காஞ்சி அரசு தொழிற்பயிற்சி நிலையத்தில் பயிற்சியாளர்கள் நேரடி சேர்க்கை

காஞ்சிபுரம், ஜூலை 8: காஞ்சிபுரம் அரசு தொழிற்பயிற்சி நிலையத்தில், பயிற்சியாளர்கள் நேரடி சேர்க்கை வரும் 30ம் தேதி வரை நடைபெறவுள்ளது. இதுகுறித்து மாவட்ட கலெக்டர் (பொறுப்பு) திவ்ய கூறியுள்ளதாவது: காஞ்சிபுரம் மாவட்டத்தில் உள்ள அரசினர் தொழிற்பயிற்சி நிலையத்தில் (Government ITI) 2026-2027ம் கல்வியாண்டிற்கான நேரடி சேர்க்கை 30.07.2026 வரை மேற்கொள்ளப்பட உள்ளது. இதில், 8ம் வகுப்பு மற்றும் 10ம் வகுப்பு தேர்ச்சி பெற்ற மாணவ - மாணவிகள் ஓராண்டு மற்றும் இரண்டாண்டு தொழிற்பயிற்சியில் கீழ்கண்ட தொழிற்பிரிவுகளில் சேர்ந்து பயனடையலாம். இன்டஸ்டிரியல் ரோபோட்டிக்ஸ் & டிஜிட்டல் மேனுப்பேக்சரிங் டெக்னீசின், அட்வான்ஸ் சிஎன்சி மெசினிங் டெக்னீசியன், கம்பியூட்டர் எஐடட் மேனுபேக்சரிங் ப்ரோகிராமர், டெக்னீசியன் மெக்கட்ரானிக்ஸ், அழகு சாதனவியல், மின் கம்பியாள் உள்ளிட்ட பிரிவுகளில் பயனடையலாம்.

மேலும், அரசு தொழிற்பயிற்சி நிலையத்தில் பயிற்சி முற்றிலும் இலவசமாக வழங்கப்படுகிறது. அதுமட்டுமின்றி இலவச மிதிவண்டி, காலணிகள், பாடப்புத்தகம், வரைபட உபகரணங்கள், சீருடைகள், சீருடைகளுக்கான தையற்கூலி மற்றும் மாதாந்திர உதவித்தொகையாக ரூ.750, புதுமைப்பெண் திட்டத்தின் கீழ் அரசு பள்ளிகளில் தமிழ் வழியில் பயின்ற மாணவிகளுக்கு மாதம் ரூ.1000 உதவித்தொகையும், தமிழ்ப்புதல்வன் திட்டத்தின் கீழ் அரசு பள்ளிகளில் தமிழ் வழியில் பயின்ற மாணவர்களுக்கு மாதம் ரூ.1000 உதவித்தொகையும் வழங்கப்படுகிறது.

இது, தொடர்பான விவரங்களை தெரிந்துகொள்ள காஞ்சிபுரம் அரசு தொழிற்பயிற்சி நிலையத்தை நேரில் அணுகுமாறு தெரிவிக்கப்பட்டு உள்ளது.

மேலும், தொடர்பு கொள்ள வேண்டிய முகவரி முதல்வர், அரசு தொழிற்பயிற்சி நிலையம், எண் 26, புத்தேரி தெரு, கைலாச நாதர் கோயில் பின்புறம், காஞ்சிபுரம் மற்றும் தொலைபேசி எண் 044-27225350, 9659452204 மற்றும் 9444496306 என்ற எண்ணில் தொடர்புகொண்டு, தொழிற்பயிற்சி நிலையத்தில் சேர்ந்து பயன்பெறலாம். இவ்வாறு கூறியுள்ளார்.