நோய் எதிர்ப்பு சக்தியை அதிகரிக்க!

நன்றி குங்குமம் டாக்டர்

குளிர்காலத்தில் நிலவும் குளிர்ச்சி தன்மை பலருக்கும் ஒத்துக் கொள்வதில்லை. சளி, இருமல், காய்ச்சல் போன்ற தொற்று பாதிப்புகளை ஏற்படுத்திவிடும். அதில் இருந்து தற்காத்துக் கொள்வதற்கு நோய் எதிர்ப்பு மண்டலத்தை வலுப்படுத்துவது முதன்மையானது. அதற்கான பயனுள்ள வழி முறைகள்.

ஊட்டச்சத்து நிறைந்த உணவுகள்

வைட்டமின்கள், தாதுக்கள் உள்ளிட்ட அத்தியாவசிய ஊட்டச்சத்துகள்தான் நோய் எதிர்ப்பு அமைப்பை கட்டமைக்கின்றன. சிட்ரஸ் பழங்களில் காணப்படும் வைட்டமின் சி, நட்ஸ்கள், தானியங்களில் காணப்படும் வைட்டமின் ஈ போன்றவை நோய் எதிர்ப்பு சக்தியை அதிகரிக்கும் தன்மை கொண்டவை.

அவை தினசரி உணவில் போதுமான அளவில் இடம் பெறுவதை உறுதி செய்ய வேண்டும். ஆரஞ்சு, சாத்துக்குடி, கிரேப் ஃபுரூட், எலுமிச்சை போன்ற சிட்ரஸ் பழங்கள், பாதாம், பிஸ்தா, வேர்க்கடலை, சோயா, சூரியகாந்தி விதைகள், தக்காளி சாஸ், கோதுமை போன்ற வைட்டமின் ஈ சத்து நிறைந்த உணவுப் பொருட்களை குளிர்காலத்தில் தவறாமல் உட்கொள்ள வேண்டும்.

உடல் செயல்பாடு: உடற்பயிற்சி செய்வதை வழக்கமாக்குவது இடுப்பைச் சுற்றியுள்ள தசைகளை குறைத்து உடலைக் கட்டுக் கோப்பாக வைத்திருக்கவும் நோய் எதிர்ப்பு மண்டலத்தை மேம்படுத்தவும் உதவிடும்.

தசைப்பயிற்சி, யோகா, சைக்கிள் ஓட்டுதல் போன்ற மிதமான உடல் இயக்கம் கொண்ட பயிற்சிகள் ரத்த ஓட்டத்தை அதிகரிக்கச் செய்யும் எந்த நோயையும் நெருங்க விடாமல் எதிர்க்கக் கூடிய ரத்த வெள்ளை அணுக்களின் உற்பத்தியை துரிதப்படுத்த உதவும். தினமும் குறைந்தபட்சம் 30 நிமிடங்களாவது உடற்பயிற்சி செய்வதற்கு முயற்சியுங்கள்.

தூக்கம்: இரவு நேர ஓய்வின் சக்தியை ஒரு போதும் குறைத்து மதிப்பிடாதீர்கள், உடல் தன்னைத் தானே சரி செய்து கொள்வதற்கான வாய்ப்பாக தூக்கத்தைப் பயன்படுத்திக் கொள்ளும். அதில் நோய் எதிர்ப்பு அமைப்பும் அடங்கும். குழந்தைகளை தவிர மற்றவர்கள் இரவில் ஏழு முதல் எட்டு மணி நேர தூக்கத்தை இலக்காக கொள்ள வேண்டும்.

நீர்ச்சத்து: நீர் வாழ்க்கைக்கு மட்டுமல்ல உடலுக்கும் இன்றியமையாதது. நோய் எதிர்ப்பு செய்யாவிடில் அதன் பங்கும் முக்கியத்துவம் வாய்ந்தது. உடல் நீரேற்றமாக இருந்தால்தான் நோய் எதிர்ப்பு அணுக்களின் சுழற்சி சீராக நடைபெறும். உடலில் இருந்து நச்சுகளை அகற்றவும் நீர்ச்சத்து அவசியமானது.

மன அழுத்தம்: நாள்பட்ட மன அழுத்தம் நோய் எதிர்ப்பு சக்தியை முடக்கி, பல்வேறு நோய் பாதிப்புக்கு ஆளாக்கிவிடும். மன அழுத்தத்தை கட்டுக்குள் வைத்திருப்பது மன ஆரோக்கியத்துக்கும், குளிர்காலத்தில் ஏற்படும் உடல் நல கேடுகளிலிருந்து பாதுகாக்கவும் உதவும். நோய் எதிர்ப்பு மண்டலத்தை சீராக பராமரிக்கவும் துணை புரியும்.

தொகுப்பு - பாலயோகி