சபாநாயகர் விளக்கம் தமிழக சட்டப்பேரவையில்

வாணியம்பாடி, செப்.17: தமிழக சட்டப்பேரவையில் எதிர்க்கட்சி பேச அனுமதி மறுக்கப்பட்டதா? என்பதற்கு சபா நாயகர் விளக்கம் அளித்துள்ளார். திருப்பத்தூர் மாவட்டம் வாணியம்பாடி பஸ் நிலையம் அருகே தமிழகத்தில் முதலாவதாக கடந்த 1993ம் ஆண்டுநிறுவப்பட்ட, விடுதலைப் போராட்ட வீரரும், சமூகநீதி போராளியுமான எஸ்.எஸ். ராமசாமி படையாட்சியாரின் 109வது பிறந்தநாளை முன்னிட்டு, அவரது திருவுருவ சிலைக்கு தமிழக அரசு சார்பில் தமிழக சட்டப்பேரவைச் சபாநாயகர் ஜே. சி. டி. பிரபாகர் மாலை அணிவித்து, மலர் தூவி மரியாதை செலுத்தினார்.

தொடர்ந்து வனத்துறை அமைச்சரும், திருப்பத்தூர் மாவட்ட பொறுப்பு அமைச்சருமான ரஞ்சித்குமார், எம்எல்ஏ திருப்பதி உட்பட பலர் மரியாதை செலுத்தினர்.பின்னர் நிருபர்களுக்கு சபாநாயகர் அளித்த பேட்டி: சபாநாயகர் என்ற முறையில் எனக்கு எந்த அரசியல் கட்சியின் மீதும் தனிப்பட்ட ஈர்ப்போ, ஆதரவோ இல்லை. கட்சிகள் நிலைப்பாடுகளை மாற்றுவது அவரவர் விருப்பத்தை பொறுத்தது. பேரவைத்தலைவர் என்ற நடுநிலையான பொறுப்பில் இருந்து அனைத்தையும் உன்னிப்பாக கவனித்து வருகிறேன்.

சட்டமன்றத்தில் எதிர்க்கட்சியான திமுகவிற்கு பேச அனுமதி மறுக்கப்படுவதாக கூறப்படும் குற்றச்சாட்டை திட்டவட்டமாக மறுக்கிறேன். ஆளுங்கட்சி உறுப்பினர்களுக்கு நிதானமாக வாய்ப்பளித்து, எதிர்க்கட்சிகளுக்கு தாராளமாக வாய்ப்புகள் வாரி வழங்கப்பட்டதை அவையில் அனைவரும் பாராட்டியுள்ளனர். யாருடைய குரல்வளையையும் நெரிப்பது எனது நோக்கமல்ல. அனைவருக்கும் உரிய நேரத்தில் சீராக வாய்ப்புகள் வழங்கப்பட்டதை ஆதாரத்துடன் நிரூபிக்க முடியும் என தெரிவித்தார்.

தொடர்ந்து இடைத்தேர்தல் தொடர்பாக நிருபர்கள் கேட்டபோது, ‘நான் சபாநாயகர் பொறுப்பில் இருப்பதால் அரசியல் சார்ந்த கேள்விகளுக்கு விடையளிப்பதை தவிர்க்க விரும்புகிறேன்’ என்றார்.