செய்ய வேண்டும். வாரத்திற்கு குறைந்தது 150 நிமிடங்களாவது மிதமான உடற்பயிற்சி செய்ய வேண்டும்.

*வாரத்திற்கு இரண்டு முறையாவது தசை வலுவாக்கும் பயிற்சிகளை மேற்கொள்ள வேண்டும்.

*தினமும் இரவில் 7 முதல் 8 மணி நேரம் நன்றாக தூங்க வேண்டும்.

*சர்க்கரை அளவு, ரத்த அழுத்தம் மற்றும் கொலஸ்ட்ராலை சரியான கட்டுப்பாட்டில் வைத்திருக்க வேண்டும். மது அருந்துவதைத் தவிர்க்க வேண்டும் அல்லது வெகுவாகக் குறைத்துக் கொள்ள வேண்டும்.

*ஒல்லியாக இருப்பது என்பது, உடலின் வளர்சிதை மாற்றம் ஆரோக்கியமாக இருக்கிறது என்பதைக் குறிக்காது. பார்ப்பதற்கு ஆரோக்கியமாகத் தெரிந்தாலும், உடலுக்குள் மறைந்திருக்கும் வளர்சிதை மாற்றக் கோளாறுகள் உள்ளவர்களை ஃபேட்டி லிவர் நோய் அதிகளவில் பாதிக்கிறது.

இந்த நோய் பாதிப்பை எவ்வளவு சீக்கிரம் கண்டறிகிறோமோ, அவ்வளவு எளிதாக அதைக் குணப்படுத்த முடியும். மேலும், எதிர்காலத்தில் பெரிய அளவிலான பாதிப்புகள் வருவதையும் தடுக்க முடியும்.

தொகுப்பு: -பொதுநல மருத்துவர் கௌதம் குமார்