கால்நடை தீவனப்பயிர்கள் விவசாயிகளே வளர்ப்பதால் கூடுதல் லாபம்பெறலாம்

வலங்கைமான், நவ. 29: நவீன உலக மக்கள் தொகை பெருக்கம் இவை அனைத்தும் வளர்ந்து வரும் காலகட்டத்தில் உணவு உண்ணும் பழக்கத்திலும் இந்த வகையான மாற்றங்கள் ஏற்பட்டுள்ளது. அதிலும் கால்நடைகளிலிருந்து கிடைக்கும் பால், முட்டை, இறைச்சி ஆகியவற்றின் தேவை இன்னும் அதிகரித்துள்ளது. ஆனால் கால்நடைகளுக்கு தேவையான தீவனப்பயிர் பெருமளவில் குறைந்துள்ளது.வறட்சியான பருவத்தில் கால்நடைகளுக்கு தீவனப்பயிர் கிடைக்காமல் மிகவும் சிரமப்படுகின்றனர்.

விவசாயிகள், கால்நடைகளுக்கு தேவையான தீவனப்பயிர்களை சிறிய நிலப்பரப்பில் தங்கள் வீட்டின் பின்புறம் கூட வளர்த்து கால்நடைகளுக்கு தீவனமாக கொடுக்கலாம். இந்த தீவனப்பயிர்களுக்கு நீர்த்தேவை மிகவும் குறைவுதான். இவ்வாறு தீவனப் பயிர்களை இயற்கையாக நாமே வளர்த்து கொடுப்பதன் மூலம் கால்நடைகள் ஆரோக்கியமாக இருப்பதுடன் மாடாக இருந்தால் அதன்பால் நல்ல தரமாக இருக்கும். ஆடாக இருந்தால் அதன் இறைச்சி சுவை மிகுந்ததாகவும், எடை அதிகமாகவும் இருக்கும். இவ்வாறு விவசாயிகள் தங்களுக்குத் தேவையான தீவனப் பயிர்களை தாங்களே வளர்த்து கால்நடைகளுக்கு கொடுப்பதன் மூலம் அதிக லாபம் பெறலாம்.