கிராமங்கள் தோறும் மிளகாய் உலர்களம் அமைக்க வேண்டும்

ஆர்.எஸ்.மங்கலம், ஜூலை 30: ஆர்.எஸ்.மங்கலம், சுற்று வட்டாரப் பகுதிகளில் உள்ள கிராமங்கள் தோறும் மிளகாய் பழங்களை காய வைப்பதற்கு மிளகாய் உலர் களம் அமைத்து தர வேண்டும் என விவசாயிகள் கோரிக்கை விடுத்துள்ளனர். தமிழகத்திலேயே அதிகமான மிளகாய் விளையக்கூடிய பகுதிகளில் ஆர்.எஸ்.மங்கலம் சுற்று வட்டாரப் பகுதி மிகவும் முக்கியமான பகுதியாகும். இப்பகுதியில் நெல் விவசாயத்திற்கு அடுத்தபடியாக மக்களின் வாழ்வாதாரமாக ஜீவனாம்சம் செய்ய வழிவகுப்பது மிளகாய் விவசாயம். மிளகாய் பழங்களை பறித்து உலர்த்துவதற்கு விவசாயிகளுக்கு சரியான உலர் களங்கள் இல்லாத நிலையில் விவசாயி தங்கள் தோட்டங்களில் விளைவித்து பறித்த மிளகாய் பழங்களை காடு, மேடு, வயல்வெளிகளில் உலரப்போடுவதால் மிளகாய் காய்ந்த பின்னர் அந்த மிளகாய் வத்தல் கலர் மங்கிய நிலையிலும்,

அதிகமான மிளகாய் வெள்ளை நிறமாக பழுப்படைந்து விடுவதாலும் மிளகாய் வத்தலுக்கு உரிய விலை கிடைக்காமல் போய் விடுவதாகவும் விவசாயிகள் புலம்புகின்றனர். மேலும் இதற்கு ஒரு தீர்வாக கிராமங்கள் தோறும் உலர்களம் அமைத்துக் கொடுத்தால் மிளகாய் வத்தல் கலர் மங்காமல் நல்ல சிகப்பு நிறமாக இருக்கும். அதுபோன்ற வத்தலுக்கு அதிகபட்சம் விலை கிடைக்க வாய்ப்பாக இருக்கும். விவசாயிகளின் நலன் கருதி அரசு சார்பாக கிராமங்கள் தோறும் மிளகாய் உலர் களங்களை அமைத்துக் கொடுக்க மாவட்ட நிர்வாகம் முன் வரவேண்டும் என விவசாயிகள் கோரிக்கை விடுத்துள்ளனர்.