பாதசாரிகளை அச்சுறுத்தும் திறந்து கிடக்கும் கழிவுநீர் வாய்க்கால்

கரூர், நவ. 29: கரூர் காந்திகிராமம் சாலையோரம் பாதசாரிகளை அச்சுறுத்தும் திறந்த நிலையில் உள்ள கழிவுநீர் வடிகால்களை மூடி சீரமைக்க வேண்டும் என கோரிக்கை விடுத்துள்ளனர். கரூரில் இருந்து திருச்சி உட்பட பல்வேறு பகுதிகளுக்கு செல்லும் அனைத்து வாகனங்களும் காந்திகிராமம் வழியாக செல்கிறது. தெரசா கார்னர் பகுதியில் இருந்து ரயில்வே மேம்பாலம் வரை காந்திகிராமம் பகுதியின் இருபுறமும் அதிகளவு வர்த்தக நிறுவனங்கள் உள்ளன.

இந்த சாலையின் இருபுறமும் சாலையோரம் சாக்கடை வடிகால் அமைக்கப்பட்டு பயன்பாட்டில் உள்ளது. மேலும், சாலையின் மையத்தில் தடுப்புச் சுவர் அமைக்கப்பட்டுள்ளது. இந்நிலையில், சாலையோர வடிகால்கள் பல்வேறு பகுதிகளில் திறந்த நிலையில் உள்ளதால், விபத்து அபாயம் ஏற்படும் சூழல் உள்ளதாக கூறப்படுகிறது. மேலும், இரவு நேரங்களில் இந்த சூழல் அதிகமாகவே உள்ளது.

எனவே, திறந்த நிலை வடிகால்களை பாதுகாப்பாக மூட வேண்டும் என்ற கோரிக்கை நீண்ட காலமாக வைக்கப்பட்டு வருகிறது. சம்பந்தப்பட்ட அதிகாரிகள் இந்த பகுதிச் சாலையை பார்வையிட்டு வடிகால்களை மூடிட தேவையான ஏற்பாடுகளை விரைந்து மேற்கொள்ள வேண்டும் என என கோரிக்கை விடுத்துள்ளனர்.