வரகு பயன்கள்..!

நன்றி குங்குமம் டாக்டர்

பழங்கால தமிழர்கள் அதிகம் பயன்படுத்திய, மிகக் கடுமையான வறட்சியையும் தாங்கி வளரும் ஒரு அற்புதமான சிறுதானியம் என்றால் அது வரகுதான். தமிழ் இலக்கியங்களில் குறிப்பாகப் புறநானூற்றில் வரகு மற்றும் அதன் பயன்பாடு பற்றிய குறிப்புகள், பல இடங்களில் காணப்படுகின்றன. முல்லை நில மக்களின் முக்கிய உணவாக வரகு இருந்துள்ளது.

ஊட்டச்சத்து மதிப்பு (100கிராம்)

புரதம் - 8.3. கிராம்

ஆற்றல் - 353 கால்சியம்

கொழுப்பு - 1.4 கிராம்

கார்போஹைட்ரேட் - 65.9 கிராம்

கால்சியம் - 27 மில்லிகிராம்

நார்ச்சத்து - 9 கிராம்

இரும்புச்சத்து - 0.5 - 1.5 மில்லிகிராம்

மெக்னீசியம் - 147 மில்லிகிராம்

வரகின் ஆரோக்கிய நன்மைகள்

அசாத்தியமான எடை குறைப்பு

மற்ற சிறுதானியங்களை விட வரகில் நார்ப்பொருள் (ஃபைபர்) மிக அதிகம் இது பசியை நீண்ட நேரம் கட்டுப்படுத்தி, உடலில் தேங்கியுள்ள தேவையற்ற கொழுப்புகளைக் கரைக்க பெரிதும் உதவுகிறது.

நீரிழிவு நோய்க்குத் தீர்வு

இதன் கிளைசெமிக் குறியீடு மிகக் குறைவு, வரகில் உள்ள லெசித்தின் நரம்பு மண்டலத்தை வலுப்படுத்துவதுடன், ரத்தத்தில் சர்க்கரை அளவு சீராக இருக்க உதவுகிறது.

இதய ஆரோக்கியம் மற்றும் ரத்த அழுத்தம்

வரகு உடலில் உள்ள ட்ரைகிளிசரைடுகள் மற்றும் சிரியாக்டிவ் புரோட்டீன் அளவைக் குறைத்து, இதய வீக்கம் மற்றும் உயர்ரத்த அழுத்தத்தைக் தடுக்கிறது.

காயங்களை ஆற்றும் தன்மை

வரகில் உள்ள அதிகப்படியான ஆன்டி - ஆக்ஸிடன்ட் உடலின் செல் களைப் புதுப்பித்து, உள் மற்றும் வெளி காயங்களை மிக விரைவாக ஆற்றும் தன்மை கொண்டவை. வரகில் உள்ள புரதம் மற்றும் தாதுக்கள் உடலின் செல் புதுப்பித்தலை துரிதப்படுத்தி, காயங்களை விரைவில் ஆற்ற உதவுகிறது.

மாதவிடாய் சீராக்கம்

கர்ப்பத்திற்குத் தயாராகும் பெண்களுக்கு வரகு மிகச் சிறந்த தேர்வாகும். இது கருப்பையை வலுப்படுத்தி, சீரற்ற மாதவிடாய் மற்றும் பி.சி.ஓ.எஸ் பிரச்னைகளைத் தணிக்க உதவுகிறது.

தினசரி பரிந்துரைக்கப்பட்ட அளவு

ஒரு வேளைக்கான அளவு ஒரு நபருக்கு ஒரு வேளை உணவாக 50 முதல் 80 கிராம் (சமைக்காத மாவு அல்லது அரிசி) வரை எடுத்துக் கொள்ளலாம். வரகை தினமும் சாப்பிட வேண்டியதில்லை. வாரத்தில் 2 முதல் 3 நாட்கள் மதிய உணவாகவோ அல்லது காலை சிற்றூண்டியாகவோ (இட்லி, தோசை, பொங்கல்) சுழற்சி முறையில் சேர்த்துக் கொள்வது சிறந்தது.

சுவாரஸ்யமான உண்மைகள் மற்றும் சமீபத்திய ஆராய்ச்சிகள்

அதிக பாலிஃபினால்கள்

சமீபத்திய மருத்துவ ஆய்வுகளின்படி, வரகில் க்வெர்செடின் மற்றும் ரூட்டின் போன்ற பாலிஃபினால்கள் அதிக அளவில் உள்ளன. இவை உடலில் உள்ள நாள்பட்ட வீக்கத்தைக் குறைத்து, புற்றுநோய் செல்கள் உருவாக்கத்தைத் தடுப்பதில் மிகச் சிறப்பாகச் செயல்படுவதாகக் கண்டறியப்பட்டுள்ளது.

குடல் நுண்ணுயிரிகள்

வரகில் உள்ள ரெசிஸ்டண்ட் ஸ்டார்ச் குடலில் உள்ள நல்ல பாக்டீரியாக்களின் எண்ணிக்கையை பல மடங்கு பெருக்குகிறது. இது செரிமானத்தை மேம்படுத்துவதோடு மட்டுமல்லாமல், மன அழுத்தத்தைக் குறைக்கும் ஹார்மோன்களையும் மூளைக்கு அனுப்புகிறது.

கல்லீரல் பாதுகாப்பு

வரகு தானியம் கல்லீரலில் கொழுப்பு சேர்வதைத் தடுத்து, கல்லீரலின் செயல்பாட்டை மேம்படுத்துவதாக விலங்குகளில் செய்யப்பட்ட மருத்துவ ஆய்வுகள் சுட்டிக்காட்டுகின்றன.

மிக முக்கியமான குறிப்பு - வரகு நஞ்சு

இது அனைவருமே தெரிந்து கொள்ள வேண்டிய ஒரு அறிவியல் உண்மையாகும். வரகு அறுவடை செய்யப்படும்போது, மழைக்காலமாக இருந்தால் அதிக எர்காட் என்ற ஒருவகை பூஞ்சை தாக்க வாய்ப்புள்ளது. இதனை அப்படியே சமைத்துச் சாப்பிட்டால் மயக்கம் வாந்தி போன்ற நச்சுத்தன்மை ஏற்படும்.

தீர்வு

அதனால்தான் நம் முன்னோர்கள் வரகை பலமுறை தண்ணீரில் நன்றாகக் கழுவிப் பயன்படுத்தினர். தற்போது கடைகளில் விற்கப்படும் வரகு நவீன இயந்திரங்கள் மூலம் முழுமையாகச் சுத்தப்படுத்தப்படுவதால் இந்த அபாயம் இல்லை. இருந்தாலும், வரகைச் சமைப்பதற்கு முன் குறைந்தது மூன்று முறையாவது நன்றாகக் கழுவுவது அவசியம். 6 முதல் 8 மணி நேரம் நன்கு ஊறவைத்து அந்தத் தண்ணீரைக் கீழே ஊற்றிவிட்டு, புதிய தண்ணீரை சேர்த்து சமைக்க வேண்டும். இது முழுமையான சத்துக்கள் உடலுக்குக் கிடைக்க செய்யும்.

தூக்கமின்மைக்குச் சிறந்த மருந்து

வரகில் உள்ள ஊட்டச்சத்துகள் நரம்பு மண்டலத்தை அமைதிப்படுத்தும் தன்மை கொண்டவை இரவு நேரங்களில் தூக்கமின்மையால் தவிப்பவர்கள் வரகைக் கொண்டு செய்த உணவுகளைப் பகல் நேரத்தில் தொடர்ந்து சாப்பிட்டு வந்தால் நல்ல ஆழ்ந்த உறக்கம் கிடைக்கும். வாரம் முழுவதும் சிறுதானியம் உண்பதைத் தவிர்த்து, வாரத்திற்கு மூன்று அல்லது நான்கு நாட்கள் மட்டும் மதிய உணவாகவோ அல்லது காலை உணவாகவோ உண்பது சமச்சீரான ஆரோக்கியத்தைத் தரும்.

தொகுப்பு: உணவியல் நிபுணர் சங்கீதா