சாமநாயக்கன்பாளையம் அருகே செல்போன் திருடிய தொழிலாளியை சரமாரியாக தாக்கிய 4 பேர் கைது

பெ.நா.பாளையம், ஆக.19: சாமநாயக்கன்பாளையம் அருகே செல்போன் திருடிய கூலித்தொழிலாளியை சரமாரியாக அடித்த 4 பேரை போலீசார் கைது செய்தனர். கோவை பெரியநாயக்கன்பாளையம் அடுத்துள்ள சாமநாயக்கன்பாளையம் ஜெ.ஜெ.கார்டன் பகுதியில் வசிப்பவர் விஜயகுமார். இவரது மனைவி கிருஜா (54). இவர் கோவில்பாளையத்தில் வீட்டு வேலை செய்து வருகிறார். இவர்களுக்கு 2 மகன்கள் உள்ளனர். 2வது மகன் பெயர் சில்லட் என்கிற பிரதீப்குமார் (34). கூலி வேலை செய்து வருகிறார். திருமணம் ஆகவில்லை.

இந்நிலையில் கடந்த 17ம் தேதி இரவு கிருஜாவின் தம்பி ஸ்ரீனிவாசன் கிருஜாவுக்கு போன் செய்து பூங்கா நகரை சேர்ந்த பிரகாஷ் மற்றும் அவரது நண்பர்கள் கார்த்திக், ஹரிகிருஷ்ணன், மதுரை சிவா ஆகிய 4 பேரும் சேர்ந்து சாமநாயக்கன்பாளையம் வி.ஜி.பி கார்டன் அருகில் உள்ள காலி இடத்தில் வைத்து பிரதீப்குமாருடன் தகராறில் ஈடுபட்டதாக கூறியுள்ளார். உடனே கிருஜா சம்பவ இடத்திற்கு சென்று பார்த்தபோது, அங்கு யாரையும் காணவில்லை. அருகில் இருந்தவர்களிடம் கேட்டபோது, இங்கு ஒருவர் அடிப்பட்டு கிடந்ததாகவும், ஆம்புலன்ஸ் மூலம் அவரை அரசு மருத்துவமனைக்கு அழைத்துசென்றதாகவும் கூறியுள்ளனர்.

உடனடியாக கோவை அரசு மருத்துவமனைக்கு சென்று மயக்கநிலையில் இருந்த பிரதீப்குமாரை பார்த்தபோது, உடலில் பல இடங்களில் பலத்த காயங்களுடன் இருந்துள்ளார். உடனடியாக கிருஜா பெரியநாயக்கன்பாளையம் போலீசில் புகார் தெரிவித்தார். புகாரில் பேரில் வழக்குப்பதிவு செய்த போலீசார் பிரதீப்குமாரை அடித்த சாமநாயக்கன்பாளையம் பூங்கா நகரை சேர்ந்த சடையப்ப கவுண்டர் என்பவரின் மகன் கார்த்தி (44), சபாபதி என்பவரின் மகன் பிரகாஷ் (26), பூபதி என்பவரின் மகன் ஹரிகிருஷ்ணன் (23) மற்றும் மதுரையை சேர்ந்த மூர்த்தி என்பவரின் மகன் சிவா (24) ஆகியோரை நேற்று கைது செய்து விசாரணை செய்தனர்.

அப்போது, கடந்த 4 நாட்களுக்கு முன்பாக இவர்கள் 4 பேருடன் சில்லட் என்கிற பிரதீப்குமார் மது அருந்தும்போது, பிரகாஷ் என்பவரின் செல்போனை திருடி விட்டு அங்கிருந்து சென்று விட்டார். தொடர்ந்து 4 நாட்களாக பிரதீப்குமரை காணவில்லை. இந்நிலையில் 17ம் தேதி இரவு சாமநாயக்கன்பாளையத்தில் உள்ள மதுகடையில் மது அருந்தி கொண்டு இருந்த பிரதீப்குமாரிடம் செல்போனை கேட்டபோது இவர்களுக்குள் வாக்குவாதம் ஏற்பட்டதும், தொடர்ந்து வி.ஜி.பி கார்டன் அருகே வைத்து கட்டையால் பிரதீப்குமாரை அடித்ததாகவும் தெரிவித்துள்ளனர். தொடர்ந்து 4 பேர்களையும் கைது செய்து, போலீசார் நீதிமன்றத்தில் ஆஜர்படுத்தி சிறையில் அடைத்தனர்.