மாவட்டத்தில் 11 தொகுதிகளில் போட்டியிட்ட 193 வேட்பாளர்களில் 160 பேரின் டெபாசிட் காலி அபாமக அருள், வீரப்பன் மகளும் டெபாசிட் இழந்தனர்

சேலம், மே 6: சேலம் மாவட்டத்தில் உள்ள 11 தொகுதிகளில் போட்டியிட்ட 193 வேட்பாளர்களில், 160 பேர் தங்களது டெபாசிட்டை இழந்தனர். தமிழக சட்டமன்ற தேர்தல் வாக்குப்பதிவு கடந்த 23ம் தேதி நடந்தது. சேலம் மாவட்டத்தை பொறுத்தவரை 11 சட்டமன்ற தொகுதிகளில் திமுக கூட்டணி, அதிமுக கூட்டணி, தவெக, நாம் தமிழர் கட்சியினர் மற்றும் சுயேச்சைகள் என 193 வேட்பாளர்கள் களத்தில் இருந்தனர். தேர்தல் வாக்கு எண்ணிக்கை நேற்று முன்தினம் நடைபெற்று முடிந்தது. இதில், 7 தொகுதிகளில் அதிமுகவும், 4 தொகுதிகளில் தவெகவும் வெற்றி பெற்றுள்ளது.

இதனிடையே சட்டமன்ற தேர்தலில் போட்டியிடும் வேட்பாளர்கள் தாங்கள் செலுத்தும் டெபாசிட் தொகையை பெற, மொத்தம் பதிவான வாக்குகளில் 6-ல் ஒரு பங்கு வாக்கினை பெற வேண்டும். அவ்வாறு பெறாத வேட்பாளர்கள், டெபாசிட் இழப்பார்கள். அதன்படி சேலம் மாவட்டத்தில் 11 தொகுதிகளில் போட்டியிட்ட 193 வேட்பாளர்களில் 33 பேர் மட்டுமே தங்களது டெபாசிட்டை தக்க வைத்துள்ளனர்.

குறிப்பாக, திமுக கூட்டணி, அதிமுக கூட்டணி மற்றும் தவெக சார்பில் போட்டியிட்ட அனைவரும் டெபாசிட் பெற்றனர். அதேசமயம், நாம் தமிழர் கட்சி சார்பில் போட்டியிட்ட வீரப்பனின் மகள் வித்யா வீரப்பன் (மேட்டூர்) உள்ளிட்ட 11 வேட்பாளர்களும் டெபாசிட் இழந்தனர். இதேபோல், சேலம் மேற்கு தொகுதியில் போட்டியிட்ட அருள் உள்ளிட்ட ராமதாஸின் அபாமகவைச் சேர்ந்த வேட்பாளர்களும் டெபாசிட் பெறவில்லை.

சேலம் மாவட்டத்தில் கெங்கவல்லி தொகுதியில் போட்டியிட்ட திமுக வேட்பாளர் சின்னதுரை, அதிமுக வேட்பாளர் நல்லதம்பி, தவெக வேட்பாளர் சுஜாதாவை தவிர்த்து, மற்ற 10 வேட்பாளர்களும் டெபாசிட்டை இழந்துள்ளனர். இதேபோல், ஆத்தூரில் காங்கிரஸ் வேட்பாளர் அர்த்தனாரி, அதிமுக வேட்பாளர் ஜெயசங்கரன், தவெக வேட்பாளர் செல்வபாரதியை தவிர்த்து 12 வேட்பாளர்களும் டெபாசிட் இழந்தனர்.

ஏற்காட்டில் திமுக வேட்பாளர் ரேவதி, அதிமுக வேட்பாளர் உஷாராணி, தவெக வேட்பாளர் லெட்சுமியை தவிர்த்து 10 வேட்பாளர்களும், ஓமலூரில் தேமுதிக வேட்பாளர் இளங்கோவன், அதிமுக வேட்பாளர் மணி, தவெக வேட்பாளர் அதியமானை தவிர்த்து 12 வேட்பாளர்களும், மேட்டூரில் திமுக வேட்பாளர் மிதுன் சக்ரவர்த்தி, அதிமுக வேட்பாளர் வெங்கடாசலம், தவெக வேட்பாளர் செல்வம் தவிர்த்து 15 வேட்பாளர்களும் டெபாசிட்டை பறிகொடுத்தனர்.

இடைப்பாடியில் திமுக வேட்பாளர் காசி, அதிமுக வேட்பாளர் எடப்பாடி பழனிசாமி, சுயேச்சையாக போட்டியிட்ட பிரேம்குமார் தவிர்த்து 12 வேட்பாளர்களும், சங்ககிரி தொகுதியில் திமுக வேட்பாளர் மணிகண்டன், அதிமுக வேட்பாளர் வெற்றிவேல், தவெக வேட்பாளர் செந்தில்குமார் தவிர்த்து 17 வேட்பாளர்களும் டெபாசிட் இழந்தனர். சேலம் வடக்கு தொகுதியில் திமுக வேட்பாளர் ராஜேந்திரன், பாமக வேட்பாளர் சதாசிவம், தவெக வேட்பாளர் சிவக்குமாரை தவிர்த்து 11 வேட்பாளர்களும் டெபாசிட் இழந்தனர்.

இதேபோல் சேலம் மேற்கு ெதாகுதியில் தேமுதிக வேட்பாளர் அழகாபுரம் மோகன்ராஜ், பாமக வேட்பாளர் கார்த்தி, தவெக வேட்பாளர் லட்சுமணன் தவிர்த்து 28 வேட்பாளர்களும், சேலம் தெற்கு தொகுதியில் திமுக வேட்பாளர் லோகநாதன், அதிமுக வேட்பாளர் வினோத், தவெக வேட்பாளர் விஜய் தமிழன் பார்த்திபன் தவிர்த்து 16 வேட்பாளர்களும், வீரபாண்டியில் திமுக வேட்பாளர் தருண், அதிமுக வேட்பாளர் பாலாஜி, தவெக வேட்பாளர் பழனிவேல் தவிர்த்து 17 வேட்பாளர்களும் என மாவட்டம் முழுவதும் 160 வேட்பாளர்கள் டெபாசிட் இழந்துள்ளனர்.