பேரிடர் மீட்பு பணிகளை மேற்கொள்ள உபகரணங்களுடன் தயார் நிலையில் போலீசார்

திருவாரூர், நவ.29: திருவாரூர் மாவட்டத்தில் பேரிடர் மீட்பு பணிகளை மேற்கொள்வதற்கு உரிய உபகரணங்களுடன் 80 போலீசார் தயார் நிலையில் இருந்து வருவதாக எஸ்.பி தெரிவித்துள்ளார். இதுகுறித்துஎஸ்.பி கருண்கரட் கூறியிருப்பதாவது: திருவாரூர் மாவட்டத்தில் தாழ்வான பகுதிகள் கண்டறியப்பட்டு அங்கு வெள்ள நீர் விரைவில் வடிவதற்காக வடிகால் சீரமைப்பு உட்பட பல்வேறு பணிகள் மேற்கொள்ளப்பட்டுள்ள நிலையில் பேரிடர் மீட்பு பணிகளை மேற்கொள்வதற்காக பேரிடர் பயிற்சி முடித்த போலீசார் உபகரணங்களுடன் தயார் நிலையில் இருந்து வருகின்றனர்.

அதன்படி திருவாரூர் ஆயுதப்படை மற்றும் மாவட்டம் முழுவதும் இருந்து வரும் 5 உட்கோட்ட காவல் நிலையங்களிலும் தலா ஒரு சப் இன்ஸ்பெக்டர் தலைமையில் இந்த பேரிடர் குழுவானது இயங்கி வருகிறது. அதன்படி திருவாரூர், திருத்துறைப்பூண்டி, முத்துப்பேட்டை, மன்னார்குடி மற்றும் நன்னிலம் என 5 உட்கோட்டங்களிலும் தலா 10 போலீசார் வீதம் 50 பேர்களும், திருவாரூர் ஆயுதப்படை பிரிவில் 30 போலீசாரும் என மொத்தம் 80 போலீசார் இந்த பேரிடர் பயிற்சி பெற்றுள்ள நிலையில் அனைத்து உபகரணங்களுடன் போலீசார் தயார் நிலையில் இருக்க வேண்டும் என அறிவுறுத்தப்பட்டுள்ளது.

மேலும் மழை வெள்ளம் தொடர்பாக பொது மக்கள் எவ்வித அச்சமும் அடைய வேண்டாம் என்பதுடன் தங்கள் பகுதி மற்றும் தங்களுக்கு ஏற்படும் இடர்பாடுகளை திருவாரூர் எஸ்.பி அலுவலக கட்டுபாட்டு அறை எண் 9498100865 என்ற எண்ணிற்கும், உட்கோட்ட அளவில் திருவாரூர் 9498100866, நன்னிலம் 9498100874, மன்னார்குடி 9498100881, திருத்துறைப்பூண்டி 9498100891 மற்றும் முத்துப்பேட்டை 9498100897 ஆகிய எண்களில் தகவல் தெரிவித்தால் துரித நடவடிக்கை எடுக்கப்படும். இவ்வாறு எஸ்.பி கருண்கரட் தெரிவித்துள்ளார்.