ராமநாதபுரத்தில் ரூ.1 லட்சம் மதிப்புள்ள மெத்தபெட்டமைன் பறிமுதல்: 4 பேர் அதிரடி கைது

ராமநாதபுரம், ஜூலை 21: ராமநாதபுரத்தில் ரூ.1 லட்சம் மதிப்பிலான மெத்தபெட்டமைன் போதை பொருளை போலீசார் பறிமுதல் செய்து 4 பேரை கைது செய்தனர். ராமநாதபுரம் பகுதியில் கஞ்சா, மெத்தபெட்டமைன் உள்ளிட்ட போதை பொருட்கள் விற்பனை நடந்து வருகிறது. இதை தடுக்க போலீசார் நடவடிக்கை எடுத்து வருகின்றனர். இந்நிலையில் ராமநாதபுரம் நகர் போலீசார், புத்தேந்தல் ரயில்வே கேட் பகுதியில் நேற்று முன்தினம் இரவு வாகன சோதனையில் ஈடுபட்டனர். அப்போது ஒரு டூவீலரில் வந்த 4 பேர், போலீசாரை கண்டதும் வண்டியை போட்டு விட்டு தப்பியோடினர். இதையடுத்து, போலீசார் அவர்களை விரட்டி பிடித்து சோதனை செய்தனர். இதில் அவர்கள் 22 கிராம் எடை மதிப்புள்ள மெத்தபெட்டமைன் போதை பொருளை வைத்திருந்தது தெரியவந்தது.

அவர்களிடம் நடத்திய விசாரணையில், ராமநாதபுரம் வசந்தம் நகர் மதன்ராஜ் (29), கீழக்கரை மாயகுளம் சிரஞ் சீவி (20), ராமநாதபுரம் பாலசுப்ரமணியன் கோயில் தெரு வெற்றிவேலன் (22), கீழக்கரை சீனி சாகுல் ஹமீது (22) என்பதும், விற்பனைக்காக மெத்தபெட்டமைனை கொண்டு வந்ததும் தெரியவந்தது. இதையடுத்து போலீசார் 4 பேரையும் கைது செய்து மெத்த பெட்டமைன், டூவீலர், எடை இயந்திரம் ஆகியவற்றை பறிமுதல் செய்தனர். பறிமுதல் செய்யப்பட்ட மெத்தபெட்டமைன் மதிப்பு ரூ.1 லட்சம் இருக்கும் என போலீசார் தெரிவித்தனர்.